- વાઈબ્રન્ટ પહેલા ઉદ્યોગકારો સાથે મીટિંગ
- સીએમ ભૂપેન્દ્ર પટેલનો 1 દિવસીય મુંબઈ પ્રવાસ
- VGGS 2024 પહેલા સીએમ ભૂપેન્દ્ર પટેલની મુંબઈ મુલાકાત
સીએમ ભૂપેન્દ્ર પટેલે વાયબ્રન્ટ ગુજરાત ગ્લોબલ સમિટ 2024 સંદર્ભે મુંબઈ ખાતે અગ્રણી ઉદ્યોગકારો સાથે વન ટુ વન બેઠકો કરી હતી. જેના સંદર્ભે એકદિવસીય મુંબઈ મુલાકાત ગોઠવી હતી.
શરૂઆતમાં સૌપ્રથમ L&Tના ચેરમેન એસ. એન. સુબ્રહ્મણ્યન સાથે સીએમ ભૂપેન્દ્ર પટેલે મુલાકાત કરી હતી. મુલાકાત દરમિયાન L&Tના ચેરમેને ગૃપ વિશે માહિતી આપતા કહ્યું હતું કે, ટેકનોલોજી, એન્જિનિયરિંગ, બાંધકામ અને ઉત્પાદનમાં અજોડ ક્ષમતાઓ ધરાવતું 80 વર્ષથી વધુ જૂનું ઉદ્યોગ જૂથ છે. L&T કન્સ્ટ્રક્શન્સ દેશના પ્રથમ હાઈ-સ્પીડ રેલ કોરિડોર, મુંબઈ-અમદાવાદ હાઈ-સ્પીડ રેલ (MAHSR)ના અમુક વિભાગોને એક્ઝિક્યુટ કરી રહ્યું છે. કંપનીએ સુરતના હજીરામાં K9 વજ્ર ટેન્કનું નિર્માણ કર્યુ છે. આ ઉપરાંત હઝીરા ખાતે આલ્કલાઇન ઇલેક્ટ્રોલાઈસીસ પ્રોસેસ આધારિત ગ્રીન હાઇડ્રોજનનું ઉત્પાદન શરૂ કર્યું છે.
તેમણે ગુજરાતમાં તેમના આગામી આયોજન અંગે ચર્ચા કરી હતી. તેમાં L&T ફાઇનાન્સ હોલ્ડિંગ્સના મિલકતોના રિટેલ પોર્ટફોલિયોમાં વિસ્તારની યોજના અંગે માહિતી આપી હતી. તેમજ ગત વર્ષ, L&T એ રૂપિયા 7 હજાર કરોડના રોકાણથી વડોદરામાં IT અને IT સક્ષમ સેવાઓ (ITeS) પાર્ક સ્થાપવા માટે ગુજરાત સરકાર સાથે સમજૂતી કરાર પર હસ્તાક્ષર કર્યા છે તેની પણ વિગતો આપી હતી. તેઓ હજીરામાં 1000 કરોડ ના રોકાણ સાથે એલેક્ટરાઈઝર પ્લાન્ટ આગામી સમયમાં શરૂ કરવાના છે અને ભારતમાં તેઓ આ સેકટર માં પાયોનીયર છે તેની પણ જાણકારી આપી હતી.
આના ઉપરાંત મુખ્યમંત્રી ભૂપેન્દ્રભાઈએ P&Gના એમડી એલ.વી. વૈદ્યનાથન સાથે મુલાકાત કરી હતી. વૈદ્યનાથને કહ્યું હતું કે, P&Gની સ્થાપના 180 વર્ષ પહેલાં કરાઈ હતી. હાલમાં વિક્સ, એરિયલ, ટાઇડ, વ્હિસ્પર, ઓલે, જિલેટ, અંબીપુર, પેમ્પર્સ, પેન્ટેન, ઓરલ-બી હર્બલ એસેન્સ, હેડ એન્ડ શોલ્ડર્સ, બ્રૌન અને ઓલ્ડ સ્પાઈસ સહિતની વિશ્વસનીય, ગુણવત્તાયુક્ત પ્રોડક્ટ સાથે માર્કેટમાં મજબૂત પોર્ટફોલિયો ધરાવે છે. આ તમામ ઉત્પાદનો મેક ઈન ઈન્ડિયા પહેલ હેઠળ, 95 ટકાથી વધુ ઉત્પાદન સ્થાનિક રીતે કરવામાં આવે છે.
P&Gનો 2015થી અમદાવાદના સાણંદમાં અત્યાધુનિક ઉત્પાદન પ્લાન્ટ કાર્યરત છે તેની પણ ચર્ચા તેમણે સીએમ ભૂપેન્દ્ર પટેલ સાથે કરી હતી. સીએમ ભૂપેન્દ્રભાઈએ તેમને વાયબ્રન્ટ 2024માં જોડાવા આમંત્રણ આપ્યું હતું. આ ઉપરાંત UPLના ચેરમેન જય શ્રોફ સાથે સીએમ ભૂપેન્દ્ર પટેલે વન ટુ વન બેઠક યોજી હતી. કંપની વિશે માહિતી આપતાં શ્રોફે કહ્યું હતું કે, કંપની ૧૪૦થી વધુ દેશો સાથે વ્યાપાર કરી રહી છે. ગુજરાતમાં ભરૂચ અને વાપીમાં તેમજ અંકલેશ્વરમાં ઉત્પાદન સુવિધાઓ ધરાવે છે. તાજેતરમાં CleanMax સાથે મળીને, તેઓએ ગુજરાતમાં એક ગ્રાઉન્ડબ્રેકિંગ રિન્યુએબલ એનર્જી પ્રોજેક્ટ પણ સ્થાપ્યો છે તેની પણ વિગતો આપી હતી.
સીએમ ભૂપેન્દ્રભાઈ પટેલે દરેક ઉદ્યોગકારોને વાઈબ્રન્ટ સમિટ 2024માં ભાગ લેવાનું આમંત્રણ આપ્યું હતું. મહત્વનું છે કે આ કાર્યક્રમમાં મુખ્યમંત્રીશ્રીના મુખ્ય અગ્ર સચિવશ્રી કૈલાસનાથન, મુખ્ય સચિવ શ્રી રાજકુમાર અને વરિષ્ઠ સચિવો પણ જોડાયા હતા.
