કચ્છમાં રૂ.૭૦ કરોડનું દેશવ્યાપી સાયબર કૌભાંડ પોલીસે ઝડપી પાડયું

કચ્છમાં રૂ.૭૦ કરોડનું દેશવ્યાપી સાયબર કૌભાંડ પોલીસે ઝડપી પાડયું

ભૂજ અને નખત્રાણાના બે શખ્સની અટકાયત : ૨૭ બેંક પાસબુક, ૧૮ એટીએમ, ૨૧ સિમકાર્ડ, લેપટોપ, સહિતનું શંકાસ્પદ સાહિત્ય જપ્ત કરાયું

અગ્ર ગુજરાત, કચ્છ

કચ્છના ઇતિહાસમાં સાયબર ક્રાઇમનો અત્યાર સુધીનો સૌથી મોટો ખુલાસો થયો છે. કચ્છ સાયબર સેલ અને પશ્ચિમ કચ્છ LCBની ટીમે સંયુક્ત ઓપરેશન હાથ ધરીને દેશભરમાં ફેલાયેલા સાયબર ઠગાઈના નાણાં સગેવગે કરતા એક મસમોટા નેટવર્કને તોડી પાડ્યું છે. આ કૌભાંડમાં પ્રાથમિક તપાસમાં જ 70 કરોડ રૂપિયા જેટલી માતબર રકમની લેવડદેવડ થઈ હોવાનું સામે આવતા સુરક્ષા એજન્સીઓ પણ ચોંકી ઉઠી છે.

આ ટોળકી અત્યંત શાતિર રીતે પોતાનું નેટવર્ક ચલાવતી હતી. આરોપીઓ ગ્રામ્ય કે પછાત વિસ્તારના ભોળા લોકોને નિશાન બનાવતા હતા. તેઓને નજીવા કમિશનની લાલચ આપી તેમના નામે વિવિધ બેંકોમાં ખાતા ખોલાવતા હતા.

આ ખાતાઓને ટેકનિકલ ભાષામાં ‘મ્યુલ એકાઉન્ટ્સ’ કહેવામાં આવે છે. બહારની મોટી સાયબર માફિયા ગેંગ સામાન્ય જનતા સાથે ઠગાઈ કરીને જે નાણાં મેળવતી, તે સીધા આ ભાડે રાખેલા ખાતાઓમાં ટ્રાન્સફર કરવામાં આવતા હતા જેથી પોલીસ પકડથી બચી શકાય.

પોલીસે બાતમીના આધારે દરોડા પાડીને આ કૌભાંડમાં સંડોવાયેલા ભુજ અને નખત્રાણામાં રહેતા બે શખ્સો નિખિલ નાનજી મહેશ્વરી – રહે. રામદેવપીર મંદિરની બાજુમાં, જૂની રાવલવાડી, ભુજ રાજેન્દ્રકુમાર ઊર્ફે રાજા શામજી ગરવા – રહે. ગામ બીબર, તાલુકો નખત્રાણાવાળાની ધરપકડ કરી છે.

જોકે, આ સમગ્ર કૌભાંડનો મુખ્ય સૂત્રધાર ગણાતો ગાંધીધામનો વીરાંગ અખાણી અને ભુજનો દીપક ભાનુશાલી હજુ પણ પોલીસ પકડથી દૂર છે. પોલીસ તેમને ઝડપી લેવા માટે ચક્રો ગતિમાન કર્યા છે.દરોડા દરમિયાન પોલીસને આરોપીઓ પાસેથી 27 બેંક પાસબુક, 18 એટીએમ (ATM) કાર્ડ, 21 એક્ટિવેટેડ સિમકાર્ડ, 1 લેપટોપ અને અન્ય સાહિત્ય કબ્જે કર્યુ છે.

હાલમાં પોલીસ આ નેટવર્ક ક્યાં સુધી ફેલાયેલું છે અને તેમાં અન્ય કેટલા મોટા માથાઓ સામેલ છે તે દિશામાં સઘન તપાસ ચલાવી રહી છે. 70 કરોડનો આ આંકડો તપાસના અંતે હજુ પણ વધવાની શક્યતા છે. પોલીસે કહ્યું છે કે કોઈપણ અજાણ્યા વ્યક્તિના કહેવાથી લાલચમાં આવીને તમારા દસ્તાવેજો પર બેંક ખાતું ખોલાવીને કોઈને વાપરવા આપવું એ ગુનો છે. તમારા નામે ખોલાયેલું ખાતું દેશવિરોધી પ્રવૃત્તિ કે સાયબર ઠગાઈમાં વપરાય તો તમે કાયદાકીય મુશ્કેલીમાં મુકાઈ શકો છો.