સોમનાથ, દેવભૂમિ દ્વારકા અને ડાંગમાં બનાવાશે ટુરિસ્ટ ફ્રેન્ડલી પોલીસ સ્ટેશનો
પર્યટકોની સુરક્ષા માટે ચોકીઓ સ્થાપવાની જાહેરાત : રાજય પોલીસ વડા દ્વારા યોજાઇ ઉચ્ચસ્તરીય બેઠક : કન્ટેનર આધારિત હેલ્પડેસ્ક અને કિયોસ્ક ઉભા કરાશે
અગ્ર ગુજરાત, ગાંધીનગર
ગુજરાતના પ્રવાસન ક્ષેત્રને વધુ સુરક્ષિત અને આધુનિક બનાવવાની દિશામાં રાજ્ય પોલીસ દ્વારા મહત્વપૂર્ણ પહેલ હાથ ધરવામાં આવી છે. રાજ્યના પોલીસ વડા ડૉ. કે.એલ.એન. રાવની અધ્યક્ષતામાં યોજાયેલી ઉચ્ચસ્તરીય બેઠકમાં ગીર સોમનાથ, દેવભૂમિ દ્વારકા અને ડાંગ જેવા મુખ્ય પર્યટન જિલ્લાઓમાં ‘ટુરિસ્ટ ફ્રેન્ડલી પોલીસ સ્ટેશન’ સ્થાપવાની યોજના જાહેર કરવામાં આવી છે.
નાયબ મુખ્યમંત્રી હર્ષ સંઘવીના માર્ગદર્શન હેઠળ આ પહેલનો પ્રથમ તબક્કો અમલમાં મૂકવામાં આવશે. આ સ્ટેશનો માત્ર કાયદો અને વ્યવસ્થા જાળવવા પૂરતા નહીં, પરંતુ પ્રવાસીઓને મિત્રસભર વાતાવરણમાં ઝડપી મદદ અને માર્ગદર્શન મળી રહે તે હેતુથી ડિઝાઇન કરવામાં આવશે.
મહત્વનું એ છે કે, જ્યાં પહેલેથી પોલીસ ચોકીઓ કાર્યરત છે, ત્યાં ઉપલબ્ધ સંસાધનોનો ઉપયોગ કરીને તેને અપગ્રેડ કરી અત્યાધુનિક ટુરિસ્ટ પોલીસ સ્ટેશનમાં ફેરવવામાં આવશે. સાથે જ પોલીસ કર્મચારીઓ માટે ખાસ યુનિફોર્મ અને વાહનો માટે અનન્ય લોગો ડિઝાઇન કરવાની પણ યોજના છે, જેથી પ્રવાસીઓ સરળતાથી પોલીસને ઓળખી શકે. પ્રવાસીઓની તાત્કાલિક સહાય માટે મુખ્ય સ્થળોએ કન્ટેનર આધારિત ‘હેલ્પ ડેસ્ક’ અને ‘કિયોસ્ક’ ઉભા કરવામાં આવશે. ઉપરાંત, તમામ માહિતી અને સુરક્ષા સેવાઓ એક જ પ્લેટફોર્મ પર ઉપલબ્ધ થાય તે માટે ‘સેન્ટ્રલ ઇન્ટરેક્ટિવ ટુરિસ્ટ પોલીસ એપ્લિકેશન’ વિકસાવવાની સૂચના આપવામાં આવી છે.
આ બેઠકમાં દરેક ટુરિસ્ટ પોલીસ સ્ટેશન માટે પૂરતું માનવબળ, નવા વાહનો અને આધુનિક ઇન્ફ્રાસ્ટ્રક્ચર સુનિશ્ચિત કરવા ઉપર ખાસ ભાર મુકાયો હતો. ડૉ. કે.એલ.એન. રાવે જણાવ્યું હતું કે, “આ પહેલનો મુખ્ય હેતુ માત્ર સુરક્ષા જ નહીં, પરંતુ ગુજરાતમાં આવતા દેશ-વિદેશના પ્રવાસીઓને એક સુરક્ષિત અને મિત્રસભર અનુભવ આપવાનો છે.” રાજ્ય પોલીસના આ પ્રયાસથી આવનારા સમયમાં ગુજરાતનું પ્રવાસન ક્ષેત્ર વૈશ્વિક સ્તરે વધુ આકર્ષક અને વિશ્વસનીય બનશે તેવી આશા વ્યક્ત કરવામાં આવી છે.
