અમરેલી પોલીસ બેડામાં મોટાપાયે ફેરબદલ, ૬ PI અને PSIની આંતરિક બદલી
સ્ટેટ મોનિટરિંગ સેલની રેડ બાદ જાફરાબાદ ટાઉન PI એ.એમ.દેસાઇને મહિલા યુનિટમાં હાંકી કાઢવામાં આવ્યા; જિલ્લા પોલીસ વડા સંજય ખરાતના નિર્ણયથી ખળભળાટ
અગ્ર ગુજરાત, રાજુલા
અમરેલી જિલ્લા પોલીસ વડા સંજય ખરાત દ્વારા વહીવટી અને કાયદો-વ્યવસ્થાની સ્થિતિને ધ્યાને રાખીને જિલ્લામાં ફરજ બજાવતા 6 જેટલા પોલીસ અધિકારીઓની તાત્કાલિક અસરથી આંતરિક બદલીના આદેશો કરવામાં આવ્યા છે. જેમાં પીઆઇ અને પીએસઆઇ કક્ષાના અધિકારીઓનો સમાવેશ થાય છે. તાજેતરમાં જાફરાબાદ ટાઉન પોલીસ સ્ટેશન વિસ્તારમાં સ્ટેટ મોનિટરિંગ સેલ (SMC) ની ટીમે સ્થાનિક પોલીસને અંધારામાં રાખીને એક મોટું જુગારધામ ઝડપી પાડ્યું હતું. આ ઘટનાને પગલે સ્થાનિક પોલીસની કામગીરી અને નિષ્ક્રિયતા સામે ગંભીર સવાલો ઉઠ્યા હતા. આ ચકચારી ઘટના બાદ જિલ્લા પોલીસ વડાએ કડક વલણ અપનાવીને જાફરાબાદ ટાઉનના પીઆઇ એ.એમ. દેસાઇની તાકીદે બદલી કરી દીધી હોવાની વિગતો સામે આવી છે.
બદલી કરાયેલા અધિકારીઓમાં પીઆઇ એ.એમ.દેસાઇને જાફરાબાદ ટાઉન પોલીસ સ્ટેશનથી અમરેલી મહિલા યુનિટ ખાતે બદલી કરવામાં આવી છે. પીઆઇ જે.આર.ભાચકન અમરેલી મહિલા યુનિટથી ચલાલા પોલીસ સ્ટેશન ખાતે બદલી, પીએસઆઇ આર.જી. ચૌહાણ સાયબર ક્રાઇમ અમરેલીથી ઇન્ચાર્જ પીઆઇ તરીકે જાફરાબાદ ટાઉન પોલીસ સ્ટેશન ખાતે બદલી, પીએસઆઇ કે.ડી. હડિયા મરીન પીપાવાવ પોલીસ સ્ટેશનથી નાગેશ્રી પોલીસ સ્ટેશન ખાતે બદલી, પીએસઆઇ આર.આર. ગળચર નાગેશ્રી પોલીસ સ્ટેશનથી સાયબર ક્રાઇમ અમરેલી ખાતે બદલી, પીએસઆઇ પી.જી.ચોચા અમરેલી શહેર પોલીસ સ્ટેશનથી સાવરકુંડલા ટાઉન પોલીસ સ્ટેશન ખાતે બદલ કરવામાં આવી છે. જિલ્લા પોલીસ વડા સંજય ખરાત દ્વારા અચાનક બદલીના આદેશથી અમરેલી પોલીસ બેડામાં ભારે ખળભળાટ મચ્યો છે.
