ઝાંસીથી ગ્વાલિયર જઈ રહેલી એક પેસેન્જર બસ મધ્યપ્રદેશના દતિયામાં અકસ્માતનો ભોગ બની છે. અકસ્માત દરમિયાન બસની નીચેથી આવી ગયેલા મોટરસાઈકલની પેટ્રોલ ટાંકીમાં વિસ્ફોટ થયો હતો, જેના કારણે બસમાં આગ લાગી હતી. બસ આગની લપેટમાં આવી ગઈ હતી અને એક વ્યક્તિનું મોત નીપજ્યું હતું અને અન્ય એક વ્યક્તિ દાઝી ગયો છે. હાલમાં ઘટનાસ્થળે અંધાધૂંધી ફેલાઈ ગઈ છે.
આગ ઝડપથી આખી બસમાં ફેલાઈ ગઈ
અહેવાલો મુજબ આ ભયાનક અકસ્માત ત્યારે થયો જ્યારે એક મોટરસાઈકલ અચાનક બસ નીચે આવી ગઈ અને ત્યારબાદ મોટરસાઈકલની પેટ્રોલ ટાંકી ફાટી ગઈ, જેના કારણે આગ ઝડપથી આખી બસમાં ફેલાઈ ગઈ. આગ એટલી તીવ્ર હતી કે લોકો ચીસો પાડતા અને બહાર દોડતા જોવા મળ્યા. અકસ્માત દરમિયાન હાઈવે પર ટ્રાફિક પણ થોડા સમય માટે ખોરવાઈ ગયો હતો. માહિતી મળતાં જ પોલીસ અને ફાયર બ્રિગેડના કર્મચારીઓ ઘટનાસ્થળે પહોંચ્યા છે.
અકસ્માતમાં એક મુસાફરનું થયું મોત
અકસ્માત બાદ સ્થાનિક લોકોએ તાત્કાલિક મદદ કરી અને બસમાંથી બધા મુસાફરોને સુરક્ષિત રીતે બહાર કાઢવામાં મદદ કરી. જોકે, આ અકસ્માતમાં બે લોકો ગંભીર રીતે દાઝી ગયા હતા. દુઃખદ વાત એ છે કે, દાઝી ગયેલા મુસાફરોમાંથી એકનું મોત થયું છે, જ્યારે બીજાની હાલત ગંભીર છે. બંને ઘાયલોને સારવાર માટે દતિયા જિલ્લા હોસ્પિટલમાં દાખલ કરવામાં આવ્યા છે.
અકસ્માત દરમિયાન હાઈવે બ્લોક થઈ ગયો
સૂત્રોના જણાવ્યા મુજબ બસ ભીમ આર્મીના કાર્યકરો દ્વારા ભાડે લેવામાં આવી હતી. કાર્યકર્તાઓ દતિયામાં એક મોટા વિરોધ પ્રદર્શનમાં ભાગ લીધા બાદ ગ્વાલિયર જઈ રહ્યા હતા. આ ઘટનાને કારણે હાઈવે પર ટ્રાફિક થોડા સમય માટે ખોરવાઈ ગયો હતો. પોલીસ ઘટનાસ્થળે પહોંચી, આગ ઓલવી નાખી અને અકસ્માતના કારણની તપાસ શરૂ કરી દીધી છે.
