નવાગઢમાં રૂ.૬.૯૫ લાખની ચોરી કરનાર શખ્સ જેતપુર પોલીસના સકંજામાં
સોના-ચાંદીના દાગીના/રોકડ સહિતનો તમામ મુદ્દામાલ રિકવર
અગ્ર ગુજરાત, જેતપુર
જેતપુરના નવાગઢ બળદેવધાર વિસ્તારમાં તાજેતરમાં થયેલી રૂ. ૬,૯૫,૦૦૦/- ની મોટી ઘરફોડ ચોરીનો ભેદ ઉકેલવામાં જેતપુર ઉદ્યોગનગર પોલીસને મોટી સફળતા મળી છે. પોલીસે ગણતરીના દિવસોમાં જ આરોપીને ચોરી થયેલા તમામ સોના-ચાંદીના દાગીના અને રોકડ રકમ સાથે દબોચી લીધો છે.
પ્રાપ્ત વિગત મુજબ, ગત તારીખ ૨૪/૦૫/૨૦૨૬ની રાત્રિથી ૨૫/૦૫/૨૦૨૬ની સવાર દરમિયાન કોઈ અજાણ્યા ચોરે ફરીયાદીના ઘરના આંગણામાં તેમની સુવાની પથારીમાં ઓશીકા નીચે રાખેલી ચાવીની ચોરી કરી હતી. ત્યારબાદ તે ચાવી વડે મકાન અને રૂમનું તાળું ખોલી, અંદર રાખેલી પેટીમાંથી સોના-ચાંદીના દાગીના તથા રોકડ રકમ મળી કુલ રૂ. ૬,૯૫,૦૦૦/- ની ચોરી કરી પલાયન થઈ ગયો હતો. આ અંગે ઉદ્યોગનગર પોલીસ મથકે ભારતીય ન્યાય સંહિતા (BNS) ની કલમ ૩૦૫(એ), ૩૩૧(૪) મુજબ ગુનો નોંધાયો હતો.
રાજકોટ રેન્જના આઇજી નિર્લિપ્ત રાય અને ગ્રામ્ય એસપી વિજયસિંહ ગુર્જરની સૂચના તેમજ ડીવાયએસપી રોહીતસિંહ ડોડીયાના માર્ગદર્શન હેઠળ પોલીસ ઇન્સ્પેક્ટર એસ.એચ. શર્મા અને સર્વેલન્સ સ્કોડની ટીમે તપાસનો ધમધમાટ શરૂ કર્યો હતો. પોલીસે ઘટનાસ્થળની આસપાસના સીસીટીવી ફૂટેજ, એફએસએલ (FSL), ફિંગરપ્રિન્ટ એક્સપર્ટ અને ડોગ સ્કોડની મદદ લીધી હતી.
દરમિયાન સર્વેલન્સ ટીમના પીએસઆઈ કે.બી. ગઢવીની ટીમ પેટ્રોલિંગમાં હતી ત્યારે હેડ કોન્સ્ટેબલ નીલેશભાઈ મકવાણા, અજયભાઈ રાઠોડ અને કોન્સ્ટેબલ ચેતનભાઈ ઠાકોરને સંયુક્ત બાતમી મળી હતી કે ચોરીના મુદ્દામાલ સાથે એક ઇસમ મોટરસાયકલ પર દેરડી ગામથી જેતપુર તરફ આવી રહ્યો છે. બાતમીના આધારે પોલીસે જેતપુર-દેરડી રોડ પર કચરાના ડમ્પયાર્ડ પાસે વોચ ગોઠવી આરોપી કેતન ઉર્ફે લાલો કાળુભાઇ અવાડીયા (રહે. બાવાવાળા પરા, જેતપુર, મૂળ ચોરડી, ગોંડલ) ને ઝડપી પાડ્યો હતો.
પોલીસે આરોપી પાસેથી ચોરીમાં ગયેલી સોનાની બુટ્ટી (૧૯.૧૭૦ ગ્રામ, કિંમત રૂ. ૩,૦૦,૦૦૦/-), ‘વાઘેલા’ લખેલું ચાંદીનું કડું (૪૯૫ ગ્રામ, કિંમત રૂ. ૧,૩૦,૦૦૦/-), ‘ઠાકર’ લખેલી ચાંદીની લકી (૯૭ ગ્રામ, કિંમત રૂ. ૨૫,૦૦૦/-), રોકડા રૂપીયા ૨,૪૦,૦૦૦/-, એક મોબાઈલ અને ચોરીમાં વપરાયેલ હીરો સીડી ડીલક્ષ મોટરસાયકલ મળી કુલ રૂ. ૭,૨૦,૦૦૦/- નો મુદ્દામાલ કબજે કર્યો છે. પકડાયેલ આરોપી અગાઉ વીરપુર પોલીસ સ્ટેશનમાં પ્રોહિબિશન અને એમ.વી. એક્ટના ગુનામાં પણ સંડોવાયેલો હોવાનું ખૂલ્યું છે.
