ઉપલેટા કોર્ટ ખાતે આંતરરાષ્ટ્રીય યોગ દિવસની ઉત્સાહભેર ભવ્ય ઉજવણી કરાઇ
વકીલ મંડળ, પેનલ એડવોકેટ્સ અને સમગ્ર કોર્ટ સ્ટાફે નિષ્ણાત ટ્રેનર્સના માર્ગદર્શન હેઠળ ઉત્સાહપૂર્વક યોગાસનો કર્યા
અગ્ર ગુજરાત, ઉપલેટા
ઉપલેટા શહેરમાં આંતરરાષ્ટ્રીય યોગ દિવસની ભવ્ય ઉજવણીના ભાગરૂપે ઉપલેટા કોર્ટ પરિસરમાં એક વિશેષ અને પ્રેરણાદાયી કાર્યક્રમનું આયોજન કરવામાં આવ્યું હતું. આ ગરિમામય કાર્યક્રમ ઉપલેટા કોર્ટના પ્રિન્સીપાલ સિવિલ જજ પી.પી. કાલાની વિશેષ ઉપસ્થિતિ અને ગાઈડન્સ હેઠળ યોજાયો હતો. કાર્યક્રમની શરૂઆતમાં જજ સાહેબ સહિત ઉપસ્થિત તમામ લોકોએ ઉત્સાહભેર ભાગ લઈને યોગાભ્યાસ શરૂ કર્યો હતો.
આ ખાસ પ્રસંગે ઉપલેટા કોર્ટના સમગ્ર સ્ટાફ મિત્રો તેમજ વકીલ મંડળના હોદ્દેદારો અને સભ્યો મોટી સંખ્યામાં હાજર રહ્યા હતા. અદાલતના પેનલ એડવોકેટ જયેશ વસંત, એડવોકેટ રમેશ સોલંકી તેમજ એડવોકેટ બી. ડી. મેકમહુ, એડવોકેટ કેતન બારૈયા, એડવોકેટ સંજય રાવલ અને અન્ય પણ આ આયોજનમાં ઉત્સાહભેર જોડાઈને વિવિધ આસનો અને પ્રાણાયામ કર્યા હતા અને તમામ સભ્યોએ એકસૂત્રતા સાથે યોગ કરીને સ્વાસ્થ્ય અને સંતુલનનો એક સુંદર સંદેશ પાઠવ્યો હતો.
સમગ્ર કાર્યક્રમમાં ઉપસ્થિત લોકોને સાચી પદ્ધતિથી યોગાસનો અને ક્રિયાઓ કરાવવા માટે વિશેષ યોગ ટ્રેનર્સ આમંત્રિત કરાયા હતા. જેમાં ફાલ્ગુનીબેન પરમાર, અસ્મિતાબેન મુરાણી, કરશનભાઈ ભેડા અને ભાનુબેન સોજીત્રાએ ખાસ ઉપસ્થિત રહીને દરેક આસનોનું સચોટ માર્ગદર્શન પૂરું પાડ્યું હતું. આ તકે ઉપલેટા કોર્ટના રજીસ્ટાર વી.ડી. જાડેજા, લીગલ ક્લાર્ક મિલનભાઈ સોલંકી તેમજ અન્ય કોર્ટ સ્ટાફ પણ સક્રિયપણે હાજર રહીને યોગ દિવસની ઉજવણીને સફળ બનાવી હતી.
