યુએસ શેરબજારમાં હાહાકાર જોવા મળ્યો છે. ગુરુવારે રાત્રે યુએસ માર્કેટમાં નાસ્ડેક લગભગ 6 ટકા ઘટ્યો હતો, જ્યારે ડાઉ જોન્સ ઇન્ડેક્સમાં 1600 પોઈન્ટ અથવા લગભગ 4 ટકાનો ઘટાડો જોવા મળ્યો હતો. S&P 500 પણ લગભગ 5 ટકા ઘટ્યો. આ પહેલા 16 માર્ચ, 2020ના રોજ એક દિવસમાં આટલો મોટો ઘટાડો આવ્યો હતો. જો કે ભારતીય શેરબજારમાં હજુ આટલો ઘટાડો જોવા મળ્યો નથી.
આજે પણ ભારતીય શેરબજારમાં ઘટાડો
અમેરિકામાં હાહાકાર વચ્ચે ભારતીય બજારમાં બપોરે 2.36 કલાકે 965 પોઇન્ટનો ઘટાડો જોવા મળ્યો છે. સેન્સેક્સ 75,330 અંકે પહોંચ્યો છે જ્યારે નિફ્ટીમાં પણ 369 પોઇન્ટનો ઘટાડો થયો છે. નિફ્ટી ઘટીને 22,880 અંકે આવી ગયો છે. તો બીજી તરફ RIL ના શેરમાં 4 ટકાથી વધુનો ઘટાડો થયો છે. રિલાયન્સ ઇન્ડસ્ટ્રીઝના શેરમાં ઘટાડાનું મુખ્ય કારણ વૈશ્વિક અસર હોવાનું માનવામાં આવે છે. જ્યાં મંદીના જોખમમાં વધારો થયો છે.
ગુરુવારે શેરમાર્કેટની સ્થિતિ
ગુરુવાર, 4 એપ્રિલના રોજ ભારતીય શેરબજારોમાં ભારે વેચવાલી જોવા મળી હતી. સેન્સેક્સ એક દિવસમાં 935 પોઈન્ટ અથવા 1 ટકાથી વધુ ઘટીને 75300ની આસપાસ પહોંચી ગયો છે. નિફ્ટી 50 પણ 335 થી વધુ એટલે કે 1.45% ઘટીને 22,910 પર પહોંચ્યો. આ ઘટાડા માટે ચાર મુખ્ય કારણો ધ્યાનમાં લેવામાં આવી રહ્યા છે.
શું આ છે મંદીના ભયના કારણો ?
વૈશ્વિક વેપાર યુદ્ધનો ભય
ટ્રમ્પના નવા ટેરિફ પછી, ચીન અને કેનેડાએ પણ બદલો લેવાની ધમકી આપી છે. રોકાણકારો આ અંગે ચિંતિત છે. અમેરિકાએ ભારતીય માલ પર 26% અને અન્ય દેશો પર 10% આયાત ડ્યુટી લાદી છે. તેના જવાબમાં, કેનેડાએ અમેરિકન વાહનો પર 25% ટેરિફ લાદ્યો છે. આના કારણે વૈશ્વિક વેપાર યુદ્ધનું સંકટ વધ્યું છે.
વૈશ્વિક બજારમાં ઘટાડો
અમેરિકામાં, S&P 500 ઇન્ડેક્સ 5% અને Nasdaq 5.5% ઘટ્યો, જે 2020 પછીનો સૌથી મોટો ઘટાડો છે. એશિયન બજારોમાં પણ ઘટાડો થયો છે. જાપાનનો નિક્કી ૩% ઘટ્યો હતો, દક્ષિણ કોરિયાનો કોસ્પી ૨% ઘટ્યો હતો.
ક્ષેત્રીય દબાણ
ફાર્મા શેરો, આઇટી શેરો અને ઓટો શેરોમાં ભારે દબાણ જોવા મળી રહ્યું છે. રિલાયન્સના શેરમાં પણ ભારે વેચવાલી ચાલી રહી છે. નિફ્ટી આઇટી ઇન્ડેક્સ 2% ઘટ્યો, કોફોર્જ અને પર્સિસ્ટન્ટ સિસ્ટમ્સ સૌથી વધુ ઘટ્યા. મેટલ શેરોમાં વેચવાલી જોવા મળી.
ફુગાવો વધવાની શક્યતા
અમેરિકામાં મંદીનું સૌથી મોટું જોખમ ફુગાવો છે. ઘણા નિષ્ણાતો આગાહી કરે છે કે અમેરિકામાં ફુગાવો ઝડપથી વધવાનો છે કારણ કે અન્ય દેશોમાંથી આવતા માલ હવે ઊંચા ભાવે ઉપલબ્ધ થશે. આનાથી મોંઘવારી વધશે. ડોલર ઇન્ડેક્સમાં પણ ઘટાડો જોવા મળી રહ્યો છે, જે અમેરિકન અર્થતંત્ર માટે સારો સંકેત નથી.
શું મંદીનું જોખમ વધી રહ્યું છે?
ટ્રમ્પ દ્વારા ટેરિફ લાદવામાં આવ્યા બાદ વૈશ્વિક બજારમાં ફુગાવો વધવાનો ભય વધી ગયો છે, જેના કારણે મંદીનું જોખમ વધી રહ્યું હોય તેવું લાગે છે. ડોઇશ બેંકના વરિષ્ઠ અર્થશાસ્ત્રી બ્રેટ રાયને ન્યૂઝ એજન્સીને જણાવ્યું હતું કે ટ્રમ્પના ટેરિફ આ વર્ષે યુએસ વિકાસ દરમાં 1-1.5 ટકાનો ઘટાડો કરી શકે છે, જે મંદીના જોખમમાં નોંધપાત્ર વધારો કરી શકે છે. જોકે, ભારતમાં હાલમાં આવી કોઈ કટોકટી નથી. ભારતની અર્થવ્યવસ્થા માટે સારા સંકેતો દેખાઈ રહ્યા છે.
