ગોંડલ રોડ ડી માર્ટ પાસે તેજ એલઈડી લાઈટે લીધો યુવાનનો જીવ
ગેરેજ બંધ કરી ઘરે જતાં યુવાનનું તેજ લાઈટના કારણે બાઇક થાંભલા સાથે અથડાયું
અગ્ર ગુજરાત, રાજકોટ
વાહનોમાં વધુ તેજ પ્રકાશ આપતી વ્હાઇટ એલઈડી લાઈટ ફિટ કરાવવાનો વધતો ક્રેઝ હવે માર્ગ પર ચાલતા અન્ય વાહનચાલકો માટે જોખમ બની રહ્યો છે. રાજકોટના ગોંડલ રોડ પર આવી જ એક ઘટનામાં 26 વર્ષીય યુવાને જીવ ગુમાવ્યો છે. સામેથી આવી રહેલા વાહનની અત્યંત તેજ એલઈડી લાઈટના પ્રકાશથી બાઈકચાલકની આંખો અંજાઈ જતાં તેણે સ્ટિયરિંગ પરથી કાબૂ ગુમાવ્યો હતો અને બાઈક સીધું થાંભલા સાથે અથડાયું હતું. ગંભીર રીતે ઘવાયેલા યુવાનનું સારવાર દરમિયાન મોત નીપજતાં પરિવારમાં શોકનું મોજું ફરી વળ્યું છે.
બનાવની વિગતો મુજબ મવડીના નવલનગર શેરી નંબર-1માં રહેતો પ્રિયેશ વિપુલભાઈ ગજ્જર (ઉં.વ.26) ઢેબર રોડ પર ગુરુકુળ પાસે ‘ગજ્જર મોટર્સ’ નામે ગેરેજ ચલાવતો હતો. ગઈકાલે રાત્રે આશરે આઠ વાગ્યે ગેરેજનું કામકાજ પૂર્ણ કરી બાઈક પર ઘરે જવા નીકળ્યો હતો. દરમિયાન ગોંડલ રોડ પર ડી-માર્ટ નજીક બ્રિજ પરથી નીચે ઉતરતી વખતે સામેથી આવી રહેલા વાહનની વ્હાઇટ એલઈડી લાઈટનો અસહ્ય પ્રકાશ સીધો આંખમાં પડતાં પ્રિયેશ અંજાઈ ગયો હતો. પરિણામે બાઈક પરનો કાબૂ ગુમાવતાં તેનું બાઈક થાંભલા સાથે ધડાકાભેર અથડાયું હતું. અકસ્માતમાં પ્રિયેશને ગંભીર ઈજાઓ થતાં રસ્તા પરથી પસાર થતા વાહનચાલકો અને રાહદારીઓએ તાત્કાલિક 108 એમ્બ્યુલન્સને જાણ કરી હતી. બેભાન હાલતમાં તેને રાજકોટ સિવિલ હોસ્પિટલમાં ખસેડવામાં આવ્યો હતો. અકસ્માતની જાણ થતાં પરિવારજનો પણ હોસ્પિટલ દોડી આવ્યા હતા. તબીબોની સારવાર છતાં રાત્રિના આશરે 2:30 વાગ્યે પ્રિયેશે અંતિમ શ્વાસ લીધા હતા.
સિવિલ હોસ્પિટલ પોલીસ ચોકી મારફતે જાણ થતાં માલવિયાનગર પોલીસ હોસ્પિટલ પહોંચી હતી અને જરૂરી કાર્યવાહી હાથ ધરી મૃતદેહને પોસ્ટમોર્ટમ માટે ખસેડ્યો હતો. પરિવારજનોના જણાવ્યા મુજબ પ્રિયેશ એક ભાઈ અને એક બહેનમાં મોટો હતો તથા હજુ કુંવારો હતો. પરિવારનો આશાસ્પદ પુત્ર અને બહેનનો એકનો એક ભાઈ અકસ્માતમાં છીનવાઈ જતાં ગજ્જર પરિવારમાં કલ્પાંત છવાયો હતો.
વાહનોમાં નિયમો વિરુદ્ધ વધુ તીવ્ર પ્રકાશ આપતી એલઈડી લાઈટો લગાવવાના વધતા ચલણ સામે આ ઘટના ગંભીર સવાલ ઊભા કરે છે. સામેથી આવતા વાહનની લાઈટથી ક્ષણભર માટે પણ દૃષ્ટિ અંજાઈ જાય તો વાહનચાલક માટે વાહન પરનો કાબૂ જાળવવો મુશ્કેલ બની શકે છે. આવા જોખમી પ્રકાશ સામે ટ્રાફિક તંત્ર દ્વારા કડક કાર્યવાહી કરવાની જરૂરિયાત પણ આ દુર્ઘટનાએ ફરી ઉજાગર કરી છે.


