સાવજોની સુરક્ષા થશે મજબૂત, ગીરમાં બનશે એલિવેટેડ કોરીડોર

 સાવજોની સુરક્ષા થશે મજબૂત, ગીરમાં બનશે એલિવેટેડ કોરીડોર

 ભાવનગરથી સોમનાથ કોસ્ટલ હાઇ-વે પર સિંહોની સતત અવર-જવર : ૫૬ હોટસ્પોટની યાદી તૈયાર : એલિવેટેડ નહી બને ત્યાં વિશેષ ડિઝાઇન કરેલા અન્ડર પાસ બનાવાશે

અગ્ર ગુજરાત, ભાવનગર

વિકાસ હવે વનરાજોની આડે નહીં આવે. બગસરા-ઉના NH351K ને ફોર લેન બનાવવાનો પ્રોજેક્ટ હાથ ધરાયો તે પહેલાં ફોરેસ્ટ વિભાગે આ હાઈવે પર વન્ય જીવોની અવરજવર ખાસ સિંહોના કોરીડોરનો મેપ તૈયાર કરી ચોક્કસ સ્પોટ પર એલિવેટેડ હાઈવે બનાવવા સૂચન કર્યું છે.

જ્યાં હાઈવે એલિવેટેડ બને તેમ નથી ત્યાં વિશેષ રીતે ડિઝાઈન કરેલા અન્ડર પાસ બનાવાશે. જેથી વન્યજીવો કોઈ પણ અકસ્માત વગર હાઈવે નીચેથી આરામથી પસાર થઈ શકે. એટલું જ નહીં, હાઈવે પરના વાહનોનો ઘોંઘાટ જંગલમાં પ્રસરે નહીં માટે ચોક્કસ સ્થળો પર સાઉન્ડપ્રુફ ટેક્નોલોજીનો પણ ઉપયોગ કરવા માટેની મંજૂરી અને સૂચનો રાજ્યના ફોરેસ્ટ વિભાગે આપ્યાં છે.

ભાવનગરથી શરૂ થતા વાયા સોમનાથ કોસ્ટલ હાઇવે પર રાત્રી દરમિયાન અવારનવાર સિંહની લટાર જોવા મળતી હોય છે. જેના કારણે હાઇવે પર પુરપાટ દોડતા વાહનો અને વન્યજીવ વચ્ચે અકસ્માત પણ સર્જાતા હોય છે. જો કે, છેલ્લા ઘણા સમયથી અહીં ફોરેસ્ટ વિભાગે ગાર્ડ તહેનાત કરતા જોખમ ઘટ્યું છે.

આ વાતને ધ્યાને લઈને હવે બગસરા-ઉના હાઇવેને ફોરલેન કરવાની પ્રપોઝલ આવી ત્યારે મંજૂરી આપતા પહેલાં વન વિભાગે GPS મેપીંગ, સિંહોના રૂટીન કોરીડોર ઉપર સર્વેલન્સ સહિત અન્ય વન્યજીવોની અવરજવરના કુલ 56 હોટસ્પોટ તૈયાર કર્યા. નેશનલ હાઇવે ઓથોરીટી સાથે બેઠકો કરી આ હોટસ્પોટ પર એલિવેટેડ હાઇવે, ચોક્કસ સ્પોટ પર સ્પેશિયલ ડિઝાઇન કરેલા અન્ડર પાસ (જેમાંથી પ્રાણીઓની અવર-જવર થાય) અને સાઉન્ડ પ્રુફ દિવાલો, જેનાથી જંગલના પ્રાણીઓને ખલેલ ન પડે તેવી ડિઝાઇન સાથે NOC આપી છે. નેશનલ હાઇવે ઓથોરીટીએ પણ આ પ્લાન મુજબ રસ્તા પહોળા કરવાની કવાયત હાથ ધરી છે.

ડીસીએફ વિકાસ યાદવે જણાવ્યું હતું કે, ગીરના સિંહો એ ગુજરાતનું ગૌરવ છે. તેને બચાવવા અનેક પ્રયાસો સતત ચાલુ રહે છે. રેલવે ટ્રેક પર અકસ્માત ટાળવા ટ્રેનની સ્પીડ ઘટાડવી, ટ્રેક પર ગાર્ડ તહેનાત કરાયા, જે ટ્રેન આવે તે પહેલા જો કોઈ સિંહ પરિવાર ટ્રેક આસપાસ હોય તો તેને દુર ખસેડી દે. ઉપરાંત વાડી વિસ્તારમાં ખુલ્લા કુવાનો સર્વે કરાવ્યો. આવા કુવાની દિવાલ અને જરૂર પડે ઉપર જાળી લગાડવાનું કામ પણ કરીશું. આ કામ CCF રામરતન નાલાની સૂચના આધારે ગીરના મોટાભાગના વિસ્તારમાં થઈ રહ્યું છે.

વનવિભાગ સંપૂર્ણ તૈયાર : ડીસીએફ

ગીર પૂર્વના ડીસીએફ વિકાસ યાદવે જણાવ્યું હતુ કે, હાઈવે પહોળો કરવાની પ્રપોઝલ સમયે હેડ ઓફ ફોરેસ્ટ ડિપાર્ટમેન્ટ જયપાલસિંહે જંગલ અને પ્રાણીઓ માટે યોગ્ય નિર્ણય લેવાનું નક્કી કર્યું હતું. તેમની સૂચના આધારે સર્વેલન્સ કરાયું, મેપિંગ અને કોરીડોર નક્કી કરી હોટસ્પોટ તૈયાર કરાયા હતા. આમાં લાંબો સમય લાગ્યો. આ પ્લાનના કારણે, કોરિડોર માત્ર અવરજવર માટે જ નહીં પરંતુ ગીરમાં વસતા અલગ-અલગ સિંહોના જીનેટિક કનેક્ટિવિટી જાળવવા માટે પણ જરૂરી સાબિત થશે.

ક્યાં બનશે એલિવેટેડ હાઈવે અને અન્ડરપાસ?

એલિવેટેડ હાઈવે

• ટી જંક્શન–ભાયાવદર વિસ્તાર (7 હોટસ્પોટ)
• દેવલા – મધુપુર વિસ્તાર (4 હોટસ્પોટ)
• વિરપુર – ઇંગોરાળા વિસ્તાર (10 હોટસ્પોટ)
• બોરાળા – કાંટાળા વિસ્તાર (9 હોટસ્પોટ)
• ધોકડવા – ઉના પટ્ટાનો મહત્વનો ભાગ
• બેડિયા RF વિડી ગેટ નજીક પ્રાથમિકતા સાથે

ઉના વિસ્તારના ખાસ ત્રણ અન્ડરપાસ

• કન્સારી 66 KV વિસ્તાર
• ખોડિયાર હિલ વિસ્તાર
• અંબાડા પેટ્રોલ પંપ વિસ્તાર

અન્ડરપાસ

• ડાંગાવદર – પ્રેમપરા (2)
• વેકરિયા – ખીચા (3)
• ખીચા – દેવલા (3)
• મધુપુર – વિરપુર (3)
• ખાંભા – ખડાધર (6)
• ખડાધર – બોરાળા (1)
• કાંટાળા – પચપચીયા (2)
• બેડિયા – ધોકડવા (1)