વેરાવળમાં પોલીસે જ મહિલા PSI પાસેથી પાંચ લાખ લીધાનો ગંભીર આક્ષેપ
ગીર સોમનાથમાં જુગાર રેડના તોડકાંડ મામલે રેંજ આઈજીએ બે પીએસઆઈને સસ્પેન્ડ કરતા ખળભળાટ : મહિલા પીએસઆઈએ રેંજ આઈજી સમક્ષ ચોંકાવનારી રજુઆત કરતા તપાસ શરૂ થયેલ
અગ્ર ગુજરાત, રાજકોટ
ગીર સોમનાથ પોલીસમાં ચર્ચાસ્પદ બનેલા હોટલ રોયલ મેન્શન જુગાર રેડ પ્રકરણમાં અચાનક જ મોટો વળાંક આવ્યો છે. જેમાં પ્રભાસ પાટણ પોલીસ સ્ટેશન વિસ્તારની હોટેલ રોયલ મેન્શનમાં 20 જુલાઈની મધરાતે એલસીબીએ પાડેલ જુગારની રેડ બાદ પોલીસ અધિકારીઓ સામે ગંભીર આક્ષેપો ઉઠયા હતા. જે મામલે જૂનાગઢ રેંજ આઈજી રાજેન્દ્રસિંહ ચૂડાસમાએ દાખલારૂપ કાર્યવાહી કરતાં એસઓજી પીએસસાઈ ડી.એમ. કાગડા તથા તત્કાલીન એલસીબી અને હાલ લીવ રિઝર્વમાં ફરજ બજાવતા પીએસઆઈ એચ.એલ. જેબલિયાને તાત્કાલિક અસરથી સસ્પેન્ડ કરી દેતા પોલીસબેડામાં ખળભળાટ મચી ગયો છે.
આ મામલે રેંજ આઈજી રાજેન્દ્રસિંહ ચૂડાસમાએ જણાવ્યું હતું કે હોટલ રોયલ મેન્શન જુગાર રેડ સંદર્ભે કરવામાં આવેલી પ્રાથમિક તપાસમાં બેદરકારી અને ગેરરીતિ સામે આવતા બંન્ને અધિકારીઓને ફરજમુક્ત કરવામાં આવ્યા છે. આ સમગ્ર પ્રકરણની વધુ તપાસ ચાલુ હોવાથી જરૂરી વિભાગીય તેમજ કાયદેસરની કાર્યવાહી હાથ ધરવામાં આવશે.
પોલીસ સૂત્રોમાંથી મળતી માહિતી મુજબ 20 જુલાઈની રાત્રે વેરાવળ હાઇવે પર કાજલી-બાદલપરા વચ્ચે આવેલી હોટેલ રોયલ મેન્શનમાં એલસીબીએ દરોડો પાડી સાત વ્યક્તિઓને તીનપત્તી રમતા ઝડપી પાડ્યા હતા. પોલીસે રૂ. 4.73 લાખનો મુદ્દામાલ કબજે કરી પ્રભાસ પાટણ પોલીસ સ્ટેશનમાં જુગાર અધિનિયમ હેઠળ ગુનો નોંધ્યો હતો. આ સમગ્ર ઘટનાક્રમમાં એક મહિલા પીએસઆઈ પણ સ્થળ પર હાજર હોવાનો અને તેમને આરોપી તરીકે દર્શાવવામાં ન આવ્યા હોવાના ગંભીર આક્ષેપો સામે આવ્યા છે. પોલીસના જ કેટલાક અધિકારીઓએ મહિલા પીએસઆઈ પાસેથી આશરે પાંચ લાખ રૂપિયાનો તોડ કર્યો હોવાનો દાવો પોલીસ સૂત્રોમાંથી સામે આવ્યો છે.
જે અંગે સૂત્રોના જણાવ્યા મુજબ ત્યારબાદ જિલ્લા પોલીસવડા જયદીપસિંહ જાડેજાએ સંબંધિત મહિલા પીએસઆઈ સામે અન્ય કારણ દર્શાવી સસ્પેન્ડ કરી દીધેલ હતા. જેથી પાંચ લાખ નો તોડ પણ થયો અને સસ્પેન્ડ પણ થતાં મહિલા પીએસઆઈએ સીધા જ રેંજ આઈજી રાજેન્દ્રસિંહ ચુડાસમા સમક્ષ પહોંચી રજૂઆત કરી સમગ્ર ઘટનાક્રમની સ્ફોટક વિગતો આપી હતી. જેથી રેંજ આઈજી ચુડાસમાએ ઘટનાની ગંભીરતાને ધ્યાને લઈ તાત્કાલિક ઈન્કવાયરીના આદેશ આપેલ હતા. જેમાં હાથ ધરાયેલી પ્રાથમિક તપાસમાં મહિલા પીએસઆઈ ની રજુઆતને સમર્થન મળતા અને કેટલાક મુદ્દાઓમાં ગેરરીતિ સામે આવતા પીએસઆઈ જેબલીયા અને કાગડા સામે સસ્પેન્શનની કાર્યવાહી કરવામાં આવી હોવાનું પોલીસ વિભાગે સત્તાવાર રીતે જણાવ્યું છે.
આ સમગ્ર પ્રકરણથી ગીર સોમનાથ પોલીસ બેડામાં ભારે ચર્ચા જાગી છે. તપાસ પૂર્ણ થયા બાદ જ તોડકાંડ, મહિલા પીએસઆઈની ભૂમિકા અને અન્ય સંકળાયેલા અધિકારીઓ અંગેનું સંપૂર્ણ સત્ય બહાર આવશે. હાલ વિભાગીય તપાસ ચાલુ હોવાથી અંતિમ જવાબદારી તપાસના પરિણામ બાદ જ નિર્ધારિત થશે.
