બામણબોર ચેકપોસ્ટ પાસે એમડી ડ્રગ્સ સાથે 4 કુખ્યાત પેડલરોને ફિલ્મી ઢબે ઝડપી લેતુ SOG
રાજસ્થાનથી રાજકોટમાં એમડી ડ્રગ્સ ઘુસાડવાનો કારસો નિષ્ફળ ; 17.520 ગ્રામ મેફેડ્રોન સહિત રૂ. 5.72 લાખનો મુદ્દામાલ જપ્ત
અગ્ર ગુજરાત, રાજકોટ
રાજસ્થાનથી એમડી ડ્રગ્સનો જથ્થો લઈને રાજકોટમાં વેચાણ કરવા આવી રહેલા ચાર કુખ્યાત પેડલરોને શહેર એસઓજીએ બામણબોર ચેકપોસ્ટ નજીક ઝડપી પાડી ડ્રગ્સના નેટવર્કને મોટો ફટકો આપ્યો છે. પોલીસને જોઈ આરોપીઓએ કાર પૂરપાટ દોડાવી ભાગવાનો પ્રયાસ કર્યો હતો, પરંતુ એસઓજીની ટીમે ચારે તરફથી ઘેરી ફિલ્મી ઢબે તેમને કાબૂમાં લઈ લીધા હતા. આરોપીઓ પાસેથી 17.520 ગ્રામ મેફેડ્રોન (એમડી ડ્રગ્સ), કાર સહિત કુલ રૂ. 5.72 લાખનો મુદ્દામાલ કબજે કરવામાં આવ્યો છે.
પોલીસના જણાવ્યા મુજબ એસઓજીના પીઆઈ એન.બી. ચૌધરીના માર્ગદર્શન હેઠળ પીએસઆઈ મહેન્દ્રસિંહ જાડેજા તથા તેમની ટીમ પેટ્રોલિંગમાં હતી. તે દરમિયાન મળેલી ચોક્કસ બાતમીના આધારે બામણબોર ગામ તરફ જતાં જૂના માર્ગ પર આવેલી ચેકપોસ્ટ નજીક વોચ ગોઠવવામાં આવી હતી. માહિતી એવી હતી કે અગાઉ એનડીપીએસ કેસમાં ઝડપાયેલ હિતેષ સુનીલ ધામેલીયા પોતાના ત્રણ સાગરિતો સાથે સ્વિફ્ટ કારમાં રાજસ્થાનથી એમડી ડ્રગ્સ લઈને રાજકોટ તરફ આવી રહ્યો છે. થોડી જ વારમાં શંકાસ્પદ સ્વિફ્ટ કાર ત્યાંથી પસાર થતાં પોલીસે તેને રોકવાનો પ્રયાસ કર્યો હતો. જોકે કારચાલકે ગાડી ભગાડી દેવાનો પ્રયાસ કરતાં એસઓજીના જવાનોએ તાત્કાલિક કારને ચારે બાજુથી ઘેરી રોકી દીધી હતી અને તેમાં સવાર ચારેય શખ્સોને કાબૂમાં લીધા હતા.
પકડાયેલા આરોપીઓની ઓળખ વિનય રાજુ ઉકેડીયા (મનહરપુર-1), હિતેષ ઉર્ફે હિતો સુનીલ ધામેલીયા (રૈયાધાર સ્લમ ક્વાર્ટર), ભવદીપ ઉર્ફે હાંડો પરેશ ડાભી (રૈયાધાર) તથા વિશાલ રાજુ ગોહિલ (મનહરપુર-1) તરીકે થઈ છે. તપાસ દરમિયાન તેમની પાસેથી 17.520 ગ્રામ મેફેડ્રોન, સ્વિફ્ટ કાર અને અન્ય મુદ્દામાલ મળી કુલ રૂ. 5.72 લાખનો જથ્થો જપ્ત કરવામાં આવ્યો હતો. પ્રાથમિક પૂછપરછમાં સામે આવ્યું છે કે આરોપીઓ રાજસ્થાનના સાંચોરથી પોતાના ઉપયોગ ઉપરાંત રાજકોટમાં વેચાણ કરવા માટે ડ્રગ્સ લઈને આવી રહ્યા હતા. પરંતુ શહેરમાં પ્રવેશે તે પહેલાં જ એસઓજીના હાથે ઝડપાઈ ગયા હતા.
પોલીસ સૂત્રોના જણાવ્યા મુજબ ચારેય આરોપીઓ હિસ્ટ્રીશીટર છે અને એનડીપીએસ સહિતના અનેક ગુનાઓમાં અગાઉ પણ સંડોવાયેલા રહ્યા છે. વધુમાં, મુખ્ય આરોપી હિતેષ ધામેલીયા કુખ્યાત પેડલર સુધા ધામેલીયાનો પુત્ર હોવાનું સામે આવ્યું છે. હિતેષ પોતે પણ ભારે નશાનો આદી હોવાનું અને દરરોજ અંદાજે 10 ગ્રામ જેટલું એમડી ડ્રગ્સ સેવન કરતો હોવાનું પ્રાથમિક તપાસમાં બહાર આવ્યું છે. સમગ્ર ડ્રગ્સ નેટવર્ક અંગે એસઓજી દ્વારા વધુ પૂછપરછ હાથ ધરવામાં આવી છે.
