IPL ફરી શંકાના દાયરામાં, કરોડોના સટ્ટાનું નેટવર્ક
અમદાવાદના લકઝુરીયા ફલેટમાંથી ઝડપાયું સમગ્ર કૌભાંડ : દારૂ-બિયર સાથે ત્રણ બૂકીઓની અટકાયત
અગ્ર ગુજરાત, અમદાવાદ
અમદાવાદમાં IPL સટ્ટાબાજીનું મોટું રેકેટ ઝડપાઈ ગયું છે. ક્રાઇમ બ્રાંચ, એલસીબી અને સ્ટેટ મોનિટરિંગ સેલે ચાંદખેડા, સોલા અને સેટેલાઇટ વિસ્તારમાં એકસાથે દરોડા પાડી અનેક બુકીઓને ઝડપી લીધા છે. સોલાના બ્લોસમ લક્ઝુરિયા ફ્લેટમાંથી ઝડપાયેલા અશ્વિન ઠક્કરના છેડા દુબઈ સુધી જોડાયેલા હોવાની શંકા વ્યક્ત થઈ રહી છે. બીજી તરફ સેટેલાઇટના લક્ઝુરિયસ ફ્લેટમાંથી દારૂ-બીયર સાથે ત્રણ બુકીઓ ઝડપાતા IPL સટ્ટાના કરોડોના નેટવર્કનો પર્દાફાશ થયો છે.
IPLની દરેક મેચ સાથે કરોડો રૂપિયાનો સટ્ટો રમાતો હોવાની ચર્ચા વચ્ચે શહેર પોલીસ અને ક્રાઇમ બ્રાન્ચ દ્વારા મોટી કાર્યવાહી કરવામાં આવી છે. સોલા, ચાંદખેડા અને સેટેલાઇટ વિસ્તારમાં દરોડા પાડી ઓનલાઇન સટ્ટાબાજી ચલાવતા બુકીઓને ઝડપી લેવામાં આવ્યા છે. સૌથી મોટી કાર્યવાહી સોલા વિસ્તારમાં કરવામાં આવી હતી. જ્યાં ક્રાઇમ બ્રાંચના સબ ઇન્સ્પેક્ટર આર.એલ. ઓડેદરાની ટીમે મંગલદીપ પાર્ટી પ્લોટ પાસે આવેલા બ્લોસમ લક્ઝુરિયા ફ્લેટમાં દરોડો પાડ્યા હતા. જ્યાંથી અશ્વિન ઠક્કરને ઝડપી લેવામાં આવ્યો છે. પોલીસને બાતમી મળી હતી કે અશ્વિન પોતાના ફ્લેટમાંથી જ IPL મેચ પર ઓનલાઇન સટ્ટો ચલાવી રહ્યો છે અને જુદા જુદા મોબાઇલ ફોન મારફતે ગ્રાહકો સાથે સોદા કરતો હતો.
દરોડા દરમિયાન પોલીસને અનેક મોબાઇલ ફોન અને સટ્ટા સંબંધિત ડેટા મળ્યો હતો. તપાસમાં સામે આવ્યું કે અશ્વિન માત્ર સ્થાનિક સ્તરે નહીં પરંતુ મોટા નેટવર્ક સાથે જોડાયેલો હતો અને તેના સંપર્કો દુબઈ સુધી પહોંચતા હોવાની સંભાવના વ્યક્ત કરવામાં આવી રહી છે. પોલીસે મોબાઇલ ડેટા અને ચેટ્સના આધારે આ એંગલ પર તપાસ શરૂ કરી છે. પોલીસ પૂછપરછમાં સામે આવ્યું છે કે તેણે નિર્ણયનગરનો દિલીપ પંચાલ, સામખ્યારીનો ઘનશ્યામ ઠક્કર, પાલડીનો રોહિત શાહ અને ડીસાનો જીતુ ઠક્કરને ઓનલાઇન સટ્ટો ચલાવવા માટે માસ્ટર આઇડી અને પાસવર્ડ આપ્યા હોવાનું સામે આવ્યું છે. આ તમામ આરોપીઓને હાલ વોન્ટેડ જાહેર કરવામાં આવ્યા છે.
તો બીજી તરફ ચાંદખેડા વિસ્તારમાં એલસીબી ઝોન-2 સ્ક્વોડે સત્યમેવ હોસ્પિટલ પાસે આવેલા કબીર પાન પાર્લર બહારથી એક બુકીને રંગેહાથ ઝડપી લીધો હતો. જાહેરમાં ઉભા રહી મોબાઇલ પર IPL સટ્ટો ચલાવતા રૂપેન કીર્તિકુમાર લાખાણીની ધરપકડ કરવામાં આવી હતી. મૂળ દ્વારકાના ભાણવડનો રહેવાસી અને હાલ ઝુંડાલ ખાતે રહેતો રૂપેન મોબાઇલ મારફતે ગ્રાહકો પાસેથી સટ્ટો સ્વીકારતો હતો. પૂછપરછ દરમિયાન તેણે રાકેશ નામના બુકી પાસેથી ઓનલાઇન આઇડી અને પાસવર્ડ મેળવ્યા હોવાનું સ્વીકાર્યું હતું. પોલીસ હવે રાકેશ સુધી પહોંચવા માટે ટેક્નિકલ સર્વેલન્સ અને કોલ ડિટેઇલ્સના આધારે તપાસ હાથ ધરી છે.
સેટેલાઇટ વિસ્તારમાં થયેલી કાર્યવાહી પણ એટલી જ ચોંકાવનારી રહી હતી. સ્ટેટ મોનિટરિંગ સેલને મળેલી બાતમીના આધારે ઇસ્કોન ક્રોસ રોડ પાસે આવેલા મારૂતિ સેલેડ્રોન ફ્લેટમાં દરોડો પાડવામાં આવ્યો હતો. અહીંથી રાજકોટના હોટલ માલિક દિવ્યરાજસિંહ ઝાલા, અમદાવાદના ધવલ પંડ્યા અને સુરતના ઘનશ્યામ કાનાણીને ઝડપી લેવામાં આવ્યા હતા. ફ્લેટમાંથી સાત મોબાઇલ ફોન ઉપરાંત દારૂની 17 બોટલ અને બિયરની 9 બોટલ પણ મળી આવી હતી. IPL દરમિયાન અમદાવાદમાંથી કરોડો રૂપિયાનું ઓનલાઇન બેટિંગ ઓપરેટ થઈ રહ્યું છે અને તેમાં રાજ્ય બહાર તેમજ વિદેશી કનેક્શન પણ હોઈ શકે છે.
