રાજકોટ સિટી પોલીસ અને RDCAના સહયોગથી યુવા ચેસ પ્રતિભાઓને મળ્યું મજબૂત મંચ
ઓપન ગુજરાત રેપિડ ચેસ ચેમ્પિયનશિપમાં ગુજરાતભરના ૧૪૩ ખેલાડીઓની કાબેલિયત ઝળકી
અગ્ર ગુજરાત, રાજકોટ
રાજકોટ સિટી પોલીસ અને રાજકોટ ડિસ્ટ્રિક્ટ ચેસ એસોસિએશન (RDCA) તથા એહસાસ ટ્રસ્ટના સંયુક્ત ઉપક્રમે મુખ્ય સ્પોન્સર ઓમ્નિટેક એંન્જીનિયરિંગ લિમિટેડના CMD ઉદયભાઈ પારેખ, કો સ્પોન્સર આર.કે. જૈન ફાઉન્ડેશન તેમજ AVR (વિક્રમ) વાલ્વસ પ્રા.લી.ના ચેરમેન વિક્રમભાઈ જૈનના આર્થીક સહયોગથી પોલીસ હેડક્વાર્ટર, રાજકોટ ખાતે તાજેતરમાં ઓપન ગુજરાત રેપિડ ચેસ ચેમ્પિયનશિપ-૨૦૨૬ નું સફળ આયોજન કરવામાં આવ્યું હતું. આ સ્પર્ધા ખાસ કરીને અંડર-૧૩, અંડર-૧૫ અને અંડર-૧૭ કેટેગરીના ખેલાડીઓ માટે યોજાઈ હતી, જેમાં ગુજરાતના વિવિધ શહેરોમાંથી કુલ ૧૪૩ યુવા ખેલાડીઓએ ઉત્સાહપૂર્વક ભાગ લીધો હતો.
આ ચેમ્પિયનશિપમાં અંડર-૧૩ કેટેગરીમાં ૯૬ ખેલાડીઓ, અંડર-૧૫ કેટેગરીમાં ૩૦ ખેલાડીઓ અને અંડર-૧૭ કેટેગરીમાં ૧૭ ખેલાડીઓએ ભાગ લીધો હતો. અમદાવાદ, વડોદરા, જામનગર, સુરેન્દ્રનગર, જૂનાગઢ, મોરબી, ભૂજ સહિત ગુજરાતના વિવિધ શહેરોમાંથી ખેલાડીઓ સ્પર્ધામાં જોડાયા હતા. નોંધપાત્ર બાબત એ છે કે કુલ ખેલાડીઓમાંથી આશરે ૫૦ ટકા ખેલાડીઓ રેટેડ હતા. સ્પર્ધા કુલ ૭ રાઉન્ડમાં યોજાઈ હતી. આ કાર્યક્રમમાં ઓમ્નિટેક એંન્જીનિયરિંગ લિમિટેડના CMD ઉદયભાઈ પારેખ તેમજ પોલીસ હેડક્વાર્ટરના ACP પઠાણ, ASI અનિલભાઈ દવે(સ્પોર્ટ્સ ઓફીસર) ખાસ ઉપસ્થિત રહ્યા હતા. સ્પર્ધામાં જીતનાર ખેલાડીઓને કુલ રૂ. ૧,૨૨,૦૦૦ ના રોકડ ઈનામો આપવામાં આવ્યા હતા. આ સાથે વિજેતા ખેલાડીઓને કુલ ૩૦ ટ્રોફી અને મેડલ એનાયત કરવામાં આવ્યા હતા. તમામ ભાગ લેનાર ખેલાડીઓને ભાગીદારી પ્રમાણપત્ર આપીને પ્રોત્સાહિત કરવામાં આવ્યા હતા.
આ સ્પર્ધાના પરિણામોમાં અંડર-૧૩ કેટેગરીમાં કિયાન કેવલકુમાર પટેલ પ્રથમ, શ્લોક પ્રશાંતભાઈ વ્યાસ દ્વિતીય અને કેવિશ ખન્ના તૃતીય સ્થાને રહ્યા હતા. અંડર-૧૫ કેટેગરીમાં હેરિન રેનિશકુમાર પટેલ પ્રથમ, માધવ જયદીપભાઈ વોરા દ્વિતીય અને શ્રેયાંશ મહેતા તૃતીય સ્થાને રહ્યા હતા. જ્યારે અંડર-૧૭ કેટેગરીમાં તન્ના ક્રિશ અલ્પેશભાઈ પ્રથમ, સોહમ હરિયાણી દ્વિતીય અને કાવ્યા શાહ તૃતીય સ્થાને વિજયી રહ્યા હતા. રાજકોટ જિલ્લા ચેસ એસોસિએશનના ઓર્ગેનાઈઝિંગ ટ્રસ્ટી પરિન પટેલે(CA)એ જણાવ્યું હતું કે, રાજકોટ સિટી પોલીસના સહયોગથી યુવા ખેલાડીઓને પ્રોત્સાહન, માર્ગદર્શન અને સ્પર્ધાત્મક માહોલ મળી રહ્યો છે. આવી પહેલથી બાળકોમાં રમતગમતની ભાવના, શિસ્ત, એકાગ્રતા, શારીરિક-માનસિક તંદુરસ્તી અને ટીમ સ્પિરિટનો વિકાસ થાય છે.
રાજકોટ જિલ્લા ચેસ એસોસિએશને આ તકે રાજકોટ સિટી પોલીસ, કોચ, ખેલાડીઓ, વાલીઓ અને તમામ સહયોગીઓનો આભાર વ્યક્ત કર્યો હતો અને ભવિષ્યમાં પણ આવા રમતગમતલક્ષી કાર્યક્રમો દ્વારા ચેસને વધુ પ્રોત્સાહન આપવાની પ્રતિબદ્ધતા વ્યક્ત કરી હતી. આ ટુર્નામેન્ટના આયોજન માટે RDCA ના પરિનભાઇ, નિશ્ચલ સંઘવી, પંચમીયા તેમજ એહસાસ ટ્રસ્ટ ના કૂ. કિન્નરીબેન દ્વારા જહેમત ઉઠાવવામાં આવી હતી. આ સમગ્ર ટુર્નામેંટનું સફળ સંચાલન હર્ષદભાઈ ડોડીયા, જશરાજભાઈ, મિતેશભાઈએ કરેલ અને આર્બિટર તરીકે જયભાઇ ડોડીયાએ સેવા આપેલ હતી.
અત્રે ઉલ્લેખનિય છે કે તા.૫ જુલાઈ, રવિવારના રોજ પોલીસ હેડક્વાર્ટર હોલ(એસી), રેસકોર્સ રિંગ રોડ, રાજકોટ ખાતે રાજકોટ જિલ્લા કક્ષાએ અંડર-૧૩ ચેસ ખેલાડીઓની પસંદગી સ્પર્ધા યોજાશે. આ સ્પર્ધા માત્ર રાજકોટ જિલ્લાના ખેલાડીઓ ભાગ લેશે. સ્પર્ધાની વિશેષતા એ છે કે જિલ્લા કક્ષાએ પસંદગી પામેલા ટોચના બે છોકરાઓ અને છોકરીઓને આગામી સમયમાં યોજાનાર રાજ્ય કક્ષાની ચેસ સ્પર્ધામાં રાજકોટ જિલ્લાનું પ્રતિનિધિત્વ કરવાની તક આપવામાં આવશે.
વિશેષ નોંધ આ ટુર્નામેન્ટમાં ભાગ લેનાર દરેક ખેલાડીઓ તેમજ સાથે આવેલ વાલીઓ માટે ઓમ્નીટેક એન્જિનિયરિંગ લિમિટેડના CMD ઉદયભાઈ પારેખ તરફથી બપોરે વિનામુલ્યે સ્વરુચી ભોજનની વ્યવસ્થા પોલીસ હેડક્વાર્ટર, રેસકોર્સ ખાતે કરવામાં આવેલ છે. દરેકે પોતાના ફૂડ કૂપન સવારે રમત ચાલું થતાં પહેલા સંચાલક મિતેશભાઈ-૯૪૨૮૨ ૫૧૦૦૦ પાસેથી મેળવી લેવા વિનંતી છે.
