કલ્યાણપુરના હરીપર ગામના સરપંચ પતિ અને અન્ય શખ્સ ACBની ઝપટે ચડયા
ખાણ કામમાં હેરાનગતિ નહી કરવા ૨૦ લાખ માંગ્યા’તા : પાંચ લાખનો પ્રથમ હપ્તો લેતા જ ઝડપાયા
અગ્ર ગુજરાત, દ્વારકા
રાજ્યમાં લાંચિયાઓ બેફામ છે. ના માત્ર શહેરી વિસ્તારો અને ઉચ્ચ અધિકારીઓ પણ નાના નાના ગામોના સરપંચો અને તેના પતિદેવો એટલે કે (એસ.પી.સરપંચ પતિ) કે પરિવારજનો મોટી ખાયકી કરતા હોવાનું ભૂતકાળમાં કેટલાય કિસ્સાઓમાં આવી ચુક્યું છે.ત્યારે આવો જ વધુ એક કિસ્સો ગતરોજ દેવભૂમિ દ્વારકા જીલ્લામાં સામે આવ્યો જ્યાં સરપંચ પતિદેવ અને અન્ય એક વ્યક્તિ લાંચનો પહેલો હપ્તો લેતા જ એસીબીની ઝપટે ચઢી ગયા.
દેવભૂમિ દ્વારકા જિલ્લાના કલ્યાણપુરમાં એસીબીએ સફળ ટ્રેપ ગોઠવી ₹5 લાખની લાંચ લેતા બે ખાનગી વ્યક્તિઓને રંગેહાથ ઝડપી પાડ્યા છે. હરીપર ગ્રામ પંચાયતના સરપંચના પતિ અને અન્ય એક શખ્સે ખાણની કામગીરીમાં હેરાનગતિ ન કરવા માટે આ લાંચની માંગણી કરી હતી.
ઝડપાયેલા આરોપીઓમાં હરીપર ગ્રામ પંચાયતના સરપંચના પતિ ડાયાભાઇ અરજણભાઇ પરમાર અને જીવાભાઇ અરજણભાઇ પરમારનો સમાવેશ થાય છે. આ કેસના ફરિયાદી અને તેમના ભાગીદાર હરીપર ગામની સીમમાં કાળા પથ્થર કાઢવાની ખાણ ધરાવે છે. આ ખાણની કામગીરીમાં હરીપર ગ્રામ પંચાયતના સરપંચ અને સભ્ય દ્વારા કોઈ ખોટી હેરાનગતિ ન થાય તે માટે સરપંચના પતિ ડાયાભાઇ પરમારે ફરિયાદી પાસે શરૂઆતમાં ₹30 લાખની લાંચની માંગણી કરી હતી.
લાંબી રકઝકના અંતે ₹20 લાખ આપવાનું નક્કી થયું હતું. જેમાંથી પ્રથમ હપ્તા પેટે ₹5 લાખ ગઈકાલે આપવાના હતા. ફરિયાદી આ લાંચની રકમ આપવા માંગતા ન હોવાથી તેમણે જામનગર એ.સી.બી.નો સંપર્ક કરી ફરિયાદ નોંધાવી હતી.
ફરિયાદના આધારે એ.સી.બી.ની ટીમે કલ્યાણપુર મામલતદાર કચેરીની સામે આવેલા દ્વારકાધીશ કોમ્પ્લેક્સમાં, ફરિયાદીના મિત્રની ઓફિસે લાંચનું છટકું ગોઠવ્યું હતું. નક્કી થયા મુજબ, બંને આરોપીઓ ત્યાં પહોંચ્યા હતા અને ફરિયાદી સાથે હેતુલક્ષી વાતચીત કરી ₹5 લાખની લાંચ સ્વીકારતા જ એ.સી.બી.ની ટીમે તેમને રંગેહાથ દબોચી લીધા હતા.એ.સી.બી.એ લાંચની સંપૂર્ણ ₹5 લાખની રકમ રિકવર કરી કાયદેસરની કાર્યવાહી હાથ ધરી છે.
