- ભાજપના કાર્યકર્તાઓએ સોસાયટીમાં પ્રવેશ કરતા થઈ બબાલ
- મિલેટ્રી સોસાયટીમાં પ્રવેશબંધીના લગાવવામાં આવ્યા હતા બેનર
- સ્થાનિક પોલીસે ઘટનાસ્થળે પહોંચીને સમગ્ર મામલો શાંત પાડ્યો
ભાજપના લોકસભાના ઉમેદવાર પરસોત્તમ રૂપાલા દ્વારા ક્ષત્રિય સમાજને લઈને આપવામાં આવેલ નિવેદન બાદ શરૂ થયેલ વિવાદ હજુ શાંત થવાનું નામ નથી લઈ રહ્યો. ત્યારે, રૂપાલાના વિરોધમાં ભાવનગરમાં ભાજપના કાર્યકરો અને ક્ષત્રિય સમાજના કેટલાંક યુવકો વચ્ચે ઘર્ષણ થયું હતું.
મળતી માહિતી મુજબ, ભાવનગર શહેરમાં ભાજપના કાર્યકરો અને ક્ષત્રિય સમાજના યુવકો વચ્ચે શાબ્દિક ઘર્ષણ થયાના અહેવાલો મળી રહ્યા છે. વાત જાણે એમ છે કે, ભાવનગરની મિલેટ્રી સોસાયટીમાં રૂપાલાનો વિરોધ કરતાં ભાજપ વિરોધી બેનરો લગાવવામાં આવ્યા હતા. ભાજપ વિરોધી બેનરો લગાવવામાં આવ્યા હોવા છતાં ભાજપના કાર્યકરો સોસાયટીમાં પ્રચાર માટે પહોંચી ગયા હતા. ભાજપના કાર્યકરોને સોસાયટીમાં પ્રવેશતા જોઈને સોસાયટીના ક્ષત્રિય સમાજના યુવાનોએ ભાજપના કાર્યકારોનો વિરોધ કર્યો હતો અને તેમને સોસાયટીમાં પ્રવેશતા અટકાવ્યા હતા.
ભાજપના કાર્યકરોને સોસાયટીમાં પ્રવેશતા અટકાવવામાં આવતા કાર્યકરો અને સોસાયટીના ક્ષત્રિય યુવાનો વચ્ચે શાબ્દિક સંઘર્ષ શરૂ થઈ ગયો હતો. સ્થાનિક ક્ષત્રિય યુવાનોએ ભાજપના મહાનગરપાલિકાના પૂર્વ ડેપ્યુટી મેયર સહિતના કાર્યકરોને પ્રચાર કરતાં અટકાવ્યા હતા. સાથે સાથે, ભાજપના કાર્યકરોને જોઈને ક્ષત્રિય સમાજના યુવકોએ આમ આદમી પાર્ટી જીંદાબાદના નારા પણ લગાવ્યા હતા.
સમગ્ર ઘટનાની જાણ બોરતળાવ પોલીસ મથક ખાતે થતાં પોલીસ તુરંત ઘટનાસ્થળે દોડી આવી હતી અને મામલો થાળે પાડવા માટે પ્રયાસો કર્યા હતા. પોલીસે ઘટનાસ્થળે દોડી આવીને ક્ષત્રિય સમાજના યુવાનોની અટકાયત કરીને બોરતળાવ પોલીસ મથક ખાતે લઈ આવી હતી. સમગ્ર મામલો પોલીસના પ્રયાસો બાદ થાળે પાડવામાં આવ્યો છે.
