વડોદરા ગેસ લિમિટેડનો પાંચ મહિનામાં બીજો ઝટકો
PNGમાં ૧.૫૦ અને CNGમાં રૂ.૧નો વધારો
ભાવ વધારાની અમલવારી કરવા છતાં કંપની દ્વારા સત્તાવાર જાહેરાત ન કરી, અપડેટ ભાવનું લિસ્ટ વેબસાઇટ પર મૂકતા ગ્રાહકોને જાણ થઇ : અધધ ભાવ વધારાથી ગ્રાહકોમાં ભારે રોષ, વપરાશકર્તાઓ દ્વારા વિરોધ
અગ્ર ગુજરાત, વડોદરા
વડોદરા શહેરના અંદાજે 3 લાખથી વધુ ગેસ ગ્રાહકો માટે મોંઘવારીના માઠા સમાચાર સામે આવ્યા છે. વડોદરા ગેસ લિમિટેડ (VGL) દ્વારા પાઇપલાઇન ગેસ (PNG) અને વાહનોમાં વપરાતા CNGના ભાવમાં ધરખમ વધારો કરવામાં આવ્યો છે. ખાસ વાત એ છે કે, છેલ્લા પાંચ મહિનામાં કંપની દ્વારા આ બીજી વખત ભાવ વધારો ઝીંકવામાં આવ્યો છે, જેના કારણે સામાન્ય જનતાના ઘરગથ્થુ બજેટ અને પરિવહન ખર્ચમાં નોંધપાત્ર વધારો થયો છે.
આ ભાવ વધારો 1 મેથી અમલમાં આવી ગયો હોવાનું જણાય છે, જોકે આશ્ચર્યજનક રીતે કંપનીએ આ અંગે કોઈ સત્તાવાર જાહેર જાહેરાત કરી નથી. ગ્રાહકોને આ વધારાની જાણ ત્યારે થઈ જ્યારે અપડેટ કરેલા ભાવ કંપનીની વેબસાઇટ પર જોવા મળ્યા.
ઇંધણના ભાવમાં આ વધારો એવા સમયે થયો છે જ્યારે આંતરરાષ્ટ્રીય સ્તરે ભૌગોલિક-રાજકીય તણાવ ચરમસીમા પર છે. યુનાઇટેડ સ્ટેટ્સ, ઇઝરાયલ અને ઇરાન વચ્ચે વધતા તણાવને કારણે વૈશ્વિક તેલ અને ગેસ બજારોમાં ભારે અસ્થિરતા જોવા મળી રહી છે. સૂત્રોના જણાવ્યા અનુસાર, કુદરતી ગેસ મેળવવાના ખર્ચમાં થયેલો વધારો અને આંતરરાષ્ટ્રીય બજારમાં પુરવઠાની અનિશ્ચિતતાને કારણે ગેસ વિતરણ કંપનીઓ પર આર્થિક દબાણ વધ્યું છે, જેનો બોજ આખરે ગ્રાહકો પર નાખવામાં આવ્યો છે.
આ અગાઉ જાન્યુઆરી 2026માં પણ VGL દ્વારા ભાવમાં વધારો કરવામાં આવ્યો હતો. તે સમયે PNGના ભાવમાં પ્રતિ ઘન મીટર 73 પૈસાનો વધારો કરીને ભાવ 50.23 કરવામાં આવ્યો હતો, જ્યારે CNGમાં 1નો વધારો કરીને ભાવ 82.95 કરાયો હતો. આમ, ટૂંકા ગાળામાં વારંવાર થતા ભાવ વધારાથી ગ્રાહકોમાં રોષ જોવા મળી રહ્યો છે.
VGL દ્વારા જાહેર કરવામાં આવેલા સુધારેલા દરો
- PNG (પાઇપલાઇન ગેસ): ઘરગથ્થુ વપરાશ માટેના PNGના ભાવમાં પ્રતિ ઘન મીટર ₹1.50નો વધારો કરવામાં આવ્યો છે. આ વધારા સાથે હવે નવો દર ₹51.74 પ્રતિ ઘન મીટર પર પહોંચી ગયો છે.
- CNG (કોમ્પ્રેસ્ડ નેચરલ ગેસ): વાહનચાલકો માટે CNGના ભાવમાં પ્રતિ કિલોગ્રામ ₹1નો વધારો કરાયો છે. આ સાથે જ વડોદરામાં CNGનો નવો ભાવ ₹83.95 પ્રતિ કિલો થઈ ગયો છે.
ભાવ વધારાની અસર વિવિધ વર્ગો પર પડશે
- 1) ગૃહિણીઓ: PNGના ભાવ વધતા મધ્યમ અને ગરીબ પરિવારોના રસોડાના બજેટમાં આર્થિક ભારણ વધશે.
- 2) ઓટો-રિક્ષા અને કેબ ચાલકો: વડોદરામાં મોટી સંખ્યામાં જાહેર પરિવહન CNG પર આધારિત છે. પ્રતિ કિલો ₹1નો વધારો રિક્ષા ચાલકોની દૈનિક કમાણી પર અસર કરશે.
- 3) નાના વ્યવસાયો: 1 મેના રોજ વાણિજ્યિક LPG સિલિન્ડર (19 કિલો) ના ભાવમાં પણ 993નો જંગી વધારો થયો હતો. આના કારણે હોટલ, રેસ્ટોરન્ટ, ચાના સ્ટોલ અને કેટરિંગ વ્યવસાય સાથે સંકળાયેલા લોકોની મુશ્કેલીઓ વધી છે.
