ધારી નજીક શેત્રુંજી નદીના પટમાં લટાર મારતા ડાલામથ્થા ૯ સાવજો
વીડિયો વાયરલ થતા સિંહ પ્રેમીઓમાં રોમાંચ : જૂનાગઢના કૂકસવાડામાં સિંહણ બેદરકારીનો ભગ બની, ખુલ્લા કુવામાં ખાબકી રેસ્કયું
અગ્ર ગુજરાત, અમરેલી
અમરેલી જિલ્લાના ધારી નજીક શેત્રુંજી નદીમાં એકસાથે 9 સિંહો જોવા મળતા કુદરતપ્રેમીઓ અને સ્થાનિકોમાં આશ્ચર્ય ફેલાયું છે. આ દુર્લભ દૃશ્ય કેમેરામાં કેદ થતાં તેનો વીડિયો સોશિયલ મીડિયામાં ઝડપથી વાયરલ થઈ રહ્યો છે. ધારી પંથકમાં છેલ્લા કેટલાક સમયથી સિંહોની અવરજવર વધી રહી હોવાનું પણ સ્થાનિકો જણાવી રહ્યા છે.
એકસાથે 9 સિંહોને નદી કિનારે નિર્ભય રીતે ફરી રહ્યા હોવાનું દ્રશ્ય ગીરના સમૃદ્ધ વન્યજીવનનું જીવંત ઉદાહરણ માનવામાં આવી રહ્યું છે. આ વીડિયો હાલ વન્યજીવપ્રેમીઓ માટે આકર્ષણનું કેન્દ્ર બન્યો છે અને સોશિયલ મીડિયામાં પણ ભારે ચર્ચાનો વિષય બન્યો છે.
બીજી તરફ જૂનાગઢ જિલ્લાના કુકસવાડા ગામે એક સિંહણ ખુલ્લા કુવામાં ખાબકી જતાં ચકચાર મચી ગઈ હતી. ઘટનાની જાણ થતાં જ વન વિભાગની ટીમ તાત્કાલિક સ્થળ પર પહોંચી હતી અને કલાકોની જહેમત બાદ સિંહણને સુરક્ષિત રીતે બહાર કાઢવામાં સફળતા મેળવી હતી.
રેસ્ક્યુ બાદ સિંહણને પ્રાથમિક તપાસ અને સારવાર માટે એનિમલ કેર સેન્ટરમાં ખસેડવામાં આવી છે. વન વિભાગના અધિકારીઓ તેની તબિયત પર સતત નજર રાખી રહ્યા છે. ઘટનાસ્થળે મોટી સંખ્યામાં લોકો ઉમટી પડ્યા હતા અને સમગ્ર રેસ્ક્યુ ઓપરેશન જોવા માટે ભારે ભીડ જોવા મળી હતી.
એક તરફ શેત્રુંજી નદીમાં એકસાથે 9 સિંહોનું અદભૂત દૃશ્ય ગીરના સમૃદ્ધ વન્યજીવનનો ગૌરવ વધારી રહ્યું છે, તો બીજી તરફ કુવામાં ખાબકેલી સિંહણની ઘટના માનવ બેદરકારી અને ખુલ્લા કુવાઓથી ઊભા થતા જોખમની ગંભીર યાદ અપાવે છે. વન્યજીવોની સુરક્ષા માટે સમયસર પગલાં ભરવાની જરૂરિયાત હવે વધુ સ્પષ્ટ બની છે.
