ચેમ્પિયન્સ ટ્રોફી પાકિસ્તાનમાં રમાઈ રહી છે. ન્યુઝીલેન્ડ અને ભારત સામે કારમી હાર બાદ યજમાન ટીમ પાકિસ્તાન ટુર્નામેન્ટમાંથી જ બહાર થઈ ગઈ છે. એક તરફ, દેશ ક્રિકેટથી નિરાશ થયો છે. ત્યારે બીજી તરફ આર્થિક મોરચે પણ પાકિસ્તાન માટે ખરાબ સમાચાર સામે આવ્યા છે. આ સમાચાર દેશની કર ખાધ સાથે સંબંધિત છે. છેલ્લા આઠ મહિનામાં પાકિસ્તાનને 606 અબજ રૂપિયાનું નુકસાન થયું છે.
દેશમાં સતત વધી રહી છે મોંઘવારી
પાકિસ્તાન તેની અર્થવ્યવસ્થાને કારણે મુશ્કેલીમાં રહે છે. દેશમાં મોંઘવારી સતત વધી રહી છે. આ દરમિયાન પાકિસ્તાન માટે ટેક્સ ખાધ સંબંધિત એક સમાચાર આવ્યા છે. મીડિયા રિપોર્ટ્સ મુજબ આ નાણાકીય વર્ષના પ્રથમ 8 મહિનામાં પાકિસ્તાનની કર ખાધ વધીને 606 અબજ રૂપિયા થઈ ગઈ છે. આનાથી આંતરરાષ્ટ્રીય નાણાકીય ભંડોળ (IMF) સાથે કરવામાં આવેલી પ્રતિબદ્ધતાઓનું ઉલ્લંઘન કરવા માટે અધિકારીઓ પર દબાણ વધી રહ્યું છે.
રૂપિયા 606 બિલિયનની મોટી ખાધનો સામનો કરવો પડ્યો
દેશની આર્થિક સ્થિતિને પાટા પર લાવવા માટે IMFએ 7 બિલિયન યુએસ ડોલરની લોન આપી હતી, પરંતુ લોન વસૂલવા માટે ઘણી શરતો નક્કી કરવામાં આવી હતી. પાકિસ્તાનના ફેડરલ બોર્ડ ઓફ રેવન્યુ (FBR)ને જુલાઈ-ફેબ્રુઆરીના ₹7.95 ટ્રિલિયનના લક્ષ્યાંક સામે ₹606 બિલિયનની મોટી ખાધનો સામનો કરવો પડ્યો છે. જોકે, FBRએ ગયા વર્ષ કરતાં ₹1.65 ટ્રિલિયન વધુ વસૂલ્યા છે, જે પ્રથમ ક્વાર્ટરમાં 1 ટકાથી ઓછા દરે વૃદ્ધિ પામેલા અર્થતંત્રમાં એક નોંધપાત્ર સિદ્ધિ છે.
પાકિસ્તાનના અર્થતંત્રને પાટા પર આવતા થોડો સમય લાગશે
વિશ્વ બેન્કે જાહેરાત કરી છે કે પાકિસ્તાનમાં આર્થિક સ્થિરતા વધી રહી છે. નાણા મંત્રાલયના માસિક આઉટલુક રિપોર્ટ મુજબ ફેબ્રુઆરીમાં પાકિસ્તાનનો ગ્રાહક ફુગાવો સ્થિર રહેવાની અને પાછલા વર્ષની સરખામણીમાં સતત ઘટવાની આશા છે. જાન્યુઆરીમાં ગ્રાહક ભાવ સૂચકાંક (CPI) 2.4 ટકા નોંધાતા ફુગાવામાં ઘટાડો થયો છે. આનો સ્પષ્ટ અર્થ એ છે કે પાકિસ્તાનમાં હવે પરિસ્થિતિ થોડી સુધરી છે. પરંતુ હજુ પણ દેશની સ્થિતિ સંપૂર્ણપણે ઠીક નથી. અર્થતંત્રને પાટા પર આવવામાં સમય લાગશે.
