ચૂંટણીમાં મતદાનની અપીલ કરતા સ્ટેમ્પ્સ લગાવી ટેક્સ બિલનું વિતરણ કરતી મનપા
મારો મત મારો અધિકાર, મતદાન અચૂક કરીએ’ – ટેક્સબિલમાં અપાયો મતદાનનો સંદેશ
અગ્ર ગુજરાત, રાજકોટ
રાજકોટ શહેર અને જિલ્લામાં સ્થાનિક સ્વરાજ્યની ચૂંટણીની તૈયારીઓને આખરી ઓપ અપાઈ રહ્યો છે. મુક્ત, ન્યાયી અને પારદર્શી વાતાવરણમાં ૨૬મીએ મતદાન યોજવાની તૈયારીઓ ચૂંટણી તંત્ર દ્વારા ચાલી રહી છે. દરમિયાન રાજકોટ મહાનગર પાલિકા દ્વારા હાલ વિતરિત કરાતા ટેક્સબિલમાં સ્ટેમ્પ લગાવીને ચૂંટણીમાં નાગરિકોને મતાધિકારનો અચૂક ઉપયોગ કરવાની અપીલ કરાઈ રહી છે.
‘મતદાન એ નાગરિકોનો અધિકાર છે અને નાગરિકો ચૂંટણીમાં મતાધિકારનો અચૂક ઉપયોગ કરે’ તે માટે ચૂંટણી તંત્ર દ્વારા વિવિધ સ્તરે મતદાન જાગૃતિ કાર્યક્રમ યોજવામાં આવી રહ્યા છે. રાજકોટ મહાનગર પાલિકા દ્વારા હાલ ટેક્સ બિલનું વિતરણ ચાલી રહ્યુ છે. જેમાં પણ ૨૬મીએ લોકશાહીના પર્વ એવા સ્થાનિક સ્વરાજ્યની ચૂંટણીમાં ‘મારો મત મારો અધિકાર, મતદાન અચૂક કરીએ’ એવો સંદેશ આપતા સ્ટેમ્પ લગાવાઈ રહ્યા છે. આ બિલ નાગરિકોને મળે છે, ત્યારે તેને મતદાનની તારીખ સાથે મતદાન કરવાની પ્રેરણા મળે છે.
