શાપરમાં રાજવીના ઘરમાં હથિયારધારી ટોળકીનો આતંક
રાજવીને કદ કરી રોકડ, દાગીના અને રાયફલ સહિત રૂ.2.49 કરોડની લૂંટ
આજે વહેલી સવારે 77 વર્ષીય જીતેન્દ્રસિંહ જાડેજાને મુક્કો મારી, મોઢે ડૂમો દઈ રૂમમાં પૂરી બુકાનીધારી ટોળકીના 5 લૂંટારૂઓએ ખેલ પાડ્યો
ઘરમાં કરોડોની રોકડ હોવાની ચોક્કસ માહિતી લૂંટારૂઓ સુધી કેવી રીતે પહોંચી? જાણભેદુની સંડોવણીની શંકા
ઘટનાસ્થળ નજીકથી ત્રણ બાઈક ચોરીની કડી પણ સામે આવી : જિલ્લામાં નાકાબંધી, સીસીટીવી અને ડોગ સ્કવોર્ડની મદદથી તપાસ તેજ
અગ્ર ગુજરાત, રાજકોટ
રાજકોટ જિલ્લાના શાપર-વેરાવળ ઔદ્યોગિક વિસ્તારમાં શનિવારની વહેલી સવારે બનેલી એક સનસનીખેજ ઘટનાએ સમગ્ર સૌરાષ્ટ્રને ચોંકાવી દીધું છે. શાપર સ્ટેટના મોભી અને 77 વર્ષીય રાજવી જીતેન્દ્રસિંહ જાડેજાના નિવાસસ્થાને પાંચ બુકાનીધારી લૂંટારૂઓએ ધાડ પાડી તેમને બંધક બનાવી કુલ રૂ.2.49 કરોડની લૂંટ ચલાવી ફરાર થઈ જતાં પોલીસ તંત્ર દોડતું થઈ ગયું છે.
મળતી માહિતી મુજબ, મોડી રાત્રે આશરે 1:30 વાગ્યે લોખંડના પાઈપ સહિતના ઘાતક હથિયારો સાથે પાંચ જેટલા શખ્સો ચોરીના ઈરાદે રાજવીના ઘરમાં ઘૂસ્યા હતા. ઘરમાં અવાજ થતાં જીતેન્દ્રસિંહ જાડેજા જાગી ગયા હતા. વૃદ્ધ રાજવી જાગી જતાં લૂંટારૂઓએ તરત જ તેમને કાબૂમાં લઈ લીધા હતા. મુક્કા મારીને અને મોઢે ડૂમો દઈ હથિયારના જોરે તેમને બંધક બનાવવામાં આવ્યા હતા. ત્યારબાદ એક રૂમમાં પૂરી બહારથી દરવાજો બંધ કરી દેવામાં આવ્યો હતો. ઘરના મોભીને અસહાય બનાવી દીધા બાદ લૂંટારૂઓએ આખા મકાનમાં આતંક મચાવ્યો હતો. તિજોરી અને કબાટના તાળાં તોડી તેઓ રૂ.2.47 કરોડની રોકડ રકમ, અંદાજે રૂ.2 લાખના સોના-ચાંદીના દાગીના, એક રાયફલ અને મોબાઈલ ફોન લઈને ફરાર થઈ ગયા હતા. આટલી મોટી રોકડ ઘરમાં હોવાને લઈને પણ અનેક સવાલો ઊભા થયા છે. પ્રાથમિક તપાસમાં સામે આવ્યું છે કે, પરિવારના પ્લોટિંગ વ્યવસાયના વિવિધ સોદાઓમાંથી મળેલી રોકડ રકમ ઘરમાં રાખવામાં આવી હતી.
લૂંટારૂઓ ફરાર થયા બાદ લગભગ એક કલાક સુધી વૃદ્ધ રાજવી રૂમમાં બંધ રહ્યા હતા. ભારે મથામણ બાદ તેઓ રૂમમાંથી બહાર નીકળવામાં સફળ રહ્યા હતા. જોકે તેમનો મોબાઈલ પણ લૂંટી લેવાયો હોવાથી અન્ય વ્યક્તિના ફોન પરથી પુત્ર જયવીરસિંહ જાડેજાને જાણ કરવામાં આવી હતી.
ઘટનાની જાણ થતાં જ રાજકોટ ગ્રામ્ય પોલીસમાં દોડધામ મચી ગઈ હતી.રેન્જ આઇજી નીલરિપ્ત રાય, રાજકોટ જિલ્લા પોલીસ વડા વિજયસિંહ ગુર્જર સહિતના ઉચ્ચ અધિકારીઓ રાત્રે જ ઘટનાસ્થળે પહોંચી ગયા હતા. શાપર પોલીસ, એલસીબી, એસઓજી, ડોગ સ્કવોર્ડ, એફએસએલ અને ફિંગરપ્રિન્ટ નિષ્ણાતોની ટીમોએ તપાસ હાથ ધરી હતી. સમગ્ર વિસ્તારના સીસીટીવી ફૂટેજ એકત્રિત કરી ગુનેગારોના સગડ મેળવવાના પ્રયાસો શરૂ કરાયા છે.
આ દરમિયાન ઘટનાસ્થળ નજીક આવેલી એક સોસાયટીમાંથી ત્રણ બાઈક ચોરી થયાનું પણ સામે આવ્યું છે. પોલીસને આશંકા છે કે લૂંટારૂઓ આ ચોરાયેલા બાઈકમાં નાસી છૂટ્યા હોઈ શકે છે. તેથી તે દિશામાં પણ તપાસનો ધમધમાટ શરૂ કરવામાં આવ્યો છે.
પોલીસને એવી પણ શંકા છે કે ઘરમાં આટલી મોટી રોકડ હોવાની માહિતી કોઈ જાણભેદુ અથવા નજીકના વ્યક્તિએ લૂંટારૂઓ સુધી પહોંચાડી હોઈ શકે. હાલ જયવીરસિંહ જાડેજાની ફરિયાદના આધારે લૂંટ સહિતની ગંભીર કલમો હેઠળ ગુનો નોંધી પોલીસે ચારે તરફ નાકાબંધી કરી આરોપીઓને ઝડપી પાડવા માટે સઘન તપાસ શરૂ કરી છે.
ઘટનાની મુખ્ય વિગતો
શાપરમાં 2.49 કરોડની લૂંટ
77 વર્ષીય જીતેન્દ્રસિંહ જાડેજાને બનાવ્યા બંધક
5 બુકાનીધારી શખ્સો ઘરમાં ઘૂસ્યા
રૂ.2.47 કરોડ રોકડની લૂંટ
રૂ.2 લાખના દાગીના પણ લઈ ગયા
રાયફલ અને મોબાઈલ પણ ચોરી ગયા
કેવી રીતે આપી ઘટનાને અંજામ?
ફિલ્મી સ્ટાઈલમાં ધાડ
રાત્રે 1:30 વાગ્યે ઘરમાં પ્રવેશ
અવાજ થતાં રાજવી જાગી ગયા
મુક્કા મારી કાબૂમાં લીધા
મોઢે ડૂમો દઈ રૂમમાં પૂર્યા
બાદમાં તિજોરી તોડી લૂંટ ચલાવી
એક કલાક સુધી રહ્યા કેદ
વૃદ્ધ રાજવીની સંઘર્ષગાથા
રૂમમાં બહારથી સાંકળ મારી
લગભગ એક કલાક સુધી બંધ રહ્યા
ભારે મથામણ બાદ બહાર નીકળ્યા
મોબાઈલ ન હોવાથી અન્યના ફોનથી પુત્રને જાણ
શું શું લૂંટાયું? લૂંટની યાદી
રોકડ : રૂ.2.47 કરોડ
દાગીના : રૂ.2 લાખ
રાયફલ : 1
મોબાઈલ ફોન : 1
કુલ મુદ્દામાલ : રૂ.2.49 કરોડ
ત્રણ બાઈક ચોરીની કડી
બાઈકમાં ભાગ્યાની શંકા
નજીકની સોસાયટીમાંથી 3 બાઈક ચોરી
લૂંટ પહેલા કે પછી ચોરી થયાની તપાસ
ચોરાયેલા બાઈકનો ઉપયોગ થયો હોવાની આશંકા
પોલીસે અલગથી તપાસ શરૂ કરી
કોણ છે જીતેન્દ્રસિંહ જાડેજા? રાજવી પરિવારનો વ્યવસાય
શાપર સ્ટેટના મોભી
પેટ્રોલ પંપ વ્યવસાય સાથે સંકળાયેલા
ખેતી ક્ષેત્રે પણ મોટું કામકાજ
પ્લોટિંગ અને રિયલ એસ્ટેટ વ્યવસાય
પુત્ર જયવીરસિંહ પરિવાર સાથે રાજકોટમાં રહે છે
પોલીસનો મેગા ઓપરેશન
ઘટના બાદ તંત્ર દોડતું થયું
એસપી વિજયસિંહ ગુર્જર સ્થળે પહોંચ્યા
એલસીબી, એસઓજીને તપાસ સોંપાઈ
ડોગ સ્કવોર્ડ અને એફએસએલ કાર્યરત
સીસીટીવી ફૂટેજની ચકાસણી
જિલ્લામાં ચારે તરફ નાકાબંધી
પોલીસની શંકા ક્યાં?
જાણભેદુ પર તપાસનો ફોકસ
ઘરમાં કરોડોની રોકડ હોવાની ચોક્કસ માહિતી
અંદરના માણસની સંડોવણીની આશંકા
નજીકના સંપર્કોની પૂછપરછ
આર્થિક વ્યવહારોની ચકાસણી
પોલીસ અનેક દિશામાં તપાસ કરી રહી છે
