રામવન પાસે ખાણમાં ઝંપલાવી તો ચાની લારીએ કામ કરતા યુવાને ગળેફાંસો ખાઇ આપઘાત કર્યો

રામવન પાસે ખાણમાં ઝંપલાવી તો ચાની લારીએ કામ કરતા યુવાને ગળેફાંસો ખાઇ આપઘાત કર્યો

મિત્રોની નજર સામે 21 વર્ષીય યુવકનું અંતિમ પગલું : RMC ક્વાર્ટરમાં પતિનો લટકતો દેહ જોઈ પત્ની બેભાન

અગ્ર ગુજરાત, રાજકોટ

રાજકોટ શહેરમાં છેલ્લા 24 કલાક દરમિયાન આપઘાતના બે અલગ-અલગ બનાવો સામે આવતા શહેરમાં ચકચાર મચી ગઈ છે. એક તરફ સગાઈ થયેલો યુવાન મિત્રોની સામે જ ખાણમાં ઝંપલાવી જીવન ટૂંકાવી બેઠો, તો બીજી તરફ પરિવારનું ભરણપોષણ કરતો યુવાન પોતાના ઘરે ગળેફાંસો ખાઈ લેતા બે નાની દીકરીઓ નિરાધાર બની છે.
પ્રથમ બનાવ ચુનારાવાડ નજીકની સીતારામ સોસાયટી વિસ્તારમાં બન્યો હતો. અહીં રહેતો 21 વર્ષીય રોહિત બાબુભાઈ કલાડિયા શાકભાજી વેચવાની સાથે મજૂરી કરીને પરિવારને મદદ કરતો હતો. ગત રાત્રે તે હંમેશની જેમ બકાલાની રિક્ષા લઈને બહાર નીકળ્યો હતો, પરંતુ થોડા સમય બાદ તેણે પોતાના મિત્રને ફોન કરીને જણાવ્યું કે તે રામવન પાસે આવેલી ખાણમાં ઝંપલાવી આપઘાત કરવા જઈ રહ્યો છે.
આ જાણ થતાં મિત્રોએ તાત્કાલિક અન્ય મિત્રો સાથે ઘટના સ્થળે પહોંચવાનો પ્રયાસ કર્યો હતો. તેઓ પહોંચ્યા ત્યારે રોહિત ખાણની કિનારે ઉભો હતો. મિત્રોએ તેને રોકવાનો પ્રયાસ કર્યો, બૂમો પાડી સમજાવ્યો પણ તે કોઈની વાત સાંભળ્યા વગર ઊંડી ખાણમાં ઝંપલાવી ગયો. ઘટનાની જાણ થતા આજીડેમ પોલીસ અને ફાયર બ્રિગેડની ટીમ તાત્કાલિક સ્થળ પર પહોંચી હતી અને ભારે મહેનત બાદ રાત્રિના અંધકારમાં મૃતદેહ બહાર કાઢ્યો હતો. ચાર મહિના પહેલા જ તેની સગાઈ થયેલી હોવાથી પરિવારમાં શોકનો માહોલ છવાઈ ગયો છે. પ્રાથમિક માહિતી મુજબ તે છેલ્લા કેટલાક સમયથી માનસિક તણાવમાં હતો.
બીજો બનાવ શહેરના RMC ક્વાર્ટરમાં બન્યો હતો. અહીં રહેતા 24 વર્ષીય મનોજ મગનદાસ રામાવત ચાની લારી પર કામ કરીને પરિવારનું ગુજરાન ચલાવતા હતા. ગત રાત્રે તેઓ પોતાના રૂમમાં ગયા બાદ અંદરથી દરવાજો બંધ કરી દીધો હતો. થોડીવાર પછી પત્ની રૂમમાં પ્રવેશતા પતિને પંખાના હૂકમાં લટકતા હાલતમાં જોઈ બૂમાબૂમ કરી હતી.
પત્નીની ચીસો સાંભળી પડોશીઓ દોડી આવ્યા અને મનોજને નીચે ઉતારી તાત્કાલિક હોસ્પિટલ ખસેડ્યા હતા, પરંતુ તબીબોએ તેમને મૃત જાહેર કર્યા હતા. મનોજના મોતથી તેમની બે નાની દીકરીઓએ પિતાનું છત્ર ગુમાવ્યું છે અને પરિવારમાં શોકની લાગણી વ્યાપી છે.
બંને બનાવોને લઈને પોલીસ દ્વારા અલગ-અલગ ગુના નોંધવામાં આવ્યા છે અને આપઘાત પાછળના કારણોની તપાસ શરૂ કરવામાં આવી છે. આ ઘટનાઓએ સમાજમાં માનસિક તણાવ અને પરિસ્થિતિઓને લઈ જાગૃતિ લાવવાની જરૂરિયાત ફરી એકવાર ઉઠાવી છે.