જેતપુરમાં દારૂના ગુનામાં સંડોવાયેલ શખ્સને ૩ માસ માટે કરાયો ‘હદપાર’
ઉદ્યોગનગર પોલીસની કાર્યવાહી: રાજકોટ ગ્રામ્ય, શહેર સહિત ૪ જિલ્લામાંથી બહાર રહેવા આદેશ
અગ્ર ગુજરાત, જેતપુર
રાજકોટ ગ્રામ્ય જિલ્લામાં કાયદો અને વ્યવસ્થા જળવાઈ રહે અને આગામી સ્થાનિક સ્વરાજની ચૂંટણીઓ શાંતિપૂર્ણ વાતાવરણમાં યોજાય તે હેતુથી પોલીસ દ્વારા અસામાજિક તત્વો વિરુદ્ધ લાલ આંખ કરવામાં આવી છે. જેતપુર ઉદ્યોગનગર પોલીસ સ્ટેશન વિસ્તારમાં સતત દારૂના ગુનામાં સંડોવાયેલા એક રીઢા ગુનેગારને સબ ડિવિઝનલ મેજિસ્ટ્રેટ દ્વારા ત્રણ માસ માટે હદપાર કરવાનો હુકમ કરવામાં આવ્યો છે.
રાજકોટ રેન્જ આઈ.જી. નિર્લિપ્ત રાય અને જિલ્લા પોલીસ અધિક્ષક વિજયસિંહ ગુર્જર દ્વારા અસામાજિક પ્રવૃત્તિ કરતા તત્વો વિરુદ્ધ અસરકારક પગલાં લેવાની સૂચના આપવામાં આવી હતી. આ સૂચનાના અનુસંધાને જેતપુર ઉદ્યોગનગર પોલીસ સ્ટેશનના પી.આઈ. એસ.એચ. શર્માના માર્ગદર્શન હેઠળ, વારંવાર પ્રોહિબિશનના ગુનામાં ઝડપાયેલા શખ્સ વિરુદ્ધ હદપારીની દરખાસ્ત તૈયાર કરવામાં આવી હતી.
હદપાર કરવામાં આવેલા આરોપીનું નામ ભગુભાઇ લુણાભાઇ માવલીયા (ઉ.વ. ૫૮, રહે. જન કલ્યાણ નગર, જેતપુર) છે. આ શખ્સ વિરુદ્ધ જેતપુર ઉદ્યોગનગર પોલીસ મથકે વર્ષ ૨૦૨૪ અને ૨૦૨૫ દરમિયાન દારૂના વેચાણ અને હેરાફેરીના અંદાજે પાંચ જેટલા ગુનાઓ નોંધાયેલા છે. તેની સતત વધતી અસામાજિક પ્રવૃત્તિઓને રોકવા માટે આ કડક નિર્ણય લેવાયો છે.
ગોંડલના સબ ડિવિઝનલ મેજિસ્ટ્રેટ રાહુલ ગમારાએ પોલીસની દરખાસ્તને મંજૂરી આપતા આરોપી ભગુભાઇ માવલીયાને રાજકોટ ગ્રામ્ય, રાજકોટ શહેર, જૂનાગઢ અને અમરેલી જિલ્લામાંથી ૩ માસ માટે હદપાર કરવાનો હુકમ કર્યો છે. પોલીસ દ્વારા આ હુકમની બજવણી કરી આરોપીને નિયત જિલ્લાઓની હદ બહાર મોકલી આપવામાં આવ્યો છે.
