રાજકોટ ગ્રામ્યના 1.78 કરોડના સાયબર કૌભાંડમાં 9 એકાઉન્ટધારકોને દબોચી લેતી પોલીસ
‘ઓપરેશન મ્યુઅલ હન્ટ 2.0’ હેઠળ કાર્યવાહી તેજ; 50 ફરિયાદો છતાં રકમની વસૂલાત બાકી, માસ્ટરમાઈન્ડ હજુ પોલીસ પકડથી દૂર
અગ્ર ગુજરાત, રાજકોટ
ગુજરાતમાં વધી રહેલા સાયબર ગુનાઓ સામે રાજ્યવ્યાપી ચલાવવામાં આવી રહેલા ‘ઓપરેશન મ્યુઅલ હન્ટ 2.0’ અંતર્ગત રાજકોટ ગ્રામ્ય પોલીસે મહત્વપૂર્ણ સફળતા મેળવી છે. વિવિધ સાયબર ફ્રોડ કેસોમાં ઉપયોગમાં લેવાયેલા બેંક ખાતાઓના આધારે 16 શંકાસ્પદ એકાઉન્ટધારકો સામે કાર્યવાહી હાથ ધરાઈ હતી, જેમાંથી 9 આરોપીઓને ઝડપી લેવામાં આવ્યા છે. જોકે, રૂ.1.78 કરોડથી વધુની છેતરપિંડીની રકમ હજુ સુધી ભોગ બનનારાઓને પરત મળી નથી અને સમગ્ર કૌભાંડના સૂત્રધાર સુધી તપાસ એજન્સીઓ પહોંચી શકી નથી.
રાજકોટ ગ્રામ્ય પોલીસ વડા વિજયસિંહ ગુર્જરે જણાવ્યું હતું કે જિલ્લાના અલગ-અલગ પોલીસ મથકોમાં નોંધાયેલા આઠ ગુનાઓમાં કુલ 50 ફરિયાદો 1930 હેલ્પલાઈન પર નોંધાઈ હતી. તપાસમાં બહાર આવ્યું છે કે આરોપીઓ પોતાના બેંક ખાતાઓ ભાડે આપતા હતા અને તે ખાતાઓ મારફતે સાયબર ઠગાઈની રકમની લેવડદેવડ થતી હતી.
પોલીસે નાગરિકોને ચેતવણી આપતાં જણાવ્યું છે કે કોઈપણ વ્યક્તિએ પોતાના બેંક ખાતા, GST વ્યવહાર અથવા અન્ય નાણાકીય પ્રવૃત્તિના બહાને અન્યને ઉપયોગ માટે ન આપવા જોઈએ. કારણ કે ગુનાની સ્થિતિમાં સૌથી પહેલા ખાતાધારક જ કાનૂની કાર્યવાહીનો સામનો કરે છે.
તપાસ દરમિયાન સુરત કનેક્શન પણ સામે આવ્યું છે. કેટલાક આરોપીઓને દર મહિને રૂ.5 હજારથી રૂ.10 હજાર સુધીની રકમ ખાતા ભાડે આપવા બદલ મળતી હોવાનું ખુલ્યું છે. હાલ બેંક ટ્રાન્ઝેક્શનની ચકાસણી સહિતની કાર્યવાહી ચાલી રહી છે અને બાકીના સાત આરોપીઓને શોધવા માટે પોલીસની ટીમો કાર્યરત છે. પોલીસના જણાવ્યા મુજબ હાલ જે લોકોની ધરપકડ કરવામાં આવી છે તેઓ માત્ર મ્યુઅલ એકાઉન્ટધારકો છે. કૌભાંડ પાછળ અન્ય સ્તરે કાર્યરત નેટવર્ક અને મુખ્ય સૂત્રધારો હોવાની શક્યતા છે, જેને શોધવા તપાસનો વ્યાપ વધારવામાં આવ્યો છે.
