મોહ ભંગ! અમેરિકા છોડી ૪૦ ટકા ભારતીયો સ્વદેશી પરતની તૈયારીમાં

કાર્નેગીના સર્વેમાં સામે આવેલા તારણો

મોહ ભંગ! અમેરિકા છોડી ૪૦ ટકા ભારતીયો સ્વદેશી પરતની તૈયારીમાં

દર ૧૦માંથી ૪ હિન્દુસ્તાનીમાં અમેરિકા છોડવાનો નિર્ણય : રાજકીય અસ્થિરતા, ગ્રીનકાર્ડની રાહ અને વધતી મોંઘવારી મુખ્ય કારણો

અમેરિકાની કુલ વસ્તીના ૧.૫ ટકા હોવા છતાં ટેકસ બેઝમાં ભારતીયોનું ૬ ટકા યોગદાન : છેતરાયા હોવાનો અહેસાસ

અગ્ર ગુજરાત, નવી દિલ્હી

વર્ષો સુધી જે ‘અમેરિકન ડ્રીમ’ પાછળ લાખો ભારતીયો પાગલ હતા, હવે તે સપનું વિખેરાઈ રહ્યું હોય તેમ લાગે છે. કાર્નેગી એન્ડોમેન્ટ ફોર ઇન્ટરનેશનલ પીસના 2026ના તાજેતરના સર્વે મુજબ, દર 10માંથી 4 ભારતીય-અમેરિકનો હવે અમેરિકા છોડવાનું વિચારી રહ્યા છે. રાજકીય અસ્થિરતા, ગ્રીન કાર્ડનો અનંત ઇંતજાર અને વધતી મોંઘવારી આ પાછળના મુખ્ય કારણો છે.ગઈકાલ સુધી જે લોકો ડોલરમાં કમાવવા અને સિલિકોન વેલીમાં વસવાના સપના જોતા હતા, આજે તેમાંથી દર ચોથો વ્યક્તિ પોતાનો સામાન સંકેલવાનું વિચારી રહ્યો છે. કાર્નેગી એન્ડોમેન્ટ ફોર ઇન્ટરનેશનલ પીસના 2026ના રિપોર્ટે આખી દુનિયાને ચોંકાવી દીધી છે. આખરે મહાશક્તિ કહેવાતા અમેરિકામાં એવું શું થયું કે 40% ભારતીયો હવે ત્યાંથી ભાગવા માંગે છે?

ફેબ્રુઆરી અને એપ્રિલ 2026 વચ્ચે આવેલા કાર્નેગી એન્ડોમેન્ટના આંકડા દર્શાવે છે કે ભારતીય-અમેરિકન સમુદાય હવે એક ‘ટર્બ્યુલન્સ’ એટલે કે અસ્થિરતાના તબક્કામાંથી પસાર થઈ રહ્યો છે. સર્વે મુજબ, આશરે 40% ભારતીયો હવે અમેરિકા છોડવા અંગે ગંભીરતાથી વિચારી રહ્યા છે. આ કોઈ નાની સંખ્યા નથી. આ એવા સમુદાયની વાત છે જે અમેરિકાની કુલ વસ્તીના માત્ર 1.5% હોવા છતાં ત્યાંના ટેક્સ બેઝમાં 6% યોગદાન આપે છે. પરંતુ આજે આ ‘સૌથી સફળ માઈનોરિટી’ પોતે છેતરાયા હોવાનું અનુભવી રહી છે.

સ્થળાંતરનો વિચાર રાખનારા 58% લોકોએ સૌથી મોટું કારણ ‘રાજકીય માહોલ’ જણાવ્યું છે. ડોનાલ્ડ ટ્રમ્પના બીજા કાર્યકાળ દરમિયાન તણાવ વધ્યો છે. 71% ભારતીય-અમેરિકનો ટ્રમ્પના કામકાજથી અસંતુષ્ટ છે. નિષ્ણાતો માને છે કે ધાર્મિક સમાવેશ અને પોતાનાપણાની ભાવનામાં આવેલી કમીએ ભારતીયોને બેચેન કરી દીધા છે. રાજકીય વિશ્લેષકોનું કહેવું છે કે ટ્રમ્પ વહીવટીતંત્રની કેટલીક નીતિઓએ એવો સંદેશ આપ્યો છે કે ‘અમેરિકા ફક્ત અમેરિકનો માટે છે’, જેનાથી ભારતીયોના મનમાં પોતાની ઓળખને લઈને સવાલો ઉભા થયા છે

ઇમિગ્રેશન સિસ્ટમની નિષ્ફળતા સૌથી મોટું કારણ છે. એપ્રિલ 2026ના વિઝા બુલેટિન મુજબ, EB-2 અને EB-3 કેટેગરીમાં કટ-ઓફ ડેટ હજુ પણ 2013-14 પર અટકેલી છે. એક્સપર્ટ્સનું માનવું છે કે વર્તમાન ગતિએ ગ્રીન કાર્ડ મેળવવામાં 70 વર્ષ જેટલો સમય લાગી શકે છે, જેનો અર્થ છે કે આખી જિંદગી અનિશ્ચિતતામાં વીતી શકે છે.

આર્થિક વ્યવસ્થાનું ભારણ

અમેરિકામાં હવે જીવન નિર્વાહ ખૂબ મોંઘો બન્યો છે. એક અંદાજ મુજબ, ત્યાં એક બાળકને 18 વર્ષ સુધી ઉછેરવાનો ખર્ચ આશરે 2.50 કરોડ રૂપિયા ($301,970) પર પહોંચ્યો છે. ન્યુયોર્ક અને સેન ફ્રાન્સિસ્કો જેવા શહેરોમાં ઘરના ભાડા અને હેલ્થકેર ખર્ચ મધ્યમ વર્ગની કમર તોડી રહ્યા છે.

દેશ પ્રત્યે સંવેદનશીલતા

બીજી તરફ, ભારતની ઝડપથી વધતી અર્થવ્યવસ્થા અને બેંગલુરુ-હૈદરાબાદ જેવા ટેક હબ્સ ભારતીયોને આકર્ષી રહ્યા છે. જે સુવિધાઓ માટે લોકો અમેરિકા જતા હતા, તે હવે ભારતમાં સ્પર્ધાત્મક પગાર સાથે મળી રહી છે. આ કારણે ‘હોમ કમિંગ’ અથવા રિવર્સ માઈગ્રેશનનો ટ્રેન્ડ તેજી પકડી રહ્યો છે.