સૌરાષ્ટ્રમાં આતંક મચાવતી કુખ્યાત ‘કાળિયા ગેંગ’નો સાગરીત જેતપુરના ખારચીયાથી ઝડપાયો

સૌરાષ્ટ્રમાં આતંક મચાવતી કુખ્યાત ‘કાળિયા ગેંગ’નો સાગરીત જેતપુરના ખારચીયાથી ઝડપાયો

ગુજસીટોક સહિતના ગુનામાં ફરાર આરોપીને દબોચી લેવાયો

અગ્ર ગુજરાત, જેતપુર

રાજકોટ રેન્જ પોલીસ દ્વારા ગુનાખોરી ડામવા માટે હાથ ધરવામાં આવેલા વિશેષ અભિયાન અંતર્ગત એક મોટી સફળતા મળી છે. સમગ્ર સૌરાષ્ટ્ર વિસ્તારમાં મિલકત સંબંધી ગંભીર ગુનાઓ આચરતી અને પોલીસ માટે માથાનો દુખાવો બનેલી કુખ્યાત ‘કાળિયા ગેંગ’ના એક સક્રિય સાગરીતને રાજકોટ રેન્જની ટીમે જેતપુર તાલુકાના ખારચીયા ગામની સીમમાંથી દબોચી લીધો છે.

રાજકોટ રેન્જના નાયબ પોલીસ મહાનિરીક્ષક (DIG) નિર્લિપ્ત રાય (IPS) દ્વારા રેન્જ હેઠળના તમામ જિલ્લાઓમાં નાસતા-ફરતા આરોપીઓને શોધી કાઢી તેમની સામે કડક કાર્યવાહી કરવા માટે ખાસ સૂચનાઓ આપવામાં આવી હતી. આ સૂચનાના અનુસંધાને, રાજકોટ રેન્જના પોલીસ ઇન્સ્પેક્ટર અપૂર્વ પટેલના માર્ગદર્શન હેઠળ એક ખાસ ટીમનું ગઠન કરવામાં આવ્યું હતું.

આ ટીમમાં પોલીસ સબ ઈન્સ્પેક્ટર પી.એન. મોરી, બી.સી. મિયાત્રા, સી.એમ. કાંટેલિયા તથા તેમના સ્ટાફ દ્વારા ટેકનિકલ એનાલિસિસ અને હ્યુમન સોર્સના માધ્યમથી આરોપીઓની સઘન તપાસ હાથ ધરવામાં આવી હતી. આ દરમિયાન દિવ્યેશભાઈ સુવા, શિવરાજસિંહ ઝાલા અને નિકુલભાઈ પંપાણિયાને મળેલી ચોક્કસ બાતમીના આધારે પોલીસે ગોંડલ સિટી બી-ડિવિઝન પોલીસ સ્ટેશનમાં નોંધાયેલા ‘ગુજસીટોક’ (GUJCTOC) જેવા ગંભીર ગુનાના કામે લાંબા સમયથી નાસતા-ફરતા આરોપી ઈનેશ ઉર્ફે યુનુસ ઉર્ફે ડીડી નવલભાઈ વાઘેલા (રહે. વાસાંવડ, તા. ગોંડલ) ને જેતપુરના ખારચીયા ગામ પાસેથી ઝડપી લીધો હતો.

આરોપી ઈનેશ વાઘેલા સામે ‘ધ ગુજરાત કંટ્રોલ ઓફ ટેરરિઝમ એન્ડ ઓર્ગેનાઈઝ્ડ ક્રાઈમ એક્ટ’ (GUJCTOC) ની વિવિધ કલમો હેઠળ ગુનો નોંધાયેલો હતો. હાલમાં આ આરોપીની અટકાયત કરી તેની સામે કાયદેસરની કાર્યવાહી હાથ ધરવામાં આવી છે.