મોરબીના મકનસર નજીક ટ્રકે બાઇકને હડફેટે લેતા યુવાનનું મોત
કલરનું કામ જોઇ પરત વાંકાનેર ફરતા સર્જાયેલો અકસ્માત
અગ્ર ગુજરાત, મોરબી
મોરબી-વાંકાનેર નેશનલ હાઈવે પર મકનસર ગામ નજીક ટ્રક અને બાઈક વચ્ચે સર્જાયેલા ગમખ્વાર અકસ્માતમાં વાંકાનેરના 43 વર્ષીય કલર કામના કોન્ટ્રાક્ટર મુકેશભાઈ સોલંકીનું ઘટનાસ્થળે જ કરૂણ મોત નીપજ્યું છે. આ બનાવ અંગે મોરબી તાલુકા પોલીસે ટ્રક ચાલક સામે ગુનો નોંધી આગળની તપાસ હાથ ધરી છે.
વાંકાનેરના વાડી વિસ્તારમાં રહેતા અને કલર કામનો કોન્ટ્રાક્ટ રાખતા મુકેશભાઈ વાઘજીભાઈ સોલંકી (ઉંમર 43) મોરબી ખાતે કામ જોઈને પોતાની બાઈક પર વાંકાનેર પરત ફરી રહ્યા હતા. તે દરમિયાન મકનસર નજીક પહોંચતા પૂરપાટ ઝડપે આવતી ટ્રકના ચાલકે તેમની બાઈકને જોરદાર હડફેટે લીધી હતી.
આ અકસ્માતમાં મુકેશભાઈ ટ્રકના ટાયર નીચે ચગદાઈ જતાં તેમના બંને પગ અને પેટના ભાગે ગંભીર ઈજાઓ પહોંચી હતી, જેના કારણે તેમનું ઘટનાસ્થળે જ પ્રાણપંખેરું ઊડી ગયું હતું. આ દુર્ઘટનાના પગલે મુકેશભાઈના બે નિર્દોષ બાળકોએ પિતાની છત્રછાયા ગુમાવી દીધી છે.
બનાવ અંગે મૃતકના ભાઈ કિશોરભાઈ વાઘજીભાઈ સોલંકી (ઉંમર 41, રહે. ધરમનગર, આરએમસી ક્વાર્ટર નંબર 15, રાજકોટ) દ્વારા મોરબી તાલુકા પોલીસ સ્ટેશનમાં ફરિયાદ નોંધાવવામાં આવી છે. પોલીસે અકસ્માત સર્જી ફરાર થઈ ગયેલા ટ્રક ચાલકને ઝડપી પાડવા તપાસ હાથ ધરી છે.
