વિરપુર અને જુનાગઢના મોબાઈલ ટાવરમાંથી કોપર વાયર ચોરતી ગેંગના ૬ ઝડપાયા
ફોરવ્હીલ, વાયર સહિત રૂ.૫.33 લાખનો મુદ્દામાલ પોલીસે જપ્ત કર્યો
અગ્ર ગુજરાત, જેતપુર
કેબલ અને અન્ય સાધનોની ચોરી કરતી એક કુખ્યાત અને સક્રિય ગેંગનો લોકલ ક્રાઈમ બ્રાન્ચ (એલ.સી.બી.), રાજકોટ ગ્રામ્યની ટીમે સફળતાપૂર્વક પર્દાફાશ કર્યો છે. પોલીસે આ ગુનાહિત પ્રવૃત્તિમાં સંડોવાયેલા ૫ પુરુષ અને ૧ મહિલા સહિત કુલ ૬ આરોપીઓને ઝડપી પાડવામાં મોટી સફળતા મેળવી છે. આ સાથે પોલીસે ટાવર ચોરીના ૧ કે ૨ નહીં પરંતુ કુલ ૪ વણશોધાયેલા ગંભીર ગુનાઓનો ભેદ ઉકેલી નાખ્યો છે અને અન્ય અનેક ગુનાઓની કબૂલાત પણ મેળવી લીધી છે.
જાણવા મળતી માહિતી મુજબ, રાજકોટ ગ્રામ્યના પોલીસ ઇન્સ્પેક્ટર જે.પી. રાવના માર્ગદર્શન હેઠળ એલ.સી.બી. શાખાની અલગ-અલગ ટીમો પેટ્રોલીંગમાં કાર્યરત હતી. તે જ દરમિયાન પોલીસ ટીમને મળેલી ચોક્કસ બાતમી અને ટેક્નિકલ સર્વેલન્સના આધારે આ સમગ્ર સફળ પરિણામલક્ષી કામગીરી પાર પાડવામાં આવી છે.
દરમિયાન વીરપુર પોલીસ સ્ટેશન વિસ્તારમાં ભારતીય સંચાર નિગમ લિમિટેડ (BSNL) ના કર્મચારી દ્વારા ચોરીની બે અલગ-અલગ ફરિયાદો નોંધાવવામાં આવી હતી. પ્રથમ ફરિયાદ મુજબ, ગત તારીખ ૨૫ જુલાઈ ૨૦૨૬ની રાત્રીના સમયે જેતપુર તાલુકાના ઉમરાળી ગામે આવેલ બીએસએનએલ ટાવરમાંથી અજાણ્યા ચોર ઇસમો ૩૬ ફૂટ કોપર કેબલ તેમજ એક વિન્ડો એસીની ચોરી કરી ગયા હતા. આ અંગે વીરપુર પોલીસ સ્ટેશનમાં ગુનો દાખલ કરવામાં આવ્યો હતો. ત્યારબાદ બીજી ફરિયાદમાં પણ તારીખ ૨૯ જુલાઈ ૨૦૨૬ની રાત્રીના સમયે ઉમરાળી ગામે જ બીએસએનએલ ટાવરમાંથી કોપર વાયર અને લોખંડનો ભારે જથ્થો ચોરી થયાની ફરિયાદ નોંધાઈ હતી. ઉપરાંત, જેતપુર તાલુકા પોલીસ સ્ટેશન વિસ્તારમાં પણ મંડલીકપુર ગામે આવેલ ટેલિફોનિક એક્સચેન્જ બહાર બંધ હાલતમાં પડેલા જનરેટરમાંથી ઓલ્ટિનેટર ચોરાયાની ફરિયાદ નોંધાઈ હતી.
આ તમામ ગંભીર ગુનાઓને ગંભીરતાથી લઈને એલ.સી.બી.ના હેડ કોન્સ્ટેબલ મનીષભાઈ વરુ, મનદીપસિંહ જાડેજા તથા કોન્સ્ટેબલ ભરતભાઈ ગમારાને ખાનગીરાહે મળેલી સચોટ હકીકત આધારે આ સમગ્ર ભેદ ઉકેલી આરોપીઓને ઝડપી પાડવામાં આવ્યા હતા. પકડાયેલા આરોપીઓની વિગત, (૧) કિશોરભાઈ ઉર્ફે ભુરો કરમશીભાઈ સોલંકી, (૨) પુનમબેન કાળુભાઈ વાડોદરીયા, (૩) વૈભવભાઈ કાળુભાઈ ઉર્ફે દીપકભાઈ વાડોદરીયા, (૪) સાગરભાઈ રમેશભાઈ સોલંકી, (૫) પ્રશાંતભાઈ મનસુખભાઈ કલોલા અને (૬) ફારૂકભાઈ યુસુફભાઈ મોર (રહે તમામ જૂનાગઢ)નો સમાવેશ થાય છે.
પોલીસ દ્વારા આરોપીઓ પાસેથી આશરે ૧૩ કિલોગ્રામ કોપર વાયર, ચોરીમાં ઉપયોગમાં લીધેલા વિવિધ હથિયારો, ૧ નંગ ઓલ્ટિનેટર બોડી, ૪ નંગ મોબાઈલ ફોન તેમજ ગુનામાં વપરાયેલી અંદાજે રૂા. ૫,૦૦,૦૦૦ ની કિંમતની હ્યુંડાઈ વેન્યુ ફોરવ્હિલ કાર સહિત કુલ રૂા. ૫,૩૩,૪૫૦/- નો મોટો મુદ્દામાલ કબ્જે કરવામાં આવ્યો છે.
પકડાયેલ આરોપીમાં કિશોરભાઈ ઉર્ફે ભુરો કરમશીભાઈ સોલંકી વિરુદ્ધ અગાઉ જૂનાગઢ તાલુકા, ધોરાજી સિટી, અમદાવાદ શહેર સાયબર ક્રાઇમ પોલીસ સ્ટેશનમાં અને જુનાગઢના માળિયા હાટીના પોલીસ સ્ટેશનમાં વિવિધ કલમો હેઠળ અલગ-અલગ ગુના નોંધાઈ ચૂક્યા છે. તેમજ વૈભવભાઈ કાળુભાઈ ઉર્ફે દીપકભાઈ વાડોદરીયા વિરુદ્ધ જુનાગઢના માળિયા હાટીના પોલીસ સ્ટેશનમાં એક ગુનો નોંધાઈ ચૂક્યો છે અને સાગરભાઈ રમેશભાઈ સોલંકી વિરુદ્ધ જુનાગઢના માળિયા હાટીના અને જૂનાગઢ વંથલી પોલીસ સ્ટેશનમાં ગુના નોંધાઈ ચૂક્યા છે, પ્રશાંતભાઈ મનસુખભાઈ કલોલા વિરુદ્ધ જુનાગઢના માળિયા હાટીના પોલીસ સ્ટેશનમાં એક ગુનો નોંધાઈ ચૂક્યો છે.
