જેતપુરના ખારચીયા ગામે ટ્રેકટર અને ટ્રોલીની ચોરી કરનાર ઝડપાયો
રૂ.3.3પ લાખનો મુદામાલ પોલીસ દ્વારા જપ્ત કરાયો
અગ્ર ગુજરાત, જેતપુર
જેતપુર તાલુકાના ખારચીયા ગામેથી થયેલ ટ્રેક્ટર અને ટ્રોલીની ચોરીનો ભેદ પોલીસે ગણતરીના દિવસોમાં ઉકેલી નાખ્યો છે. પોલીસે રૂા. ૩.૩૫ લાખના મુદ્દામાલ સાથે એક આરોપીને ઝડપી પાડી જેલહવાલે કર્યો છે.
મળતી માહિતી મુજબ મૂળ દેવભૂમિ દ્રારકાના બાકોડી ગામના વતની જીતેન્દ્રભાઇ કરશનભાઇ માડમે પોલીસ ફરિયાદ નોંધાવી હતી કે, ગત તા. ૧૪/૦૪/૨૦૨૬ ના રોજ તેઓ ખારચીયા ગામની સીમમાં લાલજીભાઇ મકવાણાની વાડીએ ખેતીકામ કરતા હતા. તે દરમિયાન રાત્રિના સમયે કોઈ અજાણ્યો ચોર ઇસમ તેમનું ફાર્મટ્રેક ટ્રેક્ટર (નં. GJ-37-J-4339) અને ટ્રોલી, જેની કુલ કિંમત રૂા. ૩.૨૫ લાખ હતી, તેની ચોરી કરી ફરાર થઈ ગયો હતો.
રાજકોટ ગ્રામ્ય એસ.પી. વિજયસિંહ ગુર્જર અને નાયબ પોલીસ અધિક્ષક આર.એ.ડોડીયાના માર્ગદર્શન હેઠળ જેતપુર તાલુકા પોલીસ પીઆઈ એમ.એલ.આહીર દ્વારા સ્પેશ્યલ ટીમ બનાવવામાં આવી હતી. પોલીસે અંદાજે ૭૦ જેટલા CCTV ફૂટેજ તપાસ્યા અને હ્યુમન સોર્સની મદદ લીધી હતી. તપાસ દરમિયાન એ.એસ.આઇ. વિપુલભાઇ મારૂ અને હેડ કોન્સ. અજીતભાઇ ગંભીરને બાતમી મળી હતી કે ખારચીયા ગામે રહેતો અરવીંદભાઇ મથુરભાઇ આમલીયા શંકાસ્પદ રીતે ટ્રેક્ટર સાથે જોવા મળ્યો છે.
પોલીસે વોચ ગોઠવી ખીરસરા રોડ પાસેથી આરોપી અરવીંદભાઇ આમલીયા (ઉ.વ. ૨૮, મૂળ રહે. દાહોદ) ને ઝડપી લીધો હતો. તેની કડક પૂછપરછ કરતા જાણવા મળ્યું કે તેણે ટ્રેક્ટર ગાલોલીયા નદીના પુલ પાસે બાવળની ઝાડીમાં છુપાવ્યું હતું જ્યારે ચોરી કરેલી ટ્રોલી ગોંડલ ખાતે કલર કામ માટે આપી હતી. પોલીસે રૂા. ૨.૫૦ લાખનું ટ્રેક્ટર, રૂા. ૭૫ હજારની ટ્રોલી અને ૧૦ હજારનો મોબાઈલ મળી કુલ રૂા. ૩,૩૫,૦૦૦/- નો મુદ્દામાલ કબજે કરી આગળની કાયદેસરની કાર્યવાહી હાથ ધરી છે.
