થરાદના ડોડગામના તળાવમાં પાણી ભરવા ગયેલા ત્રણ ભાઇ-બહેનના ડૂબી જતાં મોત
ખેતીકામ કરતા શ્રમિક પરિવાર પર આભ ફાટયું : ફઇના દિકરાનો પગ લપસતા પાણીમાં ખાબકયા બાદ બચાવવા જતા બહેનોએ જીવ ગુમાવ્યો
અગ્ર ગુજરાત, વાવ-થરાદ
વાવ-થરાદ જિલ્લાના થરાદ તાલુકાના ડોડગામમાં એક અત્યંત કરુણ ઘટના બની છે. તળાવમાં પાણી ભરવા ગયેલા એક જ પરિવાર માથે આભ ફાટ્યું છે. બે બહેનો અને ફોઈના દીકરાનું ડૂબી જવાથી કરુણ મોત નીપજ્યું છે. મામાના ઘરે આવેલા કિશોર સહિત 3 ભાઈ-બહેને જીવ ગુમાવ્યો છે. આ દુર્ઘટનાને પગલે સમગ્ર પંથક અને વાલ્મિકી સમાજમાં ભારે શોકની લાગણી વ્યાપી ગઈ છે.
મળતી વિગતો અનુસાર, મૂળ ગામડીના વતની અને હાલ ડોડગામમાં ભાગિયા તરીકે ખેતીકામ કરતા શિવા વાલ્મિકીની બે પુત્રીઓ હેતલ (ઉ.વ.18) અને ગુડી (ઉ.વ.13) તેમજ દિયોદરના વખવાડાના વિપુલ વાલ્મિકી (ઉ.વ.12) તળાવે પાણી ભરવા ગયા હતા. આ દરમિયાન 12 વર્ષીય વિપુલનો પગ લપસતા તે ઊંડા પાણીમાં ખાબક્યો હતો. તેને બચાવવા માટે 13 વર્ષીય ગુડીએ પ્રયાસ કર્યો હતો, પરંતુ તે પણ ડૂબવા લાગી હતી.
પોતાના ભાઈ-બહેનને મરણિયા જંગ લડતા જોઈ 18 વર્ષીય હેતલ પણ પાણીમાં કૂદી પડી હતી. કમનસીબે, પાણી વધુ ઊંડું હોવાને કારણે ત્રણેય વ્યક્તિઓ એકપછી એક પાણીમાં ગરકાવ થઈ ગયા હતા અને ઘટનાસ્થળે જ શ્વાસ છોડ્યા હતા.
તળાવ કિનારે હાજર માતાની નજર સામે જ સંતાનો ડૂબતા હોવાથી તેમણે ચીસાચીસ કરી મૂકી હતી. અવાજ સાંભળી આસપાસના ખેતરોમાંથી લોકો દોડી આવ્યા હતા. ગ્રામજનોએ ભારે જહેમત બાદ ત્રણેયના મૃતદેહો બહાર કાઢ્યા હતા.
મૃતક હેતલના લગ્ન ભાભરના બ્લોધન ગામે થયા હતા. તેમને 2 વર્ષની પુત્રી અને 1.5 વર્ષનો પુત્ર છે. માતાના અકાળે અવસાનથી આ બંને માસૂમ બાળકોએ છત્રછાયા ગુમાવી છે. બીજી તરફ શિવા વાલ્મિકીએ પોતાની બે જુવાનજોધ દીકરીઓ અને એક ભાણેજ ગુમાવતા પરિવાર પર આભ તૂટી પડ્યું છે.
