ઉપલેટાના વેપારીને 79.71 લાખનો ચુનો લગાવનાર સાયબર ગેંગનો રાજકોટનો સૂત્રધાર ઝડપાયો
BCG BRICKમાં રોકાણના બહાને યુવતીના ફોનથી વેપારીને ફસાવ્યો; ફેક પેઢીનું બેંક એકાઉન્ટ સાયબર ઠગોને આપી કમિશન કમાતી ગેંગનો વધુ એક સભ્ય પકડાયો
અગ્ર ગુજરાત, રાજકોટ
ઉપલેટાના વેપારી સાથે રૂ.79.71 લાખની સાયબર છેતરપિંડીના ચર્ચિત કેસમાં છેલ્લા એક વર્ષથી ફરાર ફરતા રાજકોટના આરોપીને રાજકોટ ગ્રામ્ય એલસીબીએ ઝડપી પાડી કેસમાં મહત્વની સફળતા મેળવી છે. આરોપી સામે કોર્ટે અગાઉથી ફરારી જાહેર કરી હતી અને તેની શોધખોળ ચાલી રહી હતી. એલસીબીની ટીમે બાતમીના આધારે જેતપુર તાલુકાના જેતલસર ચોકડી વિસ્તારમાંથી તેને ઝડપી સ્થાનિક પોલીસને સોંપ્યો હતો.
પોલીસ તપાસ મુજબ, ઉપલેટાના વેપારીને BCG BRICK નામની રોકાણ યોજના હેઠળ વધુ નફાની લાલચ આપી એક યુવતી દ્વારા સંપર્ક કરવામાં આવ્યો હતો. વિશ્વાસમાં લીધા બાદ વેપારી પાસેથી તબક્કાવાર કુલ રૂ.79.71 લાખની રકમ અલગ-અલગ બેંક ખાતાઓમાં ટ્રાન્સફર કરાવવામાં આવી હતી. તપાસ દરમિયાન આ રકમ રાજકોટના આશિષ સુરેશચંદ્ર શેઠના ખાતામાં પહોંચી હોવાનું સામે આવ્યું હતું.
આશિષ શેઠની પૂછપરછમાં સમગ્ર કાવતરાનો પર્દાફાશ થયો હતો. પોલીસે જણાવ્યું હતું કે નિલેશ રસિક વેકરીયા, નયન કાંતી ટીલવા અને જગદીશ રવજી કોટડીયાએ મળીને ‘માનવીશ એન્ટરપ્રાઇઝ’ નામે એક પેઢી ઉભી કરી હતી અને તેના નામે એક્સિસ બેંકમાં ખાતું ખોલાવ્યું હતું. ત્યારબાદ પાસબુક, એટીએમ કાર્ડ, ચેકબુક અને સિમકાર્ડ સહિતની બેંકિંગ કીટ મુંબઈમાં સક્રિય સાયબર ઠગોને સોંપી દેવામાં આવી હતી. સાયબર ગેંગ દ્વારા છેતરપિંડીથી મેળવાયેલી રકમ આ ખાતામાં જમા કરાવવામાં આવતી હતી અને ત્યારબાદ આરોપીઓને પૂર્વનક્કી કમિશન ચૂકવવામાં આવતું હોવાનું તપાસમાં ખુલ્યું છે. આ કેસમાં અગાઉ નયન ટીલવા અને જગદીશ કોટડીયાની ધરપકડ થઈ ચૂકી છે, જ્યારે નિલેશ વેકરીયા સતત પોલીસથી બચવા માટે ફરાર હતો.
પોલીસે જણાવ્યું હતું કે નિલેશ રસિક વેકરીયા (ઉ.વ. 43), મૂળ ગોંડલના ચોકસીનગરનો અને હાલ રાજકોટના કોઠારિયા વિસ્તારમાં આશોપાલવ સોસાયટીમાં રહેતો હતો. લાંબા સમયથી પોલીસની નજરથી દૂર રહેતા આરોપીને કોર્ટે પણ ફરારી જાહેર કર્યો હતો. અંતે મળેલી ચોક્કસ બાતમીના આધારે એલસીબીની ટીમે જેતલસર ચોકડી નજીકથી તેને ઝડપી પાડ્યો હતો.
આ સમગ્ર કાર્યવાહી રાજકોટ ગ્રામ્ય પોલીસ વડા વિજયસિંહ ગુર્જરના માર્ગદર્શન હેઠળ હાથ ધરવામાં આવી હતી. ઓપરેશનમાં હેડ કોન્સ્ટેબલ મનીષભાઈ વરૂ, મનદીપસિંહ જાડેજા, કોન્સ્ટેબલ ભરતભાઈ ગમારા સહિતની ટીમે મહત્વની ભૂમિકા ભજવી હતી. હવે પોલીસે આરોપીની વધુ પૂછપરછ શરૂ કરી છે, જેથી સાયબર ફ્રોડના આ નેટવર્કમાં સંડોવાયેલા અન્ય લોકો સુધી પહોંચવામાં મદદ મળશે.
