જેતપુરના રબારીકા ચોકડી પાસે આવેલ દયાનંદ ઇન્ડસ્ટ્રીઝના બોઈલરમાં ભીષણ આગ
નગરપાલિકાના બે ફાયર ફાઇટરોએ ભારે જહેમત બાદ આગ પર કાબૂ મેળવ્યો; લાખોના નુકસાન અનુમાન
અગ્ર ગુજરાત, જેતપુર
જેતપુરના રબારીકા ચોકડી પાસે આવેલ દયાનંદ ઇન્ડસ્ટ્રીઝ નામના કારખાનામાં અચાનક બોઈલરમાં આગ ભભૂકી ઉઠતા સમગ્ર વિસ્તારમાં અફરાતફરીનો માહોલ સર્જાયો હતો. આ દુર્ઘટનામાં કારખાનેદારને લાખો રૂપિયાનું નુકસાન થયું હોવાનો પ્રાથમિક અંદાજ લગાવવામાં આવી રહ્યો છે.
પ્રાપ્ત વિગતો અનુસાર, રબારીકા ચોકડી પાસે આવેલી દયાનંદ ઇન્ડસ્ટ્રીઝમાં કામકાજ ચાલુ હતું તે દરમિયાન અચાનક કારખાનાના બોઈલર વિભાગમાં કોઈ અગમ્ય કારણોસર આગ લાગી હતી. કામદારોમાં દોડધામ મચી ગઈ હતી. આગે જોતજોતામાં વિકરાળ સ્વરૂપ ધારણ કરી લીધું હતું. આગ એટલી પ્રચંડ હતી કે તેના કાળા ધુમાડાના ગોટેગોટા આકાશમાં દૂર-દૂર સુધી જોવા મળ્યા હતા.
ઘટનાની જાણ થતા જ જેતપુર નગરપાલિકાનો કાફલો હરકતમાં આવ્યો હતો. નગરપાલિકાના બે ફાયર ફાઇટરો તાત્કાલિક ઘટના સ્થળે પહોંચી ગયા હતા. ફાયર ફાઇટરો દ્વારા સતત પાણીનો મારો ચલાવીને ભારે જહેમત બાદ આગને વધુ ફેલાતી અટકાવી હતી અને તેના પર કાબૂ મેળવ્યો હતો. સદનસીબે, આ ઘટનામાં કોઈ જાનહાનિ થઈ નથી.
જો કે બોઈલરમાં લાગેલી આ આગને કારણે મશીનરી અને અન્ય માલસામાનને ભારે નુકસાન પહોંચ્યું છે. કારખાનેદારને આ દુર્ઘટનામાં લાખો રૂપિયાનું નુકસાન થયું હોવાનું અનુમાન છે. હાલમાં આગ લાગવાનું ચોક્કસ કારણ જાણી શકાયું નથી તે અંગે ની તપાસ કરવામાં આવી રહી છે.
