ડૉક્ટર બનવાનું સપનું થશે વધુ સરળ
દેશમાં હવે 1.36 લાખથી વધુ MBBS સીટ
NEET-UG ઉમેદવારો માટે મોટા રાહત ; 25 નવી મેડિકલ કોલેજોને મંજૂરી, સરકારીમાં 2,111 અને ખાનગીમાં 7,800 બેઠકોનો વધારો; પરિણામ બાદ ઝડપથી શરૂ થશે કાઉન્સિલિંગ પ્રક્રિયા
અગ્ર ગુજરાત, નવી દિલ્હી
મેડિકલ ક્ષેત્રમાં કારકિર્દી બનાવવાનું સ્વપ્ન જોતા લાખો વિદ્યાર્થીઓ માટે સારા સમાચાર સામે આવ્યા છે. NEET-UG 2026નું પરિણામ જાહેર થવાની રાહ વચ્ચે કેન્દ્ર સરકારે 2026-27ના શૈક્ષણિક સત્ર માટે MBBS બેઠકોમાં નોંધપાત્ર વધારો કર્યો છે. આ વર્ષે દેશભરમાં કુલ 9,911 નવી MBBS બેઠકો ઉમેરાતા કુલ બેઠકોની સંખ્યા 1,27,028માંથી વધીને 1,36,939 થઈ ગઈ છે. પરિણામે હજારો વિદ્યાર્થીઓને મેડિકલમાં પ્રવેશ મેળવવાની વધુ તક મળશે.
આ વખતે સરકાર દ્વારા સરકારી અને ખાનગી બંને મેડિકલ કોલેજોમાં બેઠકો વધારવામાં આવી છે. સરકારી મેડિકલ કોલેજોમાં 2,111 બેઠકો વધીને કુલ 63,296 થઈ છે, જ્યારે ખાનગી મેડિકલ કોલેજોમાં 7,800 બેઠકોનો વધારો થતાં કુલ 73,643 બેઠકો ઉપલબ્ધ રહેશે. આ વધારાથી મેડિકલ શિક્ષણમાં પ્રવેશની તકોમાં નોંધપાત્ર વધારો થયો છે.
સરકારે દેશભરમાં 25 નવી મેડિકલ કોલેજોને મંજૂરી આપી છે. તેમાં 7 નવી સરકારી મેડિકલ કોલેજોમાં 400 બેઠકો અને 18 નવી ખાનગી મેડિકલ કોલેજોમાં 2,000 બેઠકો ઉપલબ્ધ થશે. નવી કોલેજો શરૂ થવાથી ભવિષ્યમાં પણ મેડિકલ શિક્ષણનો વ્યાપ વધુ વિસ્તરશે.
દેશમાં હાલ કુલ 823 મેડિકલ કોલેજો કાર્યરત છે, જેમાં 441 સરકારી અને 382 ખાનગી મેડિકલ કોલેજોનો સમાવેશ થાય છે. છેલ્લા કેટલાક વર્ષોમાં મેડિકલ શિક્ષણના વિસ્તરણને સરકારની પ્રાથમિકતા મળતાં કોલેજોની સંખ્યા સતત વધી રહી છે. વર્ષ 2013-14માં માત્ર 387 મેડિકલ કોલેજો હતી, જે વધીને હવે 823 થઈ ગઈ છે. તેવી જ રીતે MBBS બેઠકોમાં પણ સતત વધારો નોંધાયો છે.
રાજ્યોની દૃષ્ટિએ જોવામાં આવે તો કર્ણાટકમાં સૌથી વધુ 15,395 MBBS બેઠકો ઉપલબ્ધ રહેશે. ત્યારબાદ ઉત્તર પ્રદેશમાં 14,000, તમિલનાડુમાં 13,999, મહારાષ્ટ્રમાં 13,099, તેલંગાણામાં 10,250, આંધ્ર પ્રદેશમાં 7,465, બિહારમાં 4,160 અને દિલ્હીમાં 1,415 બેઠકો રહેશે.
NEET-UG 2026નું પરિણામ આ અઠવાડિયાના અંત સુધી જાહેર થવાની શક્યતા વ્યક્ત કરવામાં આવી રહી છે. પરિણામ જાહેર થયા બાદ થોડા જ દિવસોમાં કાઉન્સિલિંગ પ્રક્રિયા શરૂ કરવામાં આવશે. આ વખતે કાઉન્સિલિંગનો સમયગાળો પણ ટૂંકો રાખવાનો નિર્ણય લેવાયો છે જેથી ઓછા સમયમાં એડમિશન પ્રક્રિયા પૂર્ણ કરી શકાય.
ઉલ્લેખનીય છે કે આ વર્ષે NEET-UG પરીક્ષામાં અંદાજે 20 લાખથી વધુ વિદ્યાર્થીઓ સામેલ થયા હતા. બેઠકોમાં થયેલો વધારો તમામ ઉમેદવારોને પ્રવેશની ખાતરી આપતો નથી, પરંતુ સ્પર્ધાના માહોલમાં હજારો વિદ્યાર્થીઓ માટે આશાનું નવું કિરણ જરૂર સાબિત થશે.
9,911 નવી બેઠકોનો વધારો
કુલ MBBS બેઠકો : 1,36,939
અગાઉની બેઠકો : 1,27,028
વધારો : 9,911 બેઠકો
સરકારી સામે ખાનગી કોલેજો
સરકારી કોલેજોમાં બેઠકો : 63,296
વધારો : 2,111 બેઠકો
ખાનગી કોલેજોમાં બેઠકો : 73,643
વધારો : 7,800 બેઠકો
25 નવી મેડિકલ કોલેજોને મંજૂરી
કુલ નવી કોલેજો : 25
સરકારી : 7 કોલેજ (400 બેઠકો)
ખાનગી : 18 કોલેજ (2,000 બેઠકો)
સૌથી વધુ MBBS બેઠકો ધરાવતા રાજ્ય
કર્ણાટક – 15,395
ઉત્તર પ્રદેશ – 14,000
તમિલનાડુ – 13,999
મહારાષ્ટ્ર – 13,099
તેલંગાણા – 10,250
રિઝલ્ટ બાદ તરત શરૂ થશે કાઉન્સિલિંગ
NEET-UGનું પરિણામ ટૂંક સમયમાં જાહેર થવાની શક્યતા
પરિણામ બાદ થોડા દિવસોમાં કાઉન્સિલિંગ શરૂ થશે
ઓછા સમયમાં એડમિશન પ્રક્રિયા પૂર્ણ કરવાનો નિર્ણય
આ વર્ષે લગભગ 20 લાખ ઉમેદવારોએ NEET-UG પરીક્ષા આપી છે.
