સ્વામિનારાયણ ગુરુકુલ વિદ્યાલય ખાતે વિદ્યાર્થીઓ માટે કંપની સેક્રેટરી કારકિર્દી માર્ગદર્શન સેમિનાર યોજાયો
અગ્ર ગુજરાત, રાજકોટ
આજના સ્પર્ધાત્મક યુગમાં વિદ્યાર્થીઓ પોતાની રુચિ અને ક્ષમતા અનુસાર યોગ્ય કારકિર્દીની પસંદગી કરી શકે તે હેતુથી સ્વામિનારાયણ ગુરુકુલ વિદ્યાલય, ઢેબર રોડ, રાજકોટ ખાતે ધોરણ ૧૧ અને ૧૨ કોમર્સના વિદ્યાર્થીઓ માટે ‘કંપની સેક્રેટરી ક્ષેત્રે કારકિર્દીની તકો’ વિષય પર વિશેષ માર્ગદર્શન સેમિનારનું આયોજન કરવામાં આવ્યું હતું. આ સેમિનારમાં મુખ્ય વક્તા અને નિષ્ણાત તરીકે રાજકુમાર રાઈ, વિવેક મોલીયા અને રાહુલભાઈ ખોખર ઉપસ્થિત રહ્યા હતા. તેમણે વિદ્યાર્થીઓને કંપની સેક્રેટરી કોર્સ, તેની શૈક્ષણિક પ્રક્રિયા અને કોર્પોરેટ ક્ષેત્રમાં ઉપલબ્ધ કારકિર્દીની વિવિધ તકો અંગે વિસ્તૃત માર્ગદર્શન આપ્યું હતું.
નિષ્ણાતોએ જણાવ્યું હતું કે કંપની સેક્રેટરીનું પદ કોર્પોરેટ ક્ષેત્રમાં અત્યંત મહત્ત્વપૂર્ણ અને જવાબદારીપૂર્ણ ગણાય છે. કંપનીના કાયદાકીય પાલન, કોર્પોરેટ ગવર્નન્સ, બોર્ડ મીટિંગ, નાણાકીય નિયમન અને સંચાલન સંબંધિત વિવિધ જવાબદારીઓમાં કંપની સેક્રેટરીની અગત્યની ભૂમિકા હોય છે. સેમિનાર દરમિયાન ઇન્સ્ટિટ્યૂટ ઓફ કંપની સેક્રેટરીઝ ઓફ ઇન્ડિયા દ્વારા લેવાતી CSEET પરીક્ષા, પ્રવેશ પ્રક્રિયા અને કોર્સના માળખા વિશે સરળ ભાષામાં સમજ આપવામાં આવી હતી. કંપની સેક્રેટરી બનવા માટેના CSEET, Executive અને Professional એમ ત્રણેય તબક્કા ઉપરાંત જરૂરી પ્રેક્ટિકલ ટ્રેનિંગ અંગે પણ વિદ્યાર્થીઓને માહિતી આપવામાં આવી હતી.
વક્તાઓએ કોર્પોરેટ લો, કંપની ગવર્નન્સ, ફાઇનાન્સ, ટેક્સેશન અને કાયદાકીય સલાહકાર જેવા ક્ષેત્રોમાં કંપની સેક્રેટરી તરીકે ઉપલબ્ધ કારકિર્દીની તકો અંગે જાણકારી આપી હતી. યોગ્ય આયોજન, સતત મહેનત અને વિષયની ઊંડી સમજ દ્વારા વિદ્યાર્થીઓ આ ક્ષેત્રમાં ઉજ્જવળ કારકિર્દી બનાવી શકે છે તેમ તેમણે જણાવ્યું હતું. માર્ગદર્શન સત્ર બાદ યોજાયેલા પ્રશ્નોત્તરી સેશનમાં વિદ્યાર્થીઓએ કોર્સ, પરીક્ષા, અભ્યાસક્રમ, તાલીમ અને ભવિષ્યની કારકિર્દી સંબંધિત વિવિધ પ્રશ્નો પૂછ્યા હતા. નિષ્ણાતોએ વિદ્યાર્થીઓની શંકાઓનું સરળ અને સંતોષકારક રીતે નિરાકરણ કર્યું હતું.
આ કાર્યક્રમનું આયોજન શાળાના સંચાલક પૂજ્ય જનમંગલદાસજી સ્વામીની પ્રેરણાથી કરવામાં આવ્યું હતું. કાર્યક્રમના અંતે આચાર્ય કિશોરભાઈ દવે, વિભાગીય વડા સંદીપભાઈ રાયમગીયા તથા ઉપસ્થિત શિક્ષકોએ મહેમાનોનો આભાર વ્યક્ત કર્યો હતો.
