વિરપુર પોલીસે રૂ.56 હજારથી વધુ કિંમતના મોબાઇલ શોધી માલિકોને પરત કર્યા
CEIR પોર્ટલની મદદથી પોલીસની સફળ કામગીરી, અરજદારોએ વ્યક્ત કર્યો આભાર
અગ્ર ગુજરાત, રાજકોટ
રાજકોટ રેન્જના નાયબ પોલીસ મહાનીરીક્ષક નિર્લિપ્ત રાય તથા રાજકોટ જિલ્લા પોલીસ અધીક્ષક વિજયસિંહ ગુર્જરના માર્ગદર્શન હેઠળ જિલ્લામાં મોબાઇલ ગુમ થવા અને ચોરીના બનાવોને રોકવા તેમજ ગુમ થયેલા મોબાઇલ ફોન તેમના મૂળ માલિકોને પરત અપાવવા વિશેષ અભિયાન હાથ ધરવામાં આવ્યું છે.જેમાં જેતપુર વિભાગના નાયબ પોલીસ અધિક્ષક આર.એ.ડોડીયાના માર્ગદર્શન અને સૂચના હેઠળ વિરપુર પોલીસ સ્ટેશનના પોલીસ ઇન્સ્પેક્ટર એસ.જી.રાઠોડના નેતૃત્વમાં ગુમ થયેલા મોબાઇલ ફોન શોધવા માટે સતત કામગીરી કરવામાં આવી રહી છે.
આ કામગીરી અંતર્ગત “CEIR” (Central Equipment Identity Register) પોર્ટલનો ઉપયોગ કરી તેમજ ટેકનિકલ માહિતી અને આધુનિક સાધનોની મદદથી ગુમ થયેલા મોબાઇલ ફોનની શોધખોળ હાથ ધરવામાં આવી હતી. જેના પરિણામે વિરપુર પોલીસ દ્વારા કુલ ચાર ગુમ થયેલા મોબાઇલ ફોન શોધી કાઢી તેમના મૂળ માલિકોને પરત સોંપવામાં આવ્યા છે.આ સફળ કામગીરીમાં વિરપુર પોલીસ સ્ટેશનના પોલીસ ઇન્સ્પેક્ટર એસ.જી.રાઠોડ તથા પોલીસ હેડ કોન્સ્ટેબલ જીગ્નેશભાઈ ભિખાભાઈ તેમજ પોલીસ કોન્સ્ટેબલ અશોકભાઈ રાયાભાઈ સહિતના અધિકારીઓ અને કર્મચારીઓએ મહત્વપૂર્ણ યોગદાન આપ્યું હતુ,શોધી કાઢવામાં આવેલા મોબાઇલ ફોનની કુલ અંદાજિત કિંમત રૂ. 56,498/- થાય છે. પોતાના ખોવાયેલા મોબાઇલ પરત મળતા અરજદારોમાં ખુશીની લાગણી જોવા મળી હતી અને તેમણે વિરપુર પોલીસનો હૃદયપૂર્વક આભાર વ્યક્ત કર્યો હતો.
વિરપુર પોલીસની આ કામગીરી પોલીસ વિભાગ પ્રત્યે લોકોનો વિશ્વાસ વધુ મજબૂત બનાવે છે તેમજ આધુનિક ટેકનોલોજીના ઉપયોગથી જનતાને ઝડપી અને અસરકારક સેવા પૂરી પાડવાની પ્રતિબદ્ધતા દર્શાવે છે.
