ટ્યુશને જતી 15 વર્ષીય સગીરાને ફસાવી ધોરણ-12ના વિદ્યાર્થીએ આચર્યું દુષ્કર્મ
પ્રેમજાળમાં ફસાવી વાવડી ખાતે લઈ જઈ વારંવાર શારીરિક શોષણ કર્યાનો આક્ષેપ; ભક્તિનગર પોલીસે તપાસ શરૂ કરી
અગ્ર ગુજરાત, રાજકોટ
રાજકોટ શહેરમાં સગીરાની સાથે શારીરિક શોષણની ચોંકાવનારી ઘટના સામે આવી છે. હરિ ઘવા મેઈન રોડ વિસ્તારમાં રહેતી અને ધોરણ-10ની પરીક્ષા આપી ચૂકેલી 15 વર્ષીય કિશોરીને એક યુવકે પ્રેમજાળમાં ફસાવી તેની સાથે દુર્વ્યવહાર કર્યો હોવાનો આક્ષેપ થયો છે. આ મામલે ભક્તિનગર પોલીસ સ્ટેશનમાં ગુનો નોંધાતા પોલીસે આગળની તપાસ હાથ ધરી છે.
માહિતી મુજબ, ભોગ બનનાર સગીરા અભ્યાસ માટે ટ્યુશન ક્લાસીસમાં જતી હતી. અહીં તેની ઓળખ આરોપી વંશ પરેશભાઈ કુબાવત (રહે. અટિકા સાઉથ, લાલ પાર્ક) સાથે થઈ હતી, જે ધોરણ-12માં અભ્યાસ કરે છે. ઓળખાણ વધતા આરોપીએ સગીરાને પોતાના વિશ્વાસમાં લઈ ધીમે ધીમે નજીક આવવાનો પ્રયાસ કર્યો હતો.
ફરિયાદ મુજબ, જાન્યુઆરી-2026થી એપ્રિલની શરૂઆત સુધી આરોપીએ સગીરાને લલચાવી-ફોસલાવી તેની સાથે અયોગ્ય વર્તન કર્યું હતું. ખાસ કરીને ગત 4 એપ્રિલના રોજ બપોરના સમયે સગીરા અચાનક ઘરેથી નીકળી ગઈ હતી, જેના કારણે પરિવારજનોએ શોધખોળ શરૂ કરી હતી. સાંજે તે ઘરે પરત ફરતા તેની સ્થિતિ ચિંતાજનક જણાઈ હતી. તે ગભરાયેલી અને ગુમસૂમ હાલતમાં હતી. પરિવારજનોએ વિશ્વાસમાં લઈને પૂછપરછ કરતાં આખી ઘટનાનો ખુલાસો થયો હતો.
સગીરાએ આપેલી માહિતી મુજબ, આરોપી તેને વાવડી વિસ્તારમાં આવેલ તેના સગાના ઘરે લઈ ગયો હતો, જ્યાં તેની સાથે અયોગ્ય કૃત્ય કરવામાં આવ્યું હતું. આ સમગ્ર ઘટનાથી પરિવારજનોમાં આક્રોશ ફેલાયો છે. પોલીસે સગીરાના નિવેદનના આધારે ગુનો નોંધી આરોપી વિદ્યાર્થીને ઝડપી પાડવા અને કેસની વિગતવાર તપાસ શરૂ કરી છે.
