ડાયાબિટીસ અને વિટામીન D, હૃદયરોગના હુમલાની દવામાં રાહત આપતા નવા દર
ભાવમાં ઘટાડો થતાં દર્દીઓને મોંઘી પડતી દવા સસ્તી થઇ : NPPA દ્વારા નવી કિંમત જાહેર કરાઇ
અગ્ર ગુજરાત, નવી દિલ્હી
સામાન્ય જનતા માટે રાહતના મોટા સમાચાર આવ્યા છે. નેશનલ ફાર્માસ્યુટિકલ પ્રાઇસિંગ ઓથોરિટી (NPPA) એ વિટામિન D-3, ડાયાબિટીસ વિરોધી, હૃદય રોગ અને અંગ પ્રત્યારોપણ (ઓર્ગન ટ્રાન્સપ્લાન્ટ) જેવી ગંભીર બીમારીઓમાં વપરાતી 30 આવશ્યક દવાઓના છૂટક ભાવ નક્કી કર્યા છે. રસાયણો અને ખાતર મંત્રાલયના ફાર્માસ્યુટિકલ્સ વિભાગ દ્વારા જારી કરાયેલા આદેશ અનુસાર, આ કિંમતો ‘ડ્રગ પ્રાઇસ કંટ્રોલ ઓર્ડર (DPCO) 2013’ ની જોગવાઈઓ હેઠળ નક્કી કરવામાં આવી છે.
આ નવો આદેશ સંબંધિત તમામ ફાર્માસ્યુટિકલ ઉત્પાદન અને માર્કેટિંગ કંપનીઓને લાગુ પડશે. નોંધનીય છે કે આ નિર્ધારિત ભાવોમાં GST સામેલ નથી, તે અલગથી ઉમેરી શકાશે.
NPPA ના જણાવ્યા અનુસાર, ફાર્માસ્યુટિકલ કંપનીઓએ આ સ્થાપિત કિંમતોના આધારે જ પોતાના સમગ્ર પેકેજની કિંમત નક્કી કરવાની રહેશે. કંપનીઓએ આ નવી કિંમતો ‘ફોર્મ 4’ માં ઈન્ટિગ્રેટેડ ફાર્માસ્યુટિકલ ડેટાબેઝ મેનેજમેન્ટ સિસ્ટમ (IPDMS) પર અપલોડ કરવી ફરજિયાત રહેશે.
કંપની દ્વારા નક્કી કરાયેલા ભાવ
હાડકાં અને વિટામિન ની દવાઓ: વિટામિન D3 ઓરલ સોલ્યુશન (કોલેકેલ્સિફેરોલ 60,000 IU નેનો ડ્રોપલેટ્સ) ની કિંમત ₹૧૪.૯૧ નક્કી થઈ છે. હાડકાના રોગો, વિટામિનની ઉણપ અને ન્યુરોલોજીકલ સમસ્યાઓ માટે વપરાતા કેલ્શિયમ, વિટામિન D3, મિથાઈલકોબાલામિન, L-મિથાઈલ ફોલેટ કેલ્શિયમ અને પાયરિડોક્સિન HCl ના ફોર્મ્યુલેશનના ભાવ પણ નિયંત્રિત કરાયા છે.
લિપિડ અને એલર્જીની દવાઓ: લિપિડ મેનેજમેન્ટ માટે વપરાતી ‘એટોર્વાસ્ટેટિન અને ફેનોફાઇબ્રેટ’ ની કિંમત પ્રતિ ટેબ્લેટ ₹૧૮.૪૬ નક્કી કરાઈ છે. એલર્જીની સારવાર માટે ઉપયોગમાં લેવાતી ‘બિલાસ્ટિન અને મોન્ટેલુકાસ્ટ’ ની કિંમત પ્રતિ ટેબ્લેટ ₹૨૧.૨૨ રહેશે.
હૃદય રોગ અને ગંભીર બીમારીઓની દવાઓ : હાઈપરટેન્શન અને હૃદય રોગની સારવાર માટે વપરાતી ‘બાયસોપ્રોલ ફ્યુમેરેટ અને એમલોડિપિન’ ની કિંમત પ્રતિ ટેબ્લેટ ₹૯.૪૦ નક્કી થઈ છે. અંગ પ્રત્યારોપણ (Organ Transplant) ના દર્દીઓ માટે જરૂરી ‘ટેકરોલિમોન પ્રોલોંગેડ રિલીઝ કેપ્સ્યુલ’ ની 3 મિલિગ્રામની કિંમત ₹૧૨૭ રહેશે.
ડાયાબિટીસના દર્દીઓ માટે રાહત: ‘એમ્પાગ્લિફ્લોઝિન, સિટાગ્લિપ્ટિન અને મેટફોર્મિન એક્સટેન્ડેડ-રિલીઝ’ ની કિંમત પ્રતિ ટેબ્લેટ ₹૧૪.৮૮ નક્કી થઈ છે. અન્ય જરૂરી કોમ્બિનેશન જેમ કે ‘સિટાગ્લિપ્ટિન, ગ્લિમેપીરાઇડ અને મેટફોર્મિન’ ની કિંમત પ્રતિ ટેબ્લેટ ₹૧૧.૯૧ રાખવામાં આવી છે.
મેડિકલ સ્ટોર પર નવુ ભાવ પત્રક લગાવવું ફરજીયાત
નવા આદેશમાં સ્પષ્ટપણે જણાવાયું છે કે તમામ છૂટક (Retail) અને જથ્થાબંધ (Wholesale) દવા વિક્રેતાઓએ પોતાના સ્ટોર્સ પર આ દવાઓની નવી કિંમતો પ્રદર્શિત કરવી પડશે. જો કોઈ પણ દુકાનદાર નિર્ધારિત કિંમત કરતાં વધુ રકમ વસૂલશે, તો તેણે વ્યાજ સાથે વધારાની રકમ પરત કરવી પડશે અને નિયમોનું ઉલ્લંઘન કરનારાઓ સામે કડક કાનૂની કાર્યવાહી કરવામાં આવશે.
