જામનગર રોડ પર સર્જાયેલા અકસ્માતમાં પુત્રની નજર સામે ટ્રકના પૈડા નીચે માતાનો કરૂણ અંત

જામનગર રોડ પર સર્જાયેલા અકસ્માતમાં પુત્રની નજર સામે ટ્રકના પૈડા નીચે માતાનો કરૂણ અંત

બાઈક-સ્કૂટરની ટક્કર બાદ મહિલા રસ્તા પર પટકાતા ટ્રકનું વ્હીલ માથા પર ફરી વળ્યું; પુત્ર અને સ્કૂટરચાલક ઈજાગ્રસ્ત, મૃતક સિવિલ હોસ્પિટલમાં સિક્યુરિટી ગાર્ડ તરીકે ફરજ બજાવતા હતા

અગ્ર ગુજરાત, રાજકોટ
રાજકોટ શહેરમાં ગુરુવારે સવારે બનેલા એક ગમખ્વાર માર્ગ અકસ્માતે સમગ્ર શહેરને શોકમાં મૂકી દીધું છે. જામનગર રોડ પર રૂડા બિલ્ડિંગ સામે થયેલા અકસ્માતમાં 39 વર્ષીય મહિલા પોતાના પુત્રની નજર સામે જ ટ્રક નીચે કચડાઈ જતાં તેમનું ઘટનાસ્થળે જ કરૂણ મોત નીપજ્યું હતું. આ દુર્ઘટનામાં મૃતકનો પુત્ર તેમજ અન્ય એક સ્કૂટરચાલક ઈજાગ્રસ્ત થતાં બંનેને તાત્કાલિક સારવાર માટે રાજકોટ સિવિલ હોસ્પિટલમાં ખસેડવામાં આવ્યા હતા. ઘટનાના પગલે રસ્તા પર મોટી સંખ્યામાં લોકો ભેગા થઈ ગયા હતા અને થોડા સમય માટે ટ્રાફિક પણ જામ થઈ ગયો હતો.
પ્રાથમિક માહિતી મુજબ, જંકશન પ્લોટ વિસ્તારમાં રહેતા શહેનાઝબેન ઇમ્તિયાઝભાઈ દલ પોતાના પુત્ર સમીર સાથે સવારે ઘરેથી નીકળ્યા હતા. શહેનાઝબેન રાજકોટ સિવિલ હોસ્પિટલમાં સિક્યુરિટી ગાર્ડ તરીકે ફરજ બજાવતા હોવાથી પુત્ર તેમને રોજની જેમ બાઈક પર હોસ્પિટલ મુકવા જઈ રહ્યો હતો. સવારે આશરે આઠ વાગ્યાના સમયે તેઓ જામનગર રોડ પર રૂડા બિલ્ડિંગ નજીક પહોંચ્યા ત્યારે તેમની સ્પ્લેન્ડર બાઈક અને જ્યુપિટર સ્કૂટર વચ્ચે અકસ્માત સર્જાયો હતો.
અકસ્માત બાદ બાઈકનું સંતુલન બગડતાં પાછળ બેઠેલા શહેનાઝબેન રસ્તા પર પટકાઈ ગયા. એ જ સમયે બાજુમાંથી પસાર થઈ રહેલા માલવાહક ટ્રકના પાછળના પૈડા તેમની ઉપર ફરી વળતાં ગંભીર ઈજાઓ પહોંચી હતી. માથા પર ટ્રકનું વ્હીલ ફરી વળતાં તેમનું ઘટનાસ્થળે જ મોત થયું હતું. સમગ્ર ઘટના એટલી ઝડપથી બની કે પુત્ર સમીર પોતાની માતાને બચાવી પણ શક્યો નહીં.
આ અકસ્માતમાં બાઈક ચલાવતા સમીર ઇમ્તિયાઝભાઈ દલને પણ ઈજાઓ પહોંચી હતી. બીજી તરફ જ્યુપિટર સ્કૂટર ચલાવતા સુમિત ગોરધનભાઈ કોઠીયા પણ અકસ્માતમાં ઘાયલ થયા હતા. બંનેને 108 એમ્બ્યુલન્સ મારફતે રાજકોટ સિવિલ હોસ્પિટલ લઈ જવાયા હતા. ડોક્ટરોએ સુમિત કોઠીયાની હાલત ગંભીર હોવાનું જણાવી તેમને ઈમરજન્સી વિભાગમાં સારવાર હેઠળ રાખ્યા છે, જ્યારે સમીરને પણ જરૂરી સારવાર આપવામાં આવી રહી છે.
અકસ્માતની જાણ થતાં જ પ્રદ્યુમનનગર પોલીસનો કાફલો સ્થળ પર દોડી આવ્યો હતો. પોલીસે સૌપ્રથમ ટ્રાફિક વ્યવસ્થા પૂર્વવત કરી વાહનોની અવરજવર શરૂ કરાવી હતી. ત્યારબાદ અકસ્માત અંગેની કાયદેસરની કાર્યવાહી હાથ ધરી મૃતદેહને પોસ્ટમોર્ટમ માટે રાજકોટ સિવિલ હોસ્પિટલ ખસેડવામાં આવ્યો હતો. પોલીસે ટ્રક, બાઈક અને સ્કૂટરને કબજે લઈ અકસ્માતનું ચોક્કસ કારણ જાણવા તપાસ શરૂ કરી છે.
મૃતકના પરિવારજનોએ જણાવ્યું હતું કે, સમીર રોજની જેમ પોતાની માતાને ફરજ પર મૂકવા જઈ રહ્યો હતો. તેઓ સીએલએફ ક્વાર્ટર નજીક પહોંચ્યા ત્યારે પાછળથી આવેલા જ્યુપિટર સ્કૂટરે બાઈકને ટક્કર મારતા બાઈક સ્લિપ થઈ ગઈ હતી. બાઈક પરથી નીચે પડેલા શહેનાઝબેન સીધા ટ્રકના પાછળના પૈડાની નીચે આવી જતાં પળવારમાં જીવ ગુમાવવો પડ્યો હતો. પરિવારના સભ્યો માટે આ ઘટના અસહ્ય આઘાત સમાન બની છે. શહેનાઝબેન છેલ્લા ઘણા સમયથી રાજકોટ સિવિલ હોસ્પિટલમાં સિક્યુરિટી ગાર્ડ તરીકે ફરજ બજાવતા હતા અને પરિવારની જવાબદારી નિભાવતા હતા. તેમના અચાનક અવસાનથી પરિવાર પર દુઃખનો પહાડ તૂટી પડ્યો છે. ઘટનાની જાણ થતાં જ તેમના સગા-સંબંધીઓ અને ઓળખીતાઓ સિવિલ હોસ્પિટલ પહોંચ્યા હતા, જ્યાં શોકનું વાતાવરણ છવાઈ ગયું હતું.
આ અકસ્માતે શહેરમાં ફરી એકવાર ભારે વાહનોની અવરજવર, માર્ગ સલામતી અને ટ્રાફિક નિયમોના પાલન અંગે અનેક પ્રશ્નો ઉભા કર્યા છે. ખાસ કરીને વ્યસ્ત માર્ગો પર નાની ભૂલ પણ જીવલેણ સાબિત થઈ શકે છે તેનો આ બનાવ કરૂણ દાખલો બની રહ્યો છે. પોલીસે સમગ્ર ઘટનાના તમામ પાસાઓની તપાસ શરૂ કરી છે અને અકસ્માત માટે જવાબદાર સામે કાયદેસરની કાર્યવાહી હાથ ધરવામાં આવશે.