સાયલા નજીક ભયાનક વંટોળ, ત્રણ કિ.મી. સુધી ધૂળની ડમરી ઉડી
માલવાહક ટ્રક વંટોળની થપાટથી પલટી ગયો, પેટ્રોલપંપના પતરા ઉડયા, કારના કાચ તૂટયા, ગેસના બાટલાના ગોડાઉનની દિવાલ ધરાશાઇ, ૨૦-3૦ મીટર સુધીની જ વિજીબીલીટી
તીવ્ર ગતિથી વંટોળની સાથે કરા અને વિજળીના કડાકા સાથે વરસાદ ખાબકયો : અનુભવ કરનારમાં ભયનો માહોલ
અગ્ર ગુજરાત, સુરેન્દ્રનગર
ચોમાસાના આગમનની શરૂઆત થઇ છે. સૌરાષ્ટ્રના કેટલાક ભાગમાં વરસાદ પડવાનું શરૂ થઇ ગયું છે ત્યારે ગઇકાલે સાંજે રાજકોટ-અમદાવાદ હાઇ-વે પર સાયલા નજીક ધૂળની ડમરીનો ખોફ સર્જાયો હતો અને ખતરનાક ડમરીમાં ટ્રક પલટી મારી ગયો હતો. તેમજ હોટેલ, દુકાનોના શેડના પતરા ઉડી ગયા હતા અને કેટલાક બાંધકામોને પણ નુકશાન થયું હતું.
આ ડસ્ટ ડેવિલની તીવ્રતા એટલી હતી કે પેટ્રોલપંપ-હોટલને ભારે નુકસાન થયું હતું. ગેસ સિલીન્ડરના ગોડાઉનની દીવાલને ઉખાડી નાખી હતી. 5 હજાર લીટર પાણીની ક્ષમતાવાળી ટાંકીને ઉડાડીને ફેંકી દીધી હતી. 10-20 મીટરથી વધુ આગળનું જોઇ શકાતું નહોતું. ઘડીભર તો એવું લાગતું હતું કે કુદરત કોપાયમાન થઇ છે અને બધું હતું-નહોતું કરી નાખશે.
આ વંટોળ એટલો ભયાવહ હતો કે તેણે સાયલા પાસે ઊભેલી એક ટ્રકને ફંગોળી નાંખી હતી તો કેટલીક કારના કાચને પણ તોડી નાંખ્યાં હતા એટલું જ નહી સાયલા અને તેની આસપાસના 10થી વધુ કિલોમીટરના દાયરામાં ભારે નુકસાન પહોંચાડ્યું હતું. આ આફત અહીંથી અટકી નહોતી. વીજળીના કડાકા ભડાકા અને મોટા-મોટા કરાં સાથે વરસેલા ભારે વરસાદથી લોકોના જીવ પડીકે બંધાયા હતા. આસપાસના ગામડાંઓમાં આ વંટોળની ભારે ચર્ચા છે. આ ઘટનાના અલગ અલગ વીડિયો સમાચારોમાં અને સોશિયલ મીડિયામાં ફરતા થયા છે.
કાર ચાલકે જણાવ્યું હતું કે અહીં કાયદેસરનું વંટોળિયું આવ્યું હતું. આ સમયે હું મારી કાર લઇને મારી હોટલની બહાર પહોંચ્યો હતો ત્યારે મારી આંખની સામેથી જ આ વંટોળિયું પસાર થયું હતું. આ ખૂબ જ ભયાનક દૃશ્યો હતા કેમ કે અમારી બાજુમાં જે પેટ્રોલ પંપ હતો તેના પતરાં પણ ઉડાડી દીધા હતા.
વંટોળની ભયાનકતા વર્ણવતા તેમણે આગળ કહ્યું કે, હું કારમાંથી બહાર આવવાના પ્રયત્ન કરી રહ્યો હતો પણ વંટોળનું જોર એટલું હતું કે કાર સાથે ઉડાડી દે. કંઇ જ દેખાતું જ નહોતું. અમારી હોટલની 10 ફૂટ નજીકથી જ આ પસાર થયું હતું. આ દરમિયાન એક ટ્રકને પણ પલટી નાંખી હતી. અહી જે કાર પાર્ક કરેલી હતી એ પણ 20-20 ફૂટ દૂર ફંગોળાઇ ગઇ હતી. હજી આસપાસના લોકોમાં આ ઘટનાની ચર્ચા છે. જે લોકોએ આ જોયું છે તે તો ભગવાન જ ભાળી ગયા છે સમજો.
થોરિયાળી ગામના રહેવાસી કાનાભાઇ મોરી હાઇવે પર હોટલ ધરાવે છે. તેમણે પોતાની નજર સામે ટ્રકને પલટી ખાતા જોઇ હતી. તેઓ કહે છે કે, આ વંટોળ 15-20 સેકન્ડ સુધી મારી હોટલ પાસેથી પસાર થયું હતું. જેનાથી હોટલને નુકસાન થયું છે. આવા દૃશ્યો જોઇને એ સમયે હોટલમાં જે લોકો હતા તેમણે ભાગવાનો પ્રયાસ કર્યો હતો. અમે તેમને અંદર હોટલમાં મોકલી દીધા હતા.
તેમણે વધુમાં કહ્યું કે,પથ્થર ઉડીને આવતા હતા. અમૂક લોકોને પથ્થર વાગ્યા છે. પેટ્રોલ પંપ પાસે ઊભેલી ટ્રક અમારી નજર સામે પલટી મારી ગઇ હતી. વંટોળ પસાર થયા બાદ અમે ટ્રક પાસે પહોંચ્યા હતા અને ડ્રાઇવરને બચાવીને હોસ્પિટલ લઇ ગયા હતા.
વંટોળના કારણે એક ગેસ એજન્સીની દીવાલ ધરાશાયી થઇ ગઇ હતી અને ભારે નુકસાન પહોંચ્યું હતું. ગેસ એજન્સીમાં કામ કરતાં મનીષ પરમારે દિવ્ય ભાસ્કરને કહ્યું કે, પહેલાં વાવાઝોડું આવ્યું હતું. જેના પછી વીજળીના કડાકા ભડાકા સાથે વરસાદ ચાલુ થયો હતો. અમે અંદર ઓફિસમાં કામ કરતાં હતા. બહાર આવીને જોયું તો વંટોળ હતો. અમને એવું હતું કે થોડીવારમાં બધું શાંત થઇ જશે પણ તેવું ન થયું. એકદમ જોરદાર વરસાદ ચાલુ થઇ ગયો અને મોટા મોટા કરાં પડવા લાગ્યા.
વંટોળના કારણે ધ્રૂજારી અનુભવાઇ હતી અને બધું ધૂળ-ધૂળ થઇ ગયું હતું. આ વાતનો ઉલ્લેખ કરતાં તેઓ કહે છે કે, અમે ઓફિસનો દરવાજો બંધ કરવા જતા હતા પણ વંટોળની તીવ્રતાના કારણે અમે તે બંધ ન કરી શક્યા. ઓફિસમાં અંદર જે કાચ હતા તે ફૂટી ગયા. લોખંડની જાળીઓ તૂટી ગઇ હતી. જાણે માટીનો મેકઅપ કર્યો હોય તેવી અમારી સ્થિતિ થઇ ગઇ હતી. અમે થોડીવાર બેઠા. વરસાદ શાંત પડ્યો પછી ઓફિસનો દરવાજો ખોલીને જોયું તો અમારા ગોડાઉનની દીવાલ પડી ગયેલી હતી. જેને જોઇને અમને આંચકો લાગ્યો હતો. અમારી કારના કાચ તૂટી ગયા હતા. તોતિંગ વૃક્ષ, વીજળીના થાંભલા પડી ગયા હતા.
આ વંટોળ હજુપણ આસપાસના ગામડાંઓમાં ચર્ચાનો વિષય બનેલો છે. તેમણે જણાવ્યું કે, આના વીડિયો જોઇને અન્ય શહેરોમાં રહેતા મારા મિત્રો-સ્વજનોના ફોન આવ્યા હતા. મારા ઘરમાં જે નાના બાળકો છે તે ડરી ગયા હતા. વંટોળ ચડીને વાદળ સાથે અંદર જતો રહ્યો તે અકલ્પનીય હતું. વંટોળ આવ્યો ત્યારે રાજકોટ અમદાવાદ નેશનલ હાઇવે અંદાજે અડધા કલાક સુધી થંભી ગયો હતો. આ વંટોળ 30થી 40 કિલોમીટર દૂરથી દેખાતો હતો.
હવામાનના બદલાતા મિજાજ વચ્ચે સાયલા પંથકમાં આવેલી આ અણધારી આફત માત્ર ભારે આર્થિક નુકસાન જ નથી આપી ગઇ પરંતુ પ્રત્યક્ષદર્શીઓના મનમાં ક્યારેય ન ભૂલાય તેવો ડર પણ છોડી ગઇ છે.
