LRDની પરીક્ષા વિવાદમાં, ઉમેદવાર પાસેથી મોબાઇલ મળ્યો
ભાવનગરના વિદ્યાનગર વિસ્તારના પરીક્ષા કેન્દ્ર પર ધ્રાંગધ્રાના જસમતપુરા ગામનો ઉમેદવાર ઝડપાયો : ટોઇલેટ જવાના બહાને બહાર નીકળતા શંકાસ્પદ હરકતથી ભાંડો ફૂટયો : ખિસ્સામાંથી મોબાઇલ નીકળ્યો : અટકાયત
અગ્ર ગુજરાત, ભાવનગર
જેની પર રાજયની સુરક્ષાની આગામી દિવસોમાં જવાબદારી આવવાની છે તેવી પોલીસ રક્ષક દળની ભરતી વિવાદમાં આવી છે અને ભાવનગરમાં એલઆરડીની લેખીત પરીક્ષામાં એક ઉમેદવાર મોબાઇલ સાથે ઝડપાતા ભારે ચકચાર મચી જવા પામી છે અને સુરક્ષા તેમજ ચેકીંગ સામે સવાલો ઉભા થયા છે. નીટ પરીક્ષાનો મામલો હજુ પૂર્ણ નથી તયો ત્યાં વધુ એક મામલો સામે આવ્યો છે.
14 જૂને ગુજરાતભરમાં કડક સુરક્ષા વચ્ચે યોજાયેલી લોકરક્ષક દળ (LRD)ની લેખિત પરીક્ષા દરમિયાન ભાવનગર શહેરમાંથી પરીક્ષા ગેરરીતિનો એક કિસ્સો પ્રકાશમાં આવ્યો છે. શહેરના વિદ્યાનગર વિસ્તારમાં આવેલા એક પરીક્ષા કેન્દ્ર પર પ્રતિબંધ હોવા છતાં મોબાઇલ ફોન સાથે પરીક્ષા આપવા આવેલા ધ્રાંગધ્રાના એક યુવકને સુપરવાઇઝરે રંગેહાથ ઝડપી પાડ્યો છે. આ મામલે કેન્દ્રના સત્તાધારીઓ દ્વારા નીલમબાગ પોલીસ સ્ટેશનમાં સત્તાવાર ફરિયાદ નોંધાવવામાં આવતાં પોલીસે ગુનો નોંધી પરીક્ષાર્થી યુવકની અટકાયત કરી લીધી હતી.
બનાવની વિગત એવી છે કે, 14 જૂનને રવિવારે સમગ્ર રાજ્યની સાથે ભાવનગર શહેરમાં પણ LRDની લેખિત પરીક્ષા કુલ 35 કેન્દ્રો પર ચુસ્ત પોલીસ બંદોબસ્ત વચ્ચે યોજાઈ હતી. આ દરમિયાન શહેરના વિદ્યાનગર રોડ પર આવેલી ‘વિશુદ્ધાનંદ વિદ્યા મંદિર’ સ્કૂલના પરીક્ષા કેન્દ્ર પર સુરેન્દ્રનગર જિલ્લાના ધ્રાંગધ્રા તાલુકાના જસમતપુર ગામનો રાહુલ પ્રહલાદભાઈ વિરગામા (ઉં.વ. 23) નામનો યુવાન પરીક્ષા આપવા બેઠો હતો.
પરીક્ષા ચાલુ હતી, તે દરમિયાન યુવક ક્લાસરૂમમાંથી ટોઇલેટ જવા માટે બહાર નીકળ્યો હતો. આ સમયે તેની હિલચાલ અને વર્તન શંકાસ્પદ જણાતાં ત્યાં હાજર પરીક્ષા કેન્દ્રના સુપરવાઇઝરે તેને રસ્તામાં જ અટકાવ્યો હતો. સુપરવાઇઝરે તેની કડક તલાશી લેતા તેના ખિસ્સામાંથી એન્ડ્રોઇડ મોબાઇલ ફોન મળી આવતાં પરીક્ષા હોલમાં સન્નાટો વ્યાપી ગયો હતો. બોર્ડના નિયમોનુસાર પરીક્ષા ખંડ કે કેન્દ્રની અંદર કોઈપણ પ્રકારના ઇલેક્ટ્રોનિક ગેજેટ્સ કે મોબાઇલ લાવવા પર સખત પ્રતિબંધ છે.
મોબાઇલ ફોન ઝડપાયા બાદ વિશુદ્ધાનંદ વિદ્યા મંદિર કેન્દ્રના મુખ્ય સુપરવાઇઝરે તાત્કાલિક નીલમબાગ પોલીસ સ્ટેશનનો સંપર્ક કર્યો હતો અને યુવક વિરૂદ્ધ લેખિત ફરિયાદ આપી હતી. પોલીસે આ મામલે કડક વલણ અપનાવીને આરોપી વિદ્યાર્થી રાહુલ વિરગામા વિરૂદ્ધ નવા કાયદાની કલમ BNS એક્ટ 318(2) [છેતરપિંડી-ગેરરીતિ] તેમજ ‘ગુજરાત જાહેર પરીક્ષા (ગેરરીતિ અટકાવવા બાબત) અધિનિયમ’ની કલમ 3, 4 અને 12(1) મુજબ ગંભીર ગુનો દાખલ કર્યો છે.
આ બનાવ અંગે નીલમબાગ પોલીસ મથકના પીઆઇ (PI) ડી.પી. ઉનડકટે દિવ્ય ભાસ્કર સાથેની ટેલિફોનિક વાતચીતમાં જણાવ્યું કે, ગેરરીતિ આચરનારા પરીક્ષાર્થી યુવકની સત્તાવાર અટકાયત કરી લેવામાં આવી છે. તે મોબાઇલ ફોન કયા હેતુથી અંદર લાવ્યો હતો તથા તેની પાછળ અન્ય કોઈ સ્કેમ છે કે કેમ? તે દિશામાં વધુ તપાસ શરૂ કરવામાં આવી છે.
