રાજુલાના રામપરા ગામે સિંહણ ‘લક્ષ્મી’નો વનવિભાગના ટ્રેકર પર હુમલો
ઈજાગ્રસ્ત ટ્રેકરને મહુવા હોસ્પિટલ ખસેડાયો
અગ્ર ગુજરાત, રાજુલા
અમરેલી જિલ્લાના રાજુલા તાલુકાના રામપરા-૨ ગામે વનવિભાગની કામગીરી દરમિયાન એક સિંહણે ટ્રેકર પર હુમલો કર્યો હતો. ઉનાળાની ઋતુમાં સિંહની સુરક્ષા અને સ્વાસ્થ્ય માટે વનવિભાગ દ્વારા હાલ ડી- વોર્મિંગની કામગીરી હાથ ધરવામાં આવી છે. રામપરા-ભેરાઇ વિસ્તારમાં વસતી અને ‘લક્ષ્મી’ નામે ઓળખાતી જાણીતી સિંહણને ડી-વોર્મિંગની પ્રક્રિયા પૂર્ણ થયા બાદ જ્યારે મુક્ત કરવામાં આવી રહી હતી ત્યારે તેણે અચાનક વનવિભાગના ટ્રેકર નકાભાઇ રામ પર હુમલો કરી દીધો હતો. આ ધટના પગલે અન્ય વનકર્મીઓ દોડી આવ્યાને અને ઇજાગ્રસ્ત ટ્રેકર નકાભાઇને ઈજાઓ પહોંચતા તેમને તાત્કાલિક સારવાર અર્થે મહુવાની હનુમંત હોસ્પિટલ ખાતે ખસેડવામાં આવ્યા હતાં. ઉલ્લેખનીય છે કે , વનવિભાગ દ્વારા વન્યજીવોના સંરક્ષણ માટે સમયાંતરે આવી કામગીરી કરવામાં આવતી હોય છે. હાલ ઈજાગ્રસ્ત ટ્રેકરની સારવાર ચાલી રહી છે.
