મોરબીનો યુવાન બન્યો ચાર્ટર્ડ એકાઉન્ટન્ટ : ગૌતમ મહેતાએ પ્રથમ પ્રયાસે CA બની ઇતિહાસ રચ્યો
માત્ર ૨૧ વર્ષની ઉંમરે મેળવી અભૂતપૂર્વ સફળતા : સમાજ અને સમગ્ર સૌરાષ્ટ્ર પંથકમાં ખુશીનો માહોલ
અગ્ર ગુજરાત, રાજકોટ
મોરબીના પ્રતિભાશાળી યુવાન ગૌતમ અક્ષયકુમાર મહેતાએ માત્ર 21 વર્ષની ઉંમરે ચાર્ટર્ડ એકાઉન્ટન્સી (CA)ની તમામ પરીક્ષાઓ પ્રથમ પ્રયાસમાં સફળતાપૂર્વક પાસ કરીને એક ગૌરવપૂર્ણ સિદ્ધિ હાંસલ કરી છે. દેશની સૌથી પ્રતિષ્ઠિત અને પડકારજનક વ્યાવસાયિક પરીક્ષાઓમાં ગણાતી CA પરીક્ષાના દરેક તબક્કામાં પ્રથમ જ પ્રયાસમાં સફળતા મેળવી તેમણે પોતાની અસાધારણ પ્રતિભા, અથાગ પરિશ્રમ અને દૃઢ સંકલ્પનો પરિચય આપ્યો છે.
ગૌતમ અક્ષયકુમાર મહેતાએ CA ફાઉન્ડેશન, CA ઇન્ટરમીડિયેટ તથા CA ફાઇનલ – ત્રણેય પરીક્ષાઓ પ્રથમ પ્રયાસમાં પાસ કરીને પોતાના પરિવાર, મોરબી શહેર, સમગ્ર સૌરાષ્ટ્ર અને જૈન સમાજનું નામ ગૌરવભેર રોશન કર્યું છે. તેમની આ અદ્વિતીય સિદ્ધિથી પરિવારજનોમાં હર્ષની લાગણી વ્યાપી છે અને સમગ્ર વિસ્તારમાં ગૌરવનો માહોલ સર્જાયો છે. તેમની આ સફળતા યુવા પેઢી માટે પ્રેરણારૂપ બની છે અને સાબિત કરે છે કે સમર્પણ, શિસ્તબદ્ધ અભ્યાસ અને અવિરત મહેનત દ્વારા કોઈપણ લક્ષ્ય પ્રાપ્ત કરી શકાય છે.
