- મધ્ય પ્રદેશના મુખ્યમંત્રીના નામની આખરે થઈ જાહેરાત
- ઉજ્જૈન દક્ષિણના ધારાસભ્ય છે મોહન યાદવ
- 2013માં પહેલી વખત જીત્યા હતા વિધાનસભા ચૂંટણી
મધ્ય પ્રદેશમાં મુખ્યમંત્રીના નામને લઈને સસ્પેન્સ આખરે ખતમ થઈ ગયું છે. રાજ્યના મુખ્યમંત્રી તરીકે મોહન યાદવના નામ પર મહોર મારવામાં આવી છે. ભાજપના ધારાસભ્ય દળની બેઠકમાં સર્વસંમતિથી તેમનું નામ નક્કી કરવામાં આવ્યું છે. આ અગાઉ, ભાજપ હાઈકમાન્ડે મનોહર લાલ ખટ્ટર, ડૉ. કે. લક્ષ્મણ અને આશા લકડાને નિરીક્ષક તરીકે નિયુક્ત કર્યા હતા અને તેમને મુખ્યમંત્રીની પસંદગીની જવાબદારી સોંપી હતી. નિરીક્ષકોની હાજરીમાં સોમવારે યોજાયેલી ધારાસભ્ય દળની બેઠકમાં મોહન યાદવનું નામ ફાઇનલ કરવામાં આવ્યું હતું.
ધારાસભ્ય દળની બેઠકમાં મોહન યાદવના નામ પર સર્વસંમતિ સધાઈ છે. મોહન યાદવ ઉજ્જૈન દક્ષિણના ધારાસભ્ય છે. મોહન યાદવ સંઘના નજીકના હોવાનું કહેવાય છે. મળતી માહિતી મુજબ શિવરાજ સિંહ ચૌહાણે ધારાસભ્ય દળની બેઠકમાં મોહન યાદવના નામનો પ્રસ્તાવ મૂક્યો હતો. આ જાહેરાત સાથે તમામ અટકળોનો અંત આવી ગયો છે. હવે રાજ્યની કમાન મોહન યાદવના હાથમાં રહેશે.
મોહન યાદવ મધ્ય પ્રદેશના ઉજ્જૈન જિલ્લાની ઉજ્જૈન દક્ષિણ વિધાનસભા બેઠક પરથી ભાજપના ધારાસભ્ય છે. ધારાસભ્ય તરીકે વર્ષ 2013ની વિધાનસભા ચૂંટણી જીતીને તેમણે રાજ્યસ્તરે રાજકીય કેરિયરની શરૂઆત કરી હતી. બાદમાં, વર્ષ 2018માં તેમને ફરી આ જ બેઠક પર રિપીટ કરવામાં આવ્યા હતા. બીજી વખત પણ વિધાનસભા ચૂંટણીમાં જીત મેળવીને તેઓ બીજી વખત ધારાસભ્ય બન્યા હતા. મોહન યાદવની રાજકીય કારકિર્દી તે સમયે વધારે મજબૂત બની જ્યારે તેમણે 2 જુલાઇ 2020માં શિવરાજ સિંહ ચૌહાણ સરકારમાં કેબિનેટ મંત્રી તરીકે શપથ લીધા હતા.
મોહન યાદવનો જન્મ 25 માર્ચ 1965ના દિવસે ઉજ્જૈનમાં થયો હતો. મોહન યાદવ છેલ્લા ઘણા વર્ષોથી ભાજપ સાથે જોડાયેલા હતા. પોતાની રાજકીય કારકિર્દીની સાથે સાથે મોહન યાદવ મધ્ય પ્રદેશના ઉદ્યોગપતિ તરીકે પણ જાણીતા છે. મધ્ય પ્રદેશ વિધાનસભા ચૂંટણી 2023માં મોહન યાદવ 13000 વોટ સાથે જીત મેળવી હતી.
તેમના પિતા પૂનમચંદ યાદવ ખેડૂત હતા. તેમના પત્ની સીમા યાદવ છે અને તેમને 2 દીકરા અને એક દીકરી છે. મોહન યાદવ ડૉક્ટરેટની ડિગ્રી ધરાવે છે. સાથે સાથે તેમણે BSC, LLB, MA, MBA and PhD ની ડિગ્રીઓ ધરાવે છે.
