શુકલ પીપળીયામાં પરિણીતાએ ઝેરી દવા પી જીવન ટૂંકાવ્યું

શુકલ પીપળીયામાં પરિણીતાએ ઝેરી દવા પી જીવન ટૂંકાવ્યું

25 વર્ષીય પરિણીતાનું રાજકોટમાં સારવાર દરમિયાન મોત; બે નાનાં પુત્રોએ માતાની છત્રછાયા ગુમાવી

અગ્ર ગુજરાત, રાજકોટ

રાજકોટ તાલુકાના શુકલ પીપળીયા ગામમાં એક દુઃખદ બનાવ સામે આવ્યો છે. ગામમાં રહેતી 25 વર્ષીય પરિણીતાએ ઝેરી દવા પી આત્મહત્યાનો પ્રયાસ કરતાં તેણીને તાત્કાલિક સારવાર માટે રાજકોટ સિવિલ હોસ્પિટલમાં ખસેડવામાં આવી હતી. જોકે સારવાર દરમિયાન તેણીનું મોત નીપજતાં પરિવારમાં શોકની લાગણી વ્યાપી ગઈ છે.
મળતી માહિતી મુજબ, શુકલ પીપળીયા ગામની રહેવાસી કાજલબેન અનિલભાઈ ઝીંઝુવાડીયા (ઉ.વ. 25) એ સાંજના સમયે ઝેરી દવા પી લીધી હતી. પરિવારજનો દ્વારા ગંભીર હાલતમાં તેમને રાજકોટ સિવિલ હોસ્પિટલમાં દાખલ કરવામાં આવ્યા હતા, પરંતુ સારવાર દરમિયાન મોડી રાત્રે તેમનું અવસાન થયું હતું. બનાવ અંગે હોસ્પિટલ ચોકીના સ્ટાફે કુવાડવા રોડ પોલીસને જાણ કરતાં પોલીસે જરૂરી કાર્યવાહી હાથ ધરી હતી. પ્રાથમિક તપાસમાં આત્મહત્યાનું કોઈ સ્પષ્ટ કારણ સામે આવ્યું નથી, જેના કારણે પોલીસે વિવિધ પાસાઓને ધ્યાનમાં રાખીને તપાસ શરૂ કરી છે. મૃતક કાજલબેનના લગ્ન આશરે પાંચ વર્ષ અગાઉ થયા હતા. તેમના પરિવારમાં પતિ અનિલભાઈ તથા બે નાનાં પુત્રો છે. પતિ મજૂરીકામ કરીને પરિવારનું ગુજરાન ચલાવે છે. કાજલબેનના પિયર પક્ષના સગાં પણ એ જ ગામમાં રહેતા હોવાનું જાણવા મળ્યું છે.
યુવતીના અચાનક નિધનથી પરિવારજનો અને ગામમાં શોકનો માહોલ છવાઈ ગયો છે, જ્યારે બે માસુમ પુત્રોએ માતાની મમતા ગુમાવતાં સૌમાં કરુણતા ફેલાઈ છે. પોલીસે આત્મહત્યાનું ચોક્કસ કારણ જાણવા વધુ તપાસ હાથ ધરી છે.