ખાણ-ખનીજ માફિયાઓ સામે ગ્રામ્ય એસઓજીનો મોટો પ્રહાર
પડધરી-શાપરમાં રૂ.69 લાખના વાહનો-મશીનો જપ્ત
ખારી નદીના પટમાંથી સોફ્ટ મોરમ અને અમૃતમ તળાવમાંથી પથરાળ તાસનું ગેરકાયદે ખનન ઝડપાયું; ખાણ-ખનિજ વિભાગ સાથે સંયુક્ત કાર્યવાહી
અગ્ર ગુજરાત, રાજકોટ
રાજકોટ ગ્રામ્ય વિસ્તારમાં ગેરકાયદે ખનન કરનાર તત્વો સામે ગ્રામ્ય એસઓજીએ આકરા પગલાં ભરતાં પડધરી અને શાપર વિસ્તારમાં અલગ-અલગ દરોડા પાડી કુલ રૂ.69 લાખનો મુદ્દામાલ જપ્ત કર્યો છે. ખારી નદીના પટમાંથી સોફ્ટ મોરમ તથા માટી અને શાપરના અમૃતમ તળાવમાંથી પથરાળ તાસનું ગેરકાયદેસર ખનન તથા વહન ચાલી રહ્યું હોવાનું સામે આવતાં પોલીસે ખાણ-ખનિજ વિભાગની ટીમ સાથે સંયુક્ત કાર્યવાહી હાથ ધરી હતી.
રાજકોટ રેન્જના આઈજી નિર્લિપ્ત રાયના માર્ગદર્શન અને જિલ્લા પોલીસ વડા વિજયસિંહ ગુર્જરના સૂચનાના આધારે જિલ્લામાં ચાલી રહેલી ગેરકાયદે ખનિજ ચોરી સામે કડક ઝુંબેશ શરૂ કરવામાં આવી છે. તે અંતર્ગત ગ્રામ્ય એસઓજીના પીઆઈ એફ.એ. પારગીની રાહબરીમાં પેટ્રોલિંગ દરમિયાન મળેલી ચોક્કસ બાતમીના આધારે બંને સ્થળોએ દરોડા પાડવામાં આવ્યા હતા.
પ્રથમ કાર્યવાહી પડધરી તાલુકાના હરીપર (ખારી) ગામની સીમમાં આવેલી ખારી નદીના પટ વિસ્તારમાં કરવામાં આવી હતી. અહીં સોફ્ટ મોરમ અને માટીનું ગેરકાયદેસર ઉત્ખનન તેમજ પરિવહન ચાલી રહ્યું હોવાનું તપાસમાં સામે આવ્યું હતું. ખાણ-ખનિજ વિભાગના ભૂસ્તરશાસ્ત્રી અને રોયલ્ટી ઇન્સ્પેક્ટરની હાજરીમાં કરવામાં આવેલી કાર્યવાહીમાં એક જેસીબી મશીન અને ત્રણ ટ્રેક્ટર-ટ્રોલી સહિત કુલ રૂ.34 લાખનો મુદ્દામાલ જપ્ત કરી આગળની કાર્યવાહી માટે ખાણ-ખનિજ વિભાગને સોંપવામાં આવ્યો હતો.
બીજી તરફ શાપર ગામની સીમમાં આવેલા અમૃતમ તળાવ વિસ્તારમાં પણ બાતમીના આધારે દરોડો પાડવામાં આવ્યો હતો. અહીં પથરાળ તાસનું ગેરકાયદેસર ખોદકામ અને વહન થઈ રહ્યું હોવાનું સામે આવતાં પોલીસે સ્થળ પરથી એક હિટાચી એક્સ્કેવેટર અને એક ડમ્પર સહિત કુલ રૂ.35 લાખનો મુદ્દામાલ કબ્જે કર્યો હતો. જપ્ત કરાયેલા વાહનોને દંડકીય કાર્યવાહી માટે ખાણ-ખનિજ વિભાગને સોંપવામાં આવ્યા છે.
આ બંને સફળ ઓપરેશનમાં ગ્રામ્ય એસઓજીના પીઆઈ એફ.એ. પારગીના માર્ગદર્શન હેઠળ પીએસઆઈ પી.બી. મિશ્રા, જી.જે. ઝાલા તેમજ કોન્સ્ટેબલ રણજીતસિંહ ધાંધલ અને વિપુલભાઈ ગોહિલ સહિતની ટીમે મહત્વપૂર્ણ ભૂમિકા ભજવી હતી. પોલીસે ગેરકાયદેસર ખનન સામે આગામી દિવસોમાં પણ આવી જ કડક કાર્યવાહી ચાલુ રહેશે તેવો સ્પષ્ટ સંદેશ આપ્યો છે.
