અમરેલી ACB ની સફળ ટ્રેપ: સાવરકુંડલા રૂરલના ASI ₹૫ હજારની લાંચ લેતા રંગેહાથ ઝડપાયા
દેશી દારૂનો ધંધો ફરી શરૂ કરવા દબાણ કરી ખોટા કેસમાં ફસાવવાની ધમકી આપી હતી; ઓળીયા ગામની સીમમાંથી એસીબીએ દબોચ્યા
અગ્ર ગુજરાત, સાવરકુંડલા
ભાવનગર લઠ્ઠાકાંડની શાહી હજુ સુકાઈ નથી ત્યાં અમરેલી જિલ્લાના સાવરકુંડલામાં પોલીસ બેડાને શર્મસાર કરતી ઘટના સામે આવી છે. સાવરકુંડલા રૂરલ પોલીસ સ્ટેશનના આસિસ્ટન્ટ સબ ઇન્સ્પેક્ટર રૂપિયા ૫,૦૦૦ની લાંચ લેતા અમરેલી એસીબી (ACB) ની ટીમના હાથે રંગેહાથ ઝડપાઈ જતાં સમગ્ર ખાખી આલમમાં ભારે સન્નાટો છવાઈ ગયો છે.
મળતી વિગતો મુજબ, સાવરકુંડલા રૂરલ પોલીસ સ્ટેશનમાં ફરજ બજાવતા ASI શ્યામ બગડાએ ફરિયાદીને નિશાન બનાવ્યો હતો. ફરિયાદી અગાઉ દેશી દારૂનો ધંધો કરતા હતા, પરંતુ હાલમાં તેમણે આ પ્રવૃત્તિ સંપૂર્ણપણે બંધ કરી દીધી હતી. આમ છતાં, આરોપી ASI શ્યામ બગડા દ્વારા ફરિયાદી પર દારૂનો ધંધો ફરીથી શરૂ કરવા માટે સતત દબાણ કરવામાં આવતું હતું. જો ધંધો શરૂ ન કરે તો ખોટા કેસોમાં ફસાવી દેવાની ધમકી આપી ASI એ ₹૧૦,૦૦૦ ની લાંચ માંગી હતી. અંતે રકઝકના અંતે ₹૫,૦૦૦ આપવાનું નક્કી થયું હતું.
ફરિયાદી લાંચ આપવા માંગતા ન હોવાથી તેમણે તાત્કાલિક ACB ના ટોલ-ફ્રી નંબર ૧૦૬૪ પર સંપર્ક કરી અમરેલી ACB કચેરી ખાતે રૂબરૂ વિધિવત ફરિયાદ નોંધાવી હતી. ફરિયાદના આધારે અમરેલી ACBના ઇન્ચાર્જ PI ટી.એસ.રીઝવી અને તેમની ટીમ દ્વારા લાંચનું છટકું ગોઠવવામાં આવ્યું હતું. સાવરકુંડલાના ઓળીયા ગામની સીમમાં આરોપી ASI શ્યામ બગડા ફરિયાદી પાસેથી ₹૫,૦૦૦ની લાંચ રકમ સ્વીકારતા જ ACB એ તેમને રંગેહાથ ઝડપી લીધા હતા. એસીબીએ લાંચની રકમ રિકવર કરી આરોપી વિરૂદ્ધ હોદ્દાના દુરુપયોગ બદલ ગુનો નોંધી આગળની કાયદેસરની કાર્યવાહી હાથ ધરી છે.
