ઉના જિલ્લા પંચાયતમાં 62.32% અને તાલુકા પંચાયતની 25 બેઠક પર 62.73% મતદાન
ગીરગઢડા તાલુકા પંચાયતની 20 અને જિલ્લા પંચાયતની 4 બેઠક પર 59.70% મતદાન નોંધાયું : કાળઝાળ ગરમી વચ્ચે પણ મતદારો પહોંચ્યા
અગ્ર ગુજરાત, ઉના
ઉના અને ગીરગઢડા જિલ્લા તથા તાલુકા પંચાયતની ચૂંટણીમાં મતદારોએ શાંતિપૂર્ણ રીતે મતાધિકારનો ઉપયોગ કર્યો હતો. ગ્રામીણ વિસ્તારોમાં કેટલીક જગ્યાએ મતદાન પ્રત્યે નિરસતા જોવા મળી હતી, તો કેટલાક બુથો પર ભારે મતદાન નોંધાયું હોવાના સત્તાવાર અહેવાલ છે. લોકોએ કોઈ વાદવિવાદમાં પડ્યા વિના શાંતિથી મતદાન કર્યું હતું.
સવારના સમયે મતદાનની ગતિ ધીમી રહી હતી. પરંતુ જેમ જેમ ગરમી વધતી ગઈ તેમ તેમ મતદારો ઘરની બહાર નીકળીને મતદાન મથક સુધી પહોંચ્યાહતા.સાંજે 6 વાગ્યા સુધી મતદાન ચાલુ રહ્યું હતું. ઉના તાલુકા પંચાયતની 25 અને જિલ્લા પંચાયતની 7 બેઠક માટે મતદાન યોજાયું હતું. કુલ 62.32% મતદાન થયું. સૌથી વધુ 67.33% મતદાન મોટા દેશર બેઠક પર અને સૌથી ઓછું 54.91% મતદાન સનખડા બેઠક પર નોંધાયું હતું. તાલુકા પંચાયત: કુલ 62.73% મતદાન થયું. સૌથી વધુ 71.48% મતદાન વાસોજ બેઠક પર અને સૌથી ઓછું 52.65% મતદાન ઉટવાળા બેઠક પર નોંધાયું હતું.
ઉના તાલુકાના ગ્રામીણ વિસ્તારમાં મોટાભાગના મતદારોએ નિરસ વાતાવરણ વચ્ચે મતદાન કરીને ઉમેદવારોનું ભાવિ ઈવીએમ મશીનમાં કેદ કર્યું હતું. ગીરગઢડા તાલુકાની 4 જિલ્લા પંચાયત અને 20 તાલુકા પંચાયતની બેઠકોની ચૂંટણી યોજાઈ હતી, જેમાં સરેરાશ 59.70% મતદાન થયું હતું.તાલુકા પંચાયત પર સૌથી વધુ 71.17% મતદાન કાણકિયા બેઠક પર અને સૌથી ઓછું 48.79% મતદાન અંબાડા બેઠક પર નોંધાયું હતું. જિલ્લા પંચાયત મા સૌથી વધુ 63.38% મતદાન સનવાવ બેઠક પર અને સૌથી ઓછું 54.76% મતદાન વડવિયાળા બેઠક પર થયું હતું.
ગીરગઢડા તાલુકાના કુલ 99,380 મતદારો પૈકી 59,380 મતદારોએ મતદાન કર્યું હતું. જેમાં 32,199 પુરુષ અને 27,126 મહિલા મતદારોએ મતાધિકારનો ઉપયોગ કર્યો હતો. તમામ મતદાન મથકો પર ચુસ્ત પોલીસ બંદોબસ્ત ગોઠવવામાં આવ્યો હતો. કોઈપણ બુથ પર અનિચ્છનીય ઘટના બન્યા વિના શાંતિપૂર્ણ મતદાન સંપન્ન થયું હતું. ચૂંટણી અધિકારીની સીધી દેખરેખ હેઠળ દરેક મતદાન કેન્દ્ર પર પ્રિસાઈડિંગ ઓફિસર દ્વારા નજર રાખવામાં આવી હતી અને લોકો શાંતિથી મતદાન કરી શકે તેવી વ્યવસ્થા ગોઠવવામાં આવી હતી.
