ભાવનગરમાં SDMના નામે લાખોની માંગણી કરનાર અધિકારીના ડ્રાઇવરની ધરપકડ
અશાંતધારામાં મિલકત સોદામાં ભ્રષ્ટાચારના આક્ષેપનો મામલો ગરમાયો : કોર્ટમાં રજૂ કરવા તજવીજ
અગ્ર ગુજરાત, ભાવનગર
ભાવનગર શહેરમાં અશાંતધારો અમલી હોવા છતાં પડદા પાછળ મિલકતના સોદાઓમાં ભ્રષ્ટાચારના આક્ષેપો ઉઠતા ચકચાર મચી હતી. ક્રેસન્ટ સર્કલ નજીક હરિયાળા પ્લોટ વિસ્તારમાં હિન્દુ માલિકીના કોમર્શિયલ કોમ્પ્લેક્ષના વેચાણ માટે સબ ડિવિઝનલ મેજિસ્ટ્રેટની મંજૂરી અપાવવાના બહાને SDMના જ ડ્રાઈવરે લાખો રૂપિયાની માગણી કરી હતી. જે મામલે 17 દિવસ બાદ મદદનીશ કલેક્ટરે ડ્રાઈવર વિરુદ્ધ ગુનો નોંધાવ્યો છે.
શહેરમાં અશાંતધારા વચ્ચે મિલકત સોદામાં ભ્રષ્ટાચારના આક્ષેપોને લઈને મામલો વધુ ગરમાયો છે. નિલમબાગ પોલીસ મથકથી મળતી માહિતી મુજબ મદદનીશ કલેક્ટર પ્રતિભા દહિયાએ લેખિત ફરિયાદ નોંધાવી હતી. ફરિયાદમાં જણાવ્યા અનુસાર કલેકટર કચેરીએ મારૂતિ મેન પાવર એજન્સી મારફતે આઉટસોર્સિંગ હેઠળ ડ્રાઈવર તરીકે ફરજ બજાવતા મોમીન એમ.પઠાણે પોતાના હોદાનો ગેરફાયદો ઉઠાવ્યો હતો.
ગત તા. 17 માર્ચ, 2026ના રોજ સાંજના સમયે મોમીન એમ.પઠાણના ઓડિયો અને વીડિયો સોશિયલ મીડિયામાં વાયરલ થયેલા હતા. આ ઓડિયો-વીડિયોમાં શખ્સ દ્વારા કલેક્ટર કચેરી અને અધિકારીઓના નામ-હોદાનો ખોટો ઉપયોગ કરીને નાણાકીય લેવડ-દેવડ કરતા હોવાના સંવાદ હતો. એટલું જ નહીં, કચેરીના દસ્તાવેજોના અનધિકૃત રીતે ફોટોગ્રાફ લઈ અને તે આધાર પર વાતચીત કરતો હોવાનો પણ ખુલાસો થયો હતો.
ફરિયાદ નોંધાયાના 17 દિવસ બાદ ભાવનગર LCB પોલીસને બાતમી મળતા આજે મોમીન પઠાણને તેના ઘરેથી ધરપકડ કરી લીધો હતો. પોલીસે તેને નીલમબાગ પોલીસ મથકમાં સોંપ્યો છે અને તેની સામે ધોરણસર કાર્યવાહી હાથ ધરી છે. આવતીકાલે બપોરે મોમીન પઠાણને કોર્ટમાં રજૂ કરવામાં આવશે. પોલીસ તેની પૂછપરછમાં મુખ્યત્વે એ વાતની તપાસ કરશે કે, મિલકત તબદીલ કરાવવા માટે તે કોના કહેવાથી અને કોના માટે લાંચ લેતો હતો.
