જેતપુરના જેતલસર પાસે અર્ટિગાએ ટેમ્પો અને ઇકોને ફંગોળ્યા, ત્રણ ઈજાગ્રસ્ત
ઘાયલોને સારવાર માટે હોસ્પિટલમાં ખસેડાયા
અગ્ર ગુજરાત, જેતપુર
જેતપુર તાલુકાના જેતલસર પાસે ગઈ કાલે એક ભયાનક ટ્રિપલ અકસ્માત સર્જાયો હતો. પૂરપાટ ઝડપે આવી રહેલી એક અર્ટિગા કારે માર્ગ પર જઈ રહેલા ટેમ્પો અને ઉભેલી ઇકો વાનને જોરદાર ટક્કર મારતા અરેરાટી વ્યાપી ગઈ હતી. આ અકસ્માતમાં ત્રણ વ્યક્તિઓને ગંભીર ઈજાઓ પહોંચી છે, જેમને તાત્કાલિક સારવાર માટે હોસ્પિટલ ખસેડવામાં આવ્યા છે.
બનાવની વિગત મુજબ, જેતલસર પાસેના હાઈવે પર એક અર્ટિગા કારના ચાલકે સ્ટેયરિંગ પરથી કાબૂ ગુમાવતા સર્વપ્રથમ ટેમ્પો સાથે અકસ્માત સર્જ્યો હતો. અકસ્માત એટલો જોરદાર હતો કે ટેમ્પો પલટી મારી ગયો હતો અને ત્યારબાદ કાર બાજુમાં ઉભેલી ઇકો વાન સાથે ધડાકાભેર અથડાઈ હતી. આ ઘટનાના સીસીટીવી ફૂટેજ પણ સામે આવ્યા છે, જેમાં સ્પષ્ટપણે જોઈ શકાય છે કે અર્ટિગા કાર ફૂલ સ્પીડમાં આવી રહી હતી અને પલવારમાં જ વાહનોના કુરચા બોલી ગયા હતા. અક્સ્માત એટલો જોરદાર હતો કે અર્ટિગા કારના ફંગોળાઈ ખેતરમાં ખાબકી હતી બીજી તરફ ટક્કરને કારણે છોટા હાથી ટેમ્પો અને ઈકો કાર બંને રોડ પર પલટી મારી ગયા હતા
આ ગંભીર અકસ્માતમાં (૧) સુરેશભાઈ ગોકળભાઈ રાઠોડ, (૨) વસીમભાઈ જુસબભાઈ હાલેપોત્રા અને (૩) સચિન રૂડાભાઈ ગળચર નામના યુવાનોને શરીરે ગંભીર ઈજાઓ પહોંચી હતી. અકસ્માત થતા જ આસપાસના લોકો દોડી આવ્યા હતા અને ઈજાગ્રસ્તોને ૧૦૮ મારફતે જેતપુરની સરકારી હોસ્પિટલમાં સારવાર અર્થે ખસેડ્યા હતા.
ઘટનાની જાણ થતા જ જેતપુર તાલુકા પોલીસનો કાફલો ઘટનાસ્થળે દોડી ગયો હતો. પોલીસે અકસ્માતગ્રસ્ત વાહનોને માર્ગ પરથી હટાવી ટ્રાફિક ક્લિયર કરાવ્યો હતો અને સીસીટીવી ફૂટેજના આધારે અકસ્માતનું ચોક્કસ કારણ જાણવા વધુ તપાસ હાથ ધરી છે.
