એલ.આર.શાહ હોમિયોપેથી કોલેજ દ્વારા નેશનલ ગાર્ડી કોલોક્વિયમની ભવ્ય ઉજવણી
વિદ્યાર્થીઓ અને પ્રેકટિનર્સને વધુ સશકત બનાવવા માર્ગદર્શન અપાયું
અગ્ર ગુજરાત, રાજકોટ
રાજકોટ સ્થિત ગાર્ડી વિદ્યાપીઠની એલ.આર.શાહ હોમિયોપેથી કોલેજ દ્વારા તાજેતરમાં ચોથો નેશનલ ગાર્ડી હોમિયોપેથીક કોલોક્વિયમ ભવ્ય અને સફળતાપૂર્વક યોજાયો હતો. આ બે દિવસીય રાષ્ટ્રીય સેમિનારનો મુખ્ય હેતુ હોમિયોપેથી વિષયક આધુનિક જ્ઞાન, સંશોધન અને ક્લિનિકલ અનુભવનું વિતરણ કરી વિદ્યાર્થીઓ અને પ્રેક્ટિશનર્સને વધુ સશક્ત બનાવવાનો હતો.
આ સેમિનારમાં હોમિયોપેથી ક્ષેત્રના પ્રખ્યાત નિષ્ણાતો ડૉ. મયુરેશ મહાજન અને ડૉ. સુનિલ ઘોડકે મુખ્ય વક્તા તરીકે ઉપસ્થિત રહ્યા હતા. બંને વક્તાઓએ તેમના વિસ્તૃત અનુભવ અને ઊંડાણપૂર્ણ જ્ઞાનના આધારે હોમિયોપેથીના વિવિધ મહત્વપૂર્ણ વિષયો પર વ્યાખ્યાન આપ્યા હતા, જે ઉપસ્થિત સૌ માટે અત્યંત માર્ગદર્શક અને પ્રેરણાદાયી સાબિત થયા હતા. સેમિનારના પ્રથમ દિવસે ગાર્ડી વિદ્યાપીઠના વિદ્યાર્થીઓ માટે ખાસ સત્રો યોજાયા હતા, જેમાં વિદ્યાર્થીઓએ હોમિયોપેથીના સિદ્ધાંતો, ક્લિનિકલ એપ્લિકેશન તેમજ કેસ સ્ટડી વિશે વિગતવાર માહિતી મેળવી હતી. વિદ્યાર્થીઓએ વક્તાઓ સાથે સક્રિય ચર્ચા કરીને પોતાના પ્રશ્નોનું નિરાકરણ મેળવ્યું હતું, જે તેમની શૈક્ષણિક પ્રગતિ માટે ખૂબ જ ઉપયોગી સાબિત થયું હતું.
સેમિનારના બીજા દિવસે ગુજરાતના વિવિધ વિસ્તારોમાંથી આવેલા પ્રેક્ટિશનર્સ, ઇન્ટર્ન્સ અને વિદ્યાર્થીઓએ મોટી સંખ્યામાં હાજરી આપી હતી. આ દિવસે પ્રેક્ટિકલ અને ક્લિનિકલ અભિગમ પર ખાસ ભાર મૂકવામાં આવ્યો હતો, જેના કારણે ઉપસ્થિત સૌએ પોતાના દૈનિક પ્રેક્ટિસમાં ઉપયોગી થઈ શકે તેવું જ્ઞાન પ્રાપ્ત કર્યું હતું. આ સમગ્ર કાર્યક્રમ સ્ટેટ કાઉન્સિલ ફોર હોમોયોપેથીક મેડિસીન્સ, ગુજરાત સ્ટેટ સાથે સંકળાયેલ હતો અને તેના માર્ગદર્શન હેઠળ આયોજન કરવામાં આવ્યું હતું, જે કાર્યક્રમની ગુણવત્તા અને પ્રામાણિકતા દર્શાવે છે. સાથે સાથે આ અવસરે રાષ્ટ્રીય સ્તરની પોસ્ટર પ્રેઝન્ટેશન સ્પર્ધાનું પણ આયોજન કરવામાં આવ્યું હતું, જેમાં દેશભરના વિદ્યાર્થીઓએ ઉત્સાહપૂર્વક ભાગ લીધો હતો અને પોતાના સંશોધન કાર્યનું પ્રદર્શન કર્યું હતું.
આ કાર્યક્રમમાં વિશેષરૂપે, સ્ટેટ કાઉન્સિલ દ્વારા સૌરાષ્ટ્ર યુનિવર્સિટી, ભક્ત કવિ નરસિંહ મહેતા યુનિવર્સિટી તથા મહારાજા સયાજીરાવ ભાવનગર યુનિવર્સિટીના શ્રેષ્ઠ ક્રમ મેળવનાર વિદ્યાર્થીઓને મેડલ આપી સન્માનિત કરવામાં આવ્યા હતા, જે વિદ્યાર્થીઓ માટે ગૌરવની બાબત બની હતી. આ સમગ્ર સેમિનારને સફળ બનાવવા માટે કોલેજના ફેકલ્ટી સભ્યો તથા સ્ટાફ દ્વારા ખુબ જ મહેનત અને જહેમત ઉઠાવવામાં આવી હતી. આયોજન, સંચાલન અને વ્યવસ્થાપનમાં તેમની નિષ્ઠા અને સમર્પણ સ્પષ્ટપણે ઝળહળતું હતું.
